[絕對無糖分]就係咁，我搬左入一幢充滿一樓一嘅唐樓: １３８　沉船

講真，對住呢個集總其實無咩好感，雖然佢時不時都會比Ｄ　ＪＯＢ我做，但都只係當佢係個客咁。而且，佢講野講成咁……不過放心，以下我會盡我應力聽清楚佢講咩……

「你好少可黎搵我ＷＯ，有咩事？」集總先開口，然後就繼續督佢面前Ｄ電話。

「我……我有Ｄ野想問，可能得你先答到我。」我話。

「咩野問題難到得我先答到啊。」佢講完後，對左部機去我口邊話：「黎，幫下手扮個好惡嘅聲講句：『等唔撚到就咪撚叫雞！』。」

我唯有是但咁應左佢，然後話：「我想問你係未知道點樣搞假結婚？」



集總聽到我咁講後，停左佢手頭上嘅動作，望住我問：「你好人好姐，無啦啦做咩搞假結婚？」

我支吾咁話：「……無啊，好奇姐，聽人講會有人比錢做，但會唔會有人係比人呃㗎？」對住佢都無謂傾咁多，單刀直入算。

「又會無啦啦對呢Ｄ野咁好奇都有？」集總用好奇怪嘅目光望一望我，然後係佢其中一部電話搵左張相ＳＨＯＷ左比我，「ＤＥＴＡＩＬ自己睇啦。」

「嘩！你識講英文㗎？」我問。

「日文都識啊，想唔想聽。」佢講完後就一副彩我都有味咁樣，而我就望住佢比我張相……嘩！又真係搞一次假結婚要成幾十萬ＷＯ，但有一個地方圈左個平Ｄ嘅價錢，３萬８……



「３萬８果個係？」我問。

「果個友情價黎。」集總答……下！？真係有友情價㗎？

「咁點友情價法？」我問。

而集總放低手頭部電話，覺得好煩咁話：「姐係如果呃到條水魚，真係咁撚蠢覺得想同你結婚，咁就唔駛比錢對家，剩係比錢我地呢Ｄ中間人嘅服務費。」

「……咩服務費？」我問。



「唔駛排期嘅，唔駛交文件嘅，唔駛填ＦＯＲＭ嘅，Ｄ　ＦＯＲＭ咁難填你地識填咩，未又係我地收錢搞好晒囉。」集總講完後，上下打量左一下我問：「做咩啊？你係未等錢駛，想用假結婚呃返筆啊。」

「痴線！我先……」剛剛講到出口想話自己先唔會咁做，但另一刻又諗返起陰陽怪所講嘅野，就突然將幾隻字吞返落肚。

然而，集總突然搭住我膀頭話：「嗱，如果你真係想做，我可以幫你手，最多唔話比你舅父聽，你都知呢Ｄ野上面係好渴求㗎。」

我望一望我上面，然後問佢：「邊度上面？」

「頂！大陸啊！」佢移返我個目光望住佢再話：「最多我唔抽多你，再比多少少你啦。」

點解我覺得眼前呢個集總，咁似呃人點數果Ｄ騙子嘅……唔係ＷＯ，佢本身就係呃人點數果Ｄ騙子黎。

「都話我只係好奇，唔係想假結婚啊。」我推開左佢，然後問：「但係友情價的話，點解個對家都肯制？」

集總笑左笑話：「未就係比人呃上腦，真係鍾意左對方，沉船囉。」



……沉船。

當呢兩個字出現，我腦海中出現左兩個人，就係小春同賤輝。

睇黎，佢地真係兇多吉少……但係，我下面有無撚用，都要睇下幫唔幫到薰衣草落黎，我自己唔搞假結婚，唔通要推佢地兩個去死……

唔係ＷＯ！等等！

你話我推小春去假結婚就話我ＰＫ姐，但賤輝本身個人咁撚仆街，實唔會有人鍾意呢一種男人，而家假結婚點都可以當係為佢人生結婚個數目變返「１」姐，善事黎㗎！而且，最後薰衣草同佢離婚，關我撚事咩！

就係呢一刻，我心入面響起一個惡念……賤輝，今次只可以當你唔好彩。