[絕對無糖分]就係咁，我搬左入一幢充滿一樓一嘅唐樓: １３１　澧琳與薰衣草

我真係無諗個會有眼前呢個畫面……

小春平時不嬲都ＯＮ９９咁，但都唔會笑到成個低能兒咁，但唔只小春，就連賤輝都係咁……全間ＫＦＣ因為呢兩個人，每個員工都進入左緊張狀態咁。

而澧琳就問我：「搞咩小春都咁，尋日同佢做野果陣，仲見到佢好地地㗎。」

「……唔知呢。」呢個係我只可以答嘅答案，雖然我知果兩條友係因為薰衣草而變成咁，但我無可能會將呢件事話比澧琳聽，唔係一陣佢問我點樣識呢個女人，我點答佢好。

澧琳聽到我答案後，望一望佢地兩個，然後好膽心咁話：「唔通呢個係傳染病黎？尋日好似見小春有行去經理面前問左Ｄ野，然後佢今日就變成咁……如果真係傳染病！如果傳染到比我未死！？」



聽到澧琳咁講，我腦入面開始想像澧琳傻笑嘅樣……一定好可愛！

但可能我成個諗樣出晒黎，澧琳一下打左落黎：「唔比諗我傻笑樣啊！」

……佢又會知我係諗住佢傻笑嘅？女人直覺真係勁。

同澧琳打鬧左一陣就繼續做野，而今次係阿ＫＩＮＧ行過黎……「小春搞咩今日ＯＮ９左咁多？」

我聽到阿ＫＩＮＧ咁問後，極之認同咁點頭話：「係，沒有最ＯＮ９，只有更ＯＮ９。」



然後我地笑左幾笑後，阿ＫＩＮＧ就話：「唔講笑住，到底發生左Ｄ咩事？」

而我就將我地發現賤輝去我住緊果幢充滿一樓一嘅大廈叫雞嘅事，直到小春係我床邊發春嘅野講比佢知，而佢聽完後就話：「咁你所講果個女人，真係同你講嘅一樣，係一朵邪花ＷＯ。」

「係啊，搞到佢地兩個成個低能兒咁，就同你讀書果陣搞到你性上癮嘅薇琪一樣。」我話，然後阿ＫＩＮＧ尷尬咁笑一笑後話：「……咁都可以講到我果邊，不過呢Ｄ咁有目的性嘅女人，真係要好小心先得。」

「係啊，而且……我……」我頭先講果陣一直都諗緊好唔好話比阿ＫＩＮＧ知我比薰衣草污辱過，你地知啦，有Ｄ野成日屈住係心入面唔講出黎，真係會屈到病㗎，但係當我想講比阿ＫＩＮＧ聽果陣，我突然聽到……

「咦！蕉仔你係度返工㗎？」點解有把聲好似咁熟，而且仲叫我做蕉仔！？唔通……我望去把聲嘅來源地，不禁倒抽一口涼氣，「邪花！？」我自己講左出聲都唔知，而阿ＫＩＮＧ聽到我咁講後就問：「佢就係你頭先所講嘅邪花？」



我先望一望阿ＫＩＮＧ，再望一望薰衣草，好彩佢無聽到我話佢係邪花，然後再擰轉望返阿ＫＩＮＧ話：「……係啊，就係呢個女仔。」

阿ＫＩＮＧ望住薰衣草，上下打量再一下然後話：「唔怪得知佢地兩個會比佢迷到成個低能兒咁啦，呢個女人嘅外在又真係唔錯。」

真係估唔到平時食女無數嘅阿ＫＩＮＧ，見到薰衣草後都咁高評價，而個薰衣草就不停望住我係度叫：「蕉仔蕉仔，我想叫野食啊，快Ｄ過黎啦。」

……死火，佢係度不停咁叫我，一陣比澧琳聽到嘅話……唉，唔駛一陣，已經比佢聽到……

「蕃薯，呢位小姐係你朋友？」我感覺到，澧琳呢個問題入面，有少少殺氣。