[絕對無糖分]就係咁，我搬左入一幢充滿一樓一嘅唐樓: ８３　邊有咁多神神怪怪

我係龍威哥間房入面，望住顯示所有閉路嘅顯示屏，留意嘅只有一個人……ＶＩＶＩ。

同佢有無關嘅呢？

但其實陰陽怪講過，佢嘅出現係關係阿媽拜神事㗎ＷＯ。

但果晚又係佢針完我之後先見到陰陽怪……

但神仙應該唔會講大話……唔係，其實個陰陽怪睇落都唔似神仙，都唔知佢有無呃我……



死！？如果佢唔係神仙，咁我而家個處境未好危險囉！！！！！！

突然，龍威哥入左黎，「黎左啊，搵我？」

「係啊，見悶又無野做，所以搵你吹水。」我是但搵左個借口講。

而龍威哥笑左笑後話：「係真唔係啊，你平時悶就去訓覺㗎啦，點會搵我傾計，實有事。」

龍威哥果然見慣世面，觀人於眉。



佢坐左過我旁邊，「點啊，係未有咩心事要講啊，唔搵你舅父？」

「佢去左打牌，邊得閒理我。」我話：「係呢，龍威哥啊，你同ＶＩＶＩ姐熟唔熟㗎？」

龍威左聽到後話：「話熟就唔算熟，有兩句計傾下咁囉，做咩啊？」

「無啊，我記得臨入黎住果晚，有個姐姐幫我處理……處理下體，想搞清楚係未ＶＩＶＩ姐。」其實我知係佢，只係想慢慢問到我想問嘅野……

「你有無印象個姐姐同你做過咩？」龍威問。



「我醒返見到佢幫我上面針灸咁囉。」我答。

「咁應該係ＶＩＶＩ，因為呢幢野，係得佢一個姐姐識針灸，唔好聽佢做雞啊，佢中醫好勁㗎，話係家族相傳，只係因為某Ｄ事，令到佢比阿爸趕左出門，無奈黎到香港，又無文憑認可開唔到中醫店，先迫住做雞咋。」龍威話。

喔……原來ＶＩＶＩ姐有段咁嘅經歷，我真係唔知。

「咁……佢除左針灸，仲有無識Ｄ邪術啊？」我問。

「下？做咩無啦啦咁問。」龍威哥話。

「因為果晚比ＶＩＶＩ姐針完後，我呢……見到呢……」好唔好講有陰陽怪Ｄ野比佢聽呢？

「你撞野？」龍威問。

「……係、係啊。」咦？咁而家係未唔駛講陰陽怪Ｄ野？



「你未傻啦，邊有咁多神神怪怪，而且ＶＩＶＩ係度做左咁耐，都未見過求神拜佛，邪術一定唔識啦。」龍威哥好肯定咁話。

「明白。」咩野邊有咁多神神怪怪，係你面前，我個身入面，就有隻陰陽怪……

唔得，好似咩都問唔到咁，今晚希望入到夢問下陰陽怪先得。