[絕對無糖分]就係咁，我搬左入一幢充滿一樓一嘅唐樓: １３９　失眠夜

個腦就係咁諗點樣令薰衣草同賤輝假結婚姐，但又真係覺得咁做好陰公，訓左係床上面失眠，望住個天花板不停係度諗，果晚薰衣草係床邊同我嘅對話。

……開始絕望緊嘅城市。

……已經絕望左嘅城市。

呢Ｄ真係移民嘅借口？

訓唔著行左出房，行到窗台附近望住旺角街景，其實……一直，一直我都覺得香港係一個好美好嘅地方，但呢幾年所發生嘅事，我慢慢對我鍾意嘅香港好陌生，唔知由邊個時期，好多兒時只係屬於香港嘅回憶都慢慢消失。



細個同人研究點樣坐火箭上大空捉夢夢嘅係叫寵物小精靈，唔係叫寶可夢啊！

小學果陣成日講果Ｄ打油詩，大笨象、揸支槍、去打仗……點解而家Ｄ後生可以個個拎住個ｉＰＡＤ打機。

仲有……又唔知幾時開始，我聽到好多小朋友係講國語而唔係粵語……

究竟，我以前鍾意嘅香港去左邊？究竟係香港變得太快？定係我太留戀以前嘅香港？

……定係，美好嘅野已經慢慢被侵佔？



我其實都有一刻衝動想移民，但係我自問能力真係欠奉……其實又唔係，應該係，我無呢個勇氣，離開一個住左咁多年、有咁多回憶、又咁熟嘅地方。

人要到幾絕望先會離住遠走他方？而遠走他方嘅人，又係對呢一個地方有幾絕望？

佢地究竟點解有勇氣去移民？佢地唔怕去到另一個地方，比人白鴿眼？比人閒言閒語咩？但試問，其實好多香港落黎嘅大陸人，都成日比人白鴿眼，比人閒言閒語。

唔通我地以後都會變成咁？去到一個比人白鴿眼，比人閒言閒語嘅地方？

本身諗住望住旺角街景可以冷靜返少少，但無諗過有更多問題湧現。



然而，身後面突然有個人拍一拍我膀頭，「蕃薯仔，做咩訓唔著啊？」

我望一望拍我膀頭嘅舅父話：「……無，只係今晚特別多野諗。」

舅父望出窗外話：「咁大個仔，有野諗係好事，但記住唔好諗唔開，跳落去啊。」

我聽到舅父咁講後，笑左笑話：「傻啦，我邊夠膽自殺。」

舅父聽到我咁講，都笑左笑話：「唔夠勇氣自殺係好事啊，但最緊要夠勇氣生存落去，好似某部電影咁講，人無事先做到世界冠軍。」

「世界冠軍……」我默念左呢四個字一下，然後問舅父：「舅父，其實你有無諗過離開呢個地方？」

舅父望一望四圍，然後話：「都住左幾１０年，點會可以話走就走到，雖然d傢俬係死物可以話搬就搬，但係感情係活生生嘅野，點可以咁易搬得走。」

「但如果，真係迫不得已呢？」我又問。



「如果真係迫不得已，就隨自己個心搵一個可以令自己覺得存在落去仲有價值嘅地方。」舅父講完後，摸一摸我個頭：「蕃薯大個仔嗱，諗Ｄ野咁深都有。」

「一早大過左好耐啦，你而家先知。」我答。

「咁又係，以前去親阿妹度都見你係房打飛機，就知你大過仔啦。」舅父話。

「喂啊，舅父你留意呢Ｄ野。」不過講真、自從我無撚用後，我真係好耐無打過飛機。

然後，我地都靜左望住街景，舅父話：「有時候，返去睇下你阿媽啦，邊有阿媽唔掛住自己個仔。」

我聽到後點一點頭：「嗯，我知道。」如果搞好薰衣草呢單野後，我會返屋企睇一睇屋企人。