[絕對無糖分]就係咁，我搬左入一幢充滿一樓一嘅唐樓: １１１　惡魔帶來的曙光

當ＶＩＶＩ差唔多成日提佢會走之後，我地就開始吵，我吵係因為點解佢仲要每一題呢件會令我唔開心嘅事，我真係唔想我地分離。

直到有一日，住香港嘅阿叔返黎台灣探我地……果一日，ＶＩＶＩ都有黎我屋企。

「嘩～小雨咁大個女拿。」阿叔一見到我就咁講，而我，一直對呢個阿叔好厭惡。

而ＶＩＶＩ就係我耳邊問：「妳自前講果個阿叔，就係呢個人？」

我，微微咁點一點頭，然後ＶＩＶＩ用一個敵意嘅眼神望住佢。



原因係，我以前係香港讀書果陣，係投靠呢個阿叔，因為果陣阿爸阿媽話香港教育好似好Ｄ，而且我又鍾意香港，所以好細過果陣就送左我去香港住一排。

但係呢個阿叔，係我細過果陣……性侵犯過我……

可能，我有呢個經歷後，影響到自己性格，搞到唔太敢同人接觸，遇到事亦都唔敢主動出聲，而我比人性侵呢件事，我只話過比ＶＩＶＩ聽，就連我屋企人都唔知呢件事。

阿爸阿媽見到阿叔同我打招呼，就話：「快Ｄ叫人啦，唔可以無禮貌。」

「……叔叔。」我回應。



「乖～～～」阿叔望住我，打量緊我。

好厭死！好想逃避佢呢個目光！ＶＩＶＩ好似見到我反應，佢行到我前面擋住我，然後話：「我地返房做功課先。」

返到入房，我問：「做功課？平時都唔會見妳咁講。」我講笑咁問。

然後ＶＩＶＩ就答：「功課緊係唔做啦，我係唔想比果條仆街一直望妳，妳都見佢個樣成個變態佬咁。」

我聽到後笑左笑，第一係笑因為我地兩個都係Ｄ成績差嘅學生，唔會做功課考試測驗又差果種，第二係笑……ＶＩＶＩ關心我，呢個笑係甜笑黎。



ＶＩＶＩ訓左係我張床上面，我都訓左係佢旁邊，然後話：「都唔知佢今次黎做咩。」

而ＶＩＶＩ就回應：「如果佢打妳主意，我實剪左佢。」

「係真唔係啊。」我笑住話。

「就算唔剪左佢，我用針灸Ｄ針，針到佢性無能。」ＶＩＶＩ話。

－－－－－短期返回現時－－－－－

「下？針到性無能？」我聽到小雨咁講後，望一望下面問佢地。

而ＶＩＶＩ同小雨笑左笑後，ＶＩＶＩ話：「果次針你後，你唔會性無能左掛。」

我無奈笑左幾聲後，小雨就繼續。



－－－－－又變返小雨回憶－－－－－

當晚ＶＩＶＩ走左後，阿叔留左係度食飯，食飯果陣，阿爸就話：「希望小雨跟你去香港後，讀書會好Ｄ啦。」

我聽到後就問：「咩返香港啊？」

阿媽就話：「我地見妳咁鍾意香港，所以想送妳去香港讀書，而且妳細過果陣係香港生活過，香港出世，又住夠７年，一直都有香港身份證，係我地無話妳知姐。」

「下！？我有香港身份證？」我問。

「有啊，所以其實一早都想送妳去香港讀書，但先前屋企經濟差先無咁做，而家好返少少，所以想送你去香港。」阿爸話。

我聽到呢個消息後，好開心，因為一黎可以去香港，二黎如果ＶＩＶＩ返左廣東，我係香港的話，我地見嘅機會就會大好多，一陣我一定要話比ＶＩＶＩ聽。



而我好開心咁問：「咁我去到香港，住邊啊？」

而阿爸阿媽就話：「去阿叔度住囉。」

我聽完後，望住呢個阿叔，我見到佢笑，但我覺得佢呢個笑容後係充滿住邪惡嘅味度。