[絕對無糖分]就係咁，我搬左入一幢充滿一樓一嘅唐樓: １３３　質問

女神問到咁，我唯有即時作個故仔出黎。

「係我以前同小春係另一間ＫＦＣ度做果陣識嘅……」我話。

「但係你以前話一直都係度做㗎。」澧琳話。

「ＥＲ……我同小春秘撈唔可以話比人知㗎。」我話。

「哦……咁你同小春秘撈識呢個女人，但點解經理又識呢？佢都有去秘撈？」澧琳問。



駛唔駛個個問題都去到咁盡啊，我點識答啊……「佢去教人！係……佢去果間教人，所以識左呢個女人。」

澧琳用一個懷疑嘅眼神望住我話：「你同小春去秘撈，經理去果間教人，以經理嘅性格，佢見到你地去另一間秘撈，無理由唔告發你地兩個。」

仆街……澧琳又會心水清得咁緊要。

「……如果我話唔同ＴＥＡＭ的話，妳信唔信？」我問。

而澧琳湊左個面過黎話：「你話呢……你試下講大話呃我，後果好嚴重。」



死得……我覺得澧琳已經覺得我講緊大話，但係我真係唔想比佢知道我住緊一幢充滿一樓一嘅唐樓。

但就係呢個時候，阿ＫＩＮＧ救左我，「喂！蕃薯！Ｄ薯格燶晒嗱！」

我聽到後即刻由薰慌中清醒，而面前嘅澧琳亦都好快咁幫我一齊拎返炸緊嘅薯格上黎，但係，Ｄ薯格已經燶晒，我望住差唔多黑晒嘅薯格，個心仲為頭先質問我嘅澧琳而驚緊。

我同佢對望左一眼後話：「今次一定比賤輝鬧死。」

但係澧琳無咩表情咁同我講：「今次抵你死。」然後就轉身走人。



我嘆左啖氣，而阿ＫＩＮＧ行左過黎話：「佢咁樣問法，姐係證明佢緊張你。」

下？係咩？

「真㗎？」我好開心咁問阿ＫＩＮＧ，但佢又講左句：「但係你諗返點樣哄澧琳先開心啦。」

頂……又係ＷＯ。

經歷左呢個小插曲，我更加覺得呢個薰衣草真係生人勿近，放工後，我即刻衝望屋企，平時都會陪澧琳佢行下先，但今日驚比佢質問，所以都係極速返家算。

返到去，衝返入房，一野訓係張床度，諗返今日所發生嘅野，雖然比澧琳咁樣質問，但唔通同阿ＫＩＮＧ所講一樣，因為澧琳緊張我，所以先咁？

唔通……澧琳鍾意我！？

諗到呢度，我個樣就好似食左春藥咁發姣，係張床度典下典下。



「做咩咁開心啊？」一把聲問我。

「澧琳可能鍾意我。」我發晒姣笑住答。

「澧琳係邊個？」果把聲又問。

「係我女神。」我繼續發晒姣笑住答。

「今日不停問你問題果個女仔？」把聲問，把聲好似係女人聲黎。

「係啊，佢今日質疑我……咦？」我停止發姣望住天花，冷靜咁諗一諗，無理由有個女人聲係我間房㗎，又唔係陰陽怪把阿伯聲，係邊個呢？

「但我見今日個女仔對你好惡咁ＷＯ。」把女聲又出左黎，好似就係我床邊，我即刻擰過頭望一望旁邊，原來薰衣草坐左係我書枱前面。



我見到佢後嚇左一跳，彈左起身大叫左出黎，而薰衣草笑得好開心咁話：「做咩次次見到我，你都好似會大叫㗎。」