[絕對無糖分]就係咁，我搬左入一幢充滿一樓一嘅唐樓: １３４　絕望的城市

我見到薰衣草係我房真係嚇左一跳……

「妳做咩係度㗎！」我大叫左出黎後，薰衣草眼定定咁望實我話：「唔好咁嘈啦，包租佢同龍哥佢地訓左，你咁大聲會嘈醒佢地㗎。

我真係無佢咁好氣，我坐左起身後望實佢話：「呢度係我間房，唔該同我出去。」

薰衣草突然眼泛淚光咁望住我問：「你係未好唔鍾意我？」

估唔到呢個邪花會用到喊呢招，我係驚㗎！……但係女人一喊我又真係無辦法……



「……咁妳做咩無啦啦係我間房度出現呢？」我問。

而薰衣草就停止左眼泛淚光，笑住咁同我講：「因為你係我係香港第一個遇到對我無反應嘅人，我真係好想知道點解你會對我無反應。」

下……佢係未笑９緊我性無能……

「……ＥＲ……我……因為我心入面有澧琳。」呢個雖然我隨便諗嘅說話，但講完我都覺得有一半係真，咁唔通我直接話比薰衣草聽我性無能所以無反應咩。

薰衣草聽到我所講後，就甜笑咁話：「我都估到係因為愛情先會咁，不過愛情嘅威力真係好大。」



「妳又知？」我問……我都唔知點解會問佢呢個問題。

「點會唔知啊，唔好以為我做雞，我都有真真正正愛過人㗎。」薰衣草一副患得患失咁樣。

「係咩，咁妳又搞到小春同賤輝咁嘅樣。」我衝口而出講左自己心聲出黎，而薰衣草聽到後，呆左呆，笑左笑後話：「你呷醋我唔搞你啊？」

「痴撚線！」我好直接咁講，然後薰衣草笑得好大聲。

佢笑完後就話：「我同佢地之間嘅唔係感情關係，係賓主關係，其實男人出得黎尋花問柳，總有一Ｄ平時想做嘅性需要唔敢同另一半做，又或者根本無另一半，我只係角色扮演陪佢地做場色慾戲，但點知佢地會咁入戲ＷＯ。」



「下！？做色慾戲？做撚到佢地成日ＯＮ９９咁，小春仲話想娶妳添ＷＯ。」我話。

「咁佢果晚幫襯我，係玩老公老婆ＲＯＬＥ　ＰＬＡＹ嘛。」薰衣草一副理直氣壯咁話。

「咁……咁……」我都唔知講咩，但薰衣草就已經接上話：「不過，如果真係有人肯娶我就好，咁我就可以黎香港。」

果然！！！！！我都覺得呢條女係為左要落黎香港先搞到小春同賤輝咁！！！！！賤輝最後點我唔理！但小春係我兄弟！我係唔可以比呢件事發生！

「妳咁做覺唔覺得唔係幾好呢？同一個無感情結婚只係為左去另一個地方，唔通妳落到黎後就同個男人離婚？」我話，而薰衣草望左我一陣後話：「咁佢地收左錢嘛。」

「下？收錢？」我詫異咁問。

「係啊，假結婚公價１０幾萬，友情價的話３萬８就搞得到。」點解佢可以講到咁理直氣壯咁。

「……假結婚仲有錢收？仲有友情價……」我真係不敢想像。



「咁友情價其實都煩㗎，因為通常開得出友情價嘅人，最後都唔想離婚，我有幾個朋友都煩左一陣先搞得掂。」佢講完後，我更加唔敢相信原來真係有人可以用自己婚姻當一盤生意。

「但妳點解咁想黎香港呢？而且假結婚我真係接受唔到，我都唔知你地諗咩。」我講完後，薰衣草用一個好奇怪嘅眼神望住我話：「有Ｄ香港女仔為左去其他地方，都搵個外國人嫁啦，你唔話佢地？」

……頂……呢下我又真係駁唔到佢。

「而且點解你地可以去其他國家結婚又得，但係我地大陸人唔得呢？」佢問。

我真係有少少激氣咁話：「咁我地係因為愛果個人先同佢地去外地，唔同你地只係為左落黎香港。」

薰衣草靜左，好認真咁望住我問：「你咁肯定，我地只係為左落黎香港而結婚？你咁肯定，離開香港結婚果Ｄ人真係愛果個人？咁點解有一句說話叫『有ＰＡＳＳＰＯＳＴ有閪』？」

一連串好針對性嘅問題衝左出黎，我而家覺得我同面前嘅薰衣草價值觀真係好唔同，開始有少少燥，「咁點解唔好好地係上面住，要用假結婚落黎香港！？」



現場，靜左好幾秒，然後薰衣草開口話：「你地面對一個開始絕望緊嘅城市，都開始諗移民，咁點解我地面對緊已經絕望嘅城市，唔可以移民。」

……呢句咁沉重嘅說話，我……唔識答。