[絕對無糖分]就係咁，我搬左入一幢充滿一樓一嘅唐樓: １１２　通電

「唔可以！」

「但係……呢個係我地以後唯一可以相見嘅第一步。」

「但我唔可以比妳冒呢個險！」

「我唔介意……」

「但我介意啊！」



我同ＶＩＶＩ傾電話時，同佢講左我嘅想法，但係佢一聽到後就好激動咁反對，「如果要令到妳返到去呢個阿叔身邊，我情願我地以後唔好見。」

我聽到佢咁講後，唔知點解當下眼淚流左落黎……

「妳講多次……」我話。

而ＶＩＶＩ係另一邊好似感受到我嘅感受，佢靜左靜後話：「對唔住，我頭先……」

但係，我再忍唔到自己內心。



「妳再講多次！妳話咩野以後唔好見！」我都激動起黎。

「等等，我頭先只係衝口而出，唔係真心㗎。」ＶＩＶＩ話。

「妳頭先親口講左話情願唔好見……唔好見……係妳講㗎……」我喊得愈黎愈緊要。

而另一邊，又係靜左靜後，好認真咁講：「對唔住。」

「妳知唔知呢個係唯一個方法，妳以為我想跟呢個阿叔去香港咩，我係鼓起左好大決心先選擇咁做，妳覺得我唔驚佢再性侵我咩，但係……但係我真係唔想同妳分開啊，我以為我鼓起勇氣後可以得到妳嘅支持，但妳點解要反對我啊。」我喊住咁話。



然後，我聽到電話傳黎嘅ＶＩＶＩ呢一句：「我都好唔想同妳分開，但妳知唔知我更加唔想妳因為我而再受傷害。」

我聽到呢句後，喊得仲勁，「……點解要咁ＷＯ……點解我地相遇後……會分開……」

而我聽到另一邊倒抽一口涼氣嘅聲，然後問：「其實，我都唔知我地而家，算係朋友……定係……」

佢無講出口，我亦都無問，因為我地嘅關係，一早已經係我地彼此嘅心烙下左一個愛嘅烙印。

我地係一對不為世俗接受嘅戀人，面對嘅問題亦都會比其他戀人多。

但我又可以為呢一段戀情支持幾耐？

我唔知。

但係，我剩係知道，直到而家呢一刻，我對佢嘅感覺仍然十分強烈。



「如果……」我先開口打破沉默，「……我仲係想咁做，妳會點？」

我問佢，而佢笑左笑後話：「妳永遠都係咁硬頸。」

我破涕為笑話：「係㗎，我就係咁麻煩㗎。」

然而，佢好認真同我講：「如果妳真係咁決定，我會想盡方法保護妳。」