[絕對無糖分]就係咁，我搬左入一幢充滿一樓一嘅唐樓: １１３　我見猶憐

－－－－－ＶＩＶＩ回憶第一人稱－－－－－

如果，真係有一個人能夠再次拯救一個人嘅人生的話，我諗，就係佢。

從少就比人拋黎拋去嘅我，都唔知有一個安穩嘅家係咩野感覺，陪住我嘅係一首首鍾意聽嘅歌，同埋我死左嘅阿爸留比我嘅中醫學識。

不停比親戚踢黎踢去嘅我，講真，一開始係有Ｄ唔開心，但係慢慢就習慣左……可能係認命掛，慣左自己一個人生活，好耐都無識個朋友，甚至，開始只同自己做朋友。

今年，我比親戚拋左去台灣，佢亦都用某Ｄ手段幫我入讀一間學校，第一日返學，其實對我無咩特別，因為已經習慣左呢Ｄ生活。



但係，今次唔同……面對住陌生環境，面對住各式各樣嘅人講住同一樣語言……

「死啦，第一日返學就遲到。」

咦？點解呢度會有人講廣東話嘅？

我望住聲音嘅來源地，只係見到一個女生背影跑緊，而且跑得愈黎愈遠。

唔知，佢係Ｄ咩野人呢？我腦入面不停諗，好耐都無呢一種咁想識人嘅感覺，但唔知會唔會係學校遇到呢個人。



呢個諗法直到我地集隊……咦？做咩企我前面果個女仔，開始搖搖欲墜咁嘅，仲……仲暈左添！

好彩我身手快，扶住左佢……「老師！這位同學暈倒了！」我同附近嘅老師講，而個老師見到，就話：「妳與我一起扶她去保健室吧。」

我同老師扶左佢去保健室後，老師就叫我睇住佢，然後保健室就剩返我地兩個，我望一望呢個女仔，見佢身形同髮型，都好似我今早見到果個女仔咁，唔通……

等左一陣，見佢好似訓著左，而我又開始悶，所以唱起自己鍾意嘅歌，我特別鍾意王菲，而佢其中一首歌我係特別鍾意。

徘徊在似苦又甜之間 望不穿這曖昧的眼
愛或情借來填一晚 終須都歸還 無謂多貪


猶疑在似即若離之間 望不穿這曖昧的眼

呢首歌，叫做暖昧。

唱唱下，我發覺得身後面有人望住我，「似是濃……咦，妳醒了？」我國語問佢。

我望住呢個女仔，頭先訓左唔係點見到佢對眼，但而家見到，先發現佢對眼好靚，係果陣我見猶憐果種感覺嘅眼。

佢個女仔就問：「妳識唱廣東話歌㗎？」

佢都講廣東話？而且同我今日遇到果個女仔把聲一樣，我諗，眼前嘅呢個人就係今早果個女。

「咦，妳識講廣東話㗎？我係廣東黎台灣，除左屋企人外，好耐都無聽人講廣東話，係呢，妳又會無啦啦暈左嘅？」我問。

而佢吱唔咁答我：「……平時……我都係咁。」



我見佢答得咁怕羞咁，笑左笑話：「唔緊要！妳黎我屋企開嘅中醫度，我幫妳針一針。」

而佢好似嚇左一跳回應：「下！？針一針？」

我笑住話：「我意思係針灸，放心，唔好睇我咁細，我好專業。」

「係呢，妳叫咩名啊？」我問佢。

「我、我叫小雨。」佢答。

「小雨，個名好好聽啊，我叫ＶＩＶＩ，妳以後咁叫我就得㗎拿。」我介紹完自己後，就坐到佢身邊話。：「仲有無暈啊妳？」然後用手幫佢探熱，但我見到佢塊面……仲紅過頭先。

我地嘅友情就係咁樣開始左，又或者，唔止係友誼。