[絕對無糖分]就係咁，我搬左入一幢充滿一樓一嘅唐樓: １３２　爭風呷醋

澧琳因為薰衣草而對我有殺氣？咁我應該係開心好定唔開心好？呢一刻我個內心真係好矛盾……

望住不停向我揮手嘅薰衣草，又望一望對我微笑但目露兇光嘅澧琳，突然間我有一種想即刻暈倒嘅感覺。

就係我諗住真係扮暈之際，有兩個救星突然出現。

「薰衣草！」「薰衣草！」無錯，係兩把唔同嘅叫聲，而且都係男人黎，仲要係我地熟識嘅聲音。

在場嘅同事都望向講呢三個字嘅男人身上，而呢兩個人就係小春同賤輝。



係ＷＯ！我差Ｄ忘記呢兩個人對薰衣草神暈癲倒ＷＯ！

而澧琳由頭先有殺氣嘅狀態，變到有少少詫異，佢望一望呢個女仔，好細聲咁講左句：「狐狸精……」

澧琳睇人又睇得幾準ＷＯ。

而小春同賤輝異口同聲嘅動作後，就一齊衝向薰衣草問：「妳做咩黎呢度嘅？掛住我啊？」真係夾都無咁盡，佢地兩個講完後，就開始互望。

「經理，你又識我愛人㗎？」嘩……小春竟然已經用愛人黎形容薰衣草。



「咩愛人啊？薰衣草係我女朋友啊！」賤輝都勁，斬釘截鐵講咩個身份出黎。

「咩女朋友啊！薰衣草已經同我私定終身㗎！」小春反擊，全場嘅人都望住佢地三個……

「薰衣草話愛我㗎！」賤輝話。

「薰衣草話同我一齊好有感覺啊！」小春話。

佢地就係咁一言一語好似小學雞吵架咁，而係佢地正中間嘅薰衣草好似咩事都無咁行去旁邊，繼續向我招手，而澧琳見到咁，就同我講：「行過去啦，果位女客人指名要你去啊。」



我聽到後心諗，澧琳妳講呢句係真話定反話黎，我戰戰競競咁慢慢行向薰衣草，而阿ＫＩＮＧ就不停望住我搖頭示意我唔好，係呢個進退兩難嘅局面，我應該點做好……以待客角度，我要盡力實行ＫＦＣ精神嘅「我們做雞是對的」，但如果係情上面，我真係好驚澧琳會嬲左我。

只不過，我最後都係一步步咁慢慢接近薰衣草，行到佢面前後，佢第一句就問：「蕉仔，呢度有咩好野食啊？」

下！？小姐，有兩個男人係妳旁邊爭風呷醋緊，妳仲有心情係度叫野食，仲問我呢度有咩好野食，係人都知入ＫＦＣ係叫雞㗎啦。

「……個下午茶餐咁抵食。」我講完後，薰衣草好嗲聲嗲氣話：「好啦～咁我聽蕉仔話叫個下午茶餐啦～」

ＷＨＡＴ　ＴＨＥ　ＦＵＣＫ！？小姐妳似想陷我於不義ＷＯ！？小春同賤輝聽到妳咁對我，我實死……唔駛幻想啦……佢地聽到後而家望左過黎……

「蕃薯！勾二嫂係江湖大忌！」蕃薯……你幾時入左江湖？

「蕃薯！你即刻同我去烤薯格！」賤輝又濫用佢Ｄ職權……

講到咁，我死死地氣行過去炸薯角，而阿ＫＩＮＧ就行左過黎話：「果個女仔，真係唔簡單ＷＯ。」



「係啊……」我好委屈咁應左佢一下後，望住對住我笑得好開心嘅薰衣草，佢個笑容，我睇得出係帶住一Ｄ特登玩我嘅感覺。

然而，澧琳行過黎問：「你點識果個女人㗎？」語氣有少少強硬。

突然咁問我，我真係黎唔切反應要點答，但係阿ＫＩＮＧ就好自然答佢：「果個女人做雞㗎。」

下！？阿ＫＩＮＧ！？你咁直接話比澧琳薰衣草做雞？咁我點算啊？澧琳會唔會以為我去叫雞識到薰衣草㗎？我勁膽心望住澧琳，個腦不停高速換算要點解話，但估唔到澧琳望住個薰衣草然後講：「估唔到佢係同行ＷＯ。」

下……同行？

「佢係邊間ＫＦＣ做㗎？」澧琳問。

好彩……澧琳所諗嘅雞同我地諗嘅雞係唔同。