[絕對無糖分]就係咁，我搬左入一幢充滿一樓一嘅唐樓: ８５　阿伯的凝視

要搵功德前，仲要搵左陣寒意添？

點搵啊，我覺得兩樣都好難搵囉，而且陣寒意都係上次送完阿ＫＩＮＧ後，係我背後出現，唔通你以為好似開一開冷氣就搵到咁簡單咩。

又係果種頭痛……係啊，我煩到個陰陽怪好早咁打左我出黎，個頭一邊痛，一邊望住個天花板。

我一醒，腦入面就係頭先果堆意法，無啦啦又要我搵咩鬼寒意，點解難度又愈黎愈高，諗諗下就訓著左，直到第二朝早……

我如常著係工作嘅衫落街，一落到街，就感受到有人望住我咁。



唔通，係陰陽怪所講嘅寒意。

我急步咁趕路，而當我行得愈快，果陣比人望住嘅感覺就愈大，直到，係一個轉角位，我撞到阿ＫＩＮＧ。

「喂，咁岩啊蕃薯。」同阿ＫＩＮＧ　ＦＲＩＥＮＤ左後，佢對我打招呼嘅方式都唔同左。

而當我見到阿ＫＩＮＧ果一刻後，果種比人望住嘅感覺又突然消失。

呢種感覺我而家再回想返，就係果種寒意。



我望住眼前嘅阿ＫＩＮＧ，唔通呢種寒意，只要佢出現就會唔見左，而佢唔出現果陣，就會跟住我？

原來，要搵其實真係可以好簡單，唔駛我主動搵，而係佢自己主動搵上門。

我望一望身後面，但係比阿ＫＩＮＧ叫返轉頭，「喂，未兩頭望啦，今日我下午唔得閒，可唔可以幫我頂埋果更啊。」

我聽到後話：「你條友唔係去叫雞掛……」

「傻啦，我約左人咋，我又唔識預知性上癮，點會知自己下更要叫雞姐。」阿ＫＩＮＧ話。



然後我打量左阿ＫＩＮＧ一陣後就話：「好……鬼叫我有痛腳係你手上咩。」

「你知道就最好啦。」阿ＫＩＮＧ話：「我終於知點解小春同你咁好兄弟，就係因為你抵得諗，夠義氣。」

係咩……點解我覺得佢似話緊我蠢咁嘅。

而當阿ＫＩＮＧ聽到我答應佢後，佢就走左，而果種比人望住好心寒嘅感覺又出現，我回頭一望……係一個上左年紀嘅阿伯。