[絕對無糖分]就係咁，我搬左入一幢充滿一樓一嘅唐樓: ６６　男神往事

男神ＫＩＮＧ果然係男神ＫＩＮＧ，講野直接了當快人快語，我望坐眼前已經判若兩人嘅男神ＫＩＮＧ，講出我同小春點解會係果幢充滿一樓一嘅樓下，而男神ＫＩＮＧ聽到後，沉思左一下話：「信你。」

得到佢嘅相信後，我就同佢講：「你可唔可以唔好同其他同事講，係住果Ｄ地方？」其實問完呢個問題後，我都有少少矛盾，自己唔戴口罩落街係因為自己話唔怕比人知，但而家又怕比同事知道我住呢Ｄ地方……唔知係人本身就矛盾，定係我心理上仲未習慣比人知道我知呢Ｄ地方。

男神ＫＩＮＧ佢望住我地兩個，然後問：「咁你地今日有無講我Ｄ野比其他同事聽？」

我同小春同時搖頭。

「咁樣而家大家都有把柄係手，契約成立，只要你地唔講，我都唔會話比其他人知。」男神ＫＩＮＧ講完後，個身坐直眼定定望住我地。



而小春問佢：「望咩？」

「你地對我今日同你講嘅野，同埋我個陣嘅狀態，無野問咩？」佢話。

佢平時就係咁，好似料事如神，知道每個人內心想法，有時真係好佩服佢可以有咁嘅才能，但有時又會好討厭。

討厭，係因為佢總係一副高高在上，一副要支配萬民嘅樣。

但係，呢個諗法可能得我係咁諗，因為小春好似無咩呢種諗法，即刻問左好多問題：「你成日要造愛㗎？造愛造到好似吸毒咁？造唔到愛會好焦慮？每次造愛時間幾長？你成日要造愛咁每月駛費會唔會好貴？」



……阿小春哥，你句句問題都有「造愛」呢兩個字，同每句都有粗口係未同樣道理？

男神ＫＩＮＧ聽到小春一連串嘅問題，慢條斯理咁答：「係，我成日都要造愛。造唔到愛唔可以話好似吸毒咁，但又真係有少少似吸毒，成日想造。造唔到愛係會有少少焦慮，會成日好想快Ｄ造愛。時間其實因人而異，我通常１５－２０分鐘左右。無錯！用左好多錢！」

其實聽完佢地對答後，我都唔知聽到Ｄ咩，小春Ｄ問題無咩養份，就算男神ＫＩＮＧ好認真答，聽完個答案都好似無咩得著。

……算啦，都係我問啦。

「咁其實你要造咁多愛，咁同濫交有咩分別？」我問。



而男神ＫＩＮＧ好無奈咁笑左一下話：「好大分別，濫交係因為佢地主動想享受性，而我係性上癮，係被迫做性嘅奴隸。」

小春一聽到後就話：「姐係性奴！？」

我同男神ＫＩＮＧ望一望小春後都反左下白眼，而男神ＫＩＮＧ就又再強調：「係性嘅奴隸，唔係性奴。」

「係囉，咁姐係性奴囉。」小春再答。

……無言……唔想再浪費時間同佢解話。

而我又問：「你講到咁，姐係你就算去造愛，都唔會有高潮同快感？」

男神ＫＩＮＧ聽到我咁答後，搖一搖頭話：「係會有高潮同快感，但係完事後，我唔會感到快樂，我只會感到自責……」

「自責？」我同小春異口同聲話，然後小春又接住講：「都係，每次叫完雞我都會好自責。」



「你都會自責？」我問，而男神ＫＩＮＧ都用左個疑惑嘅目光望住佢，就好似想問佢，你自責Ｄ咩啊？

小春一臉嘅內疚話：「我自責點解自己唔試其他ＰＬＡＮ……」

頂……我做咩要咁認真問佢……

男神ＫＩＮＧ聽完後，都無奈左一下，而我又再問：「咁你自責Ｄ咩？」

而佢就答：「我自責……點解我會不停想造愛？我係未一個變態？我係未一個咸濕佬？如果我有女朋友仲咁做，未好仆街？我結左婚以後會唔會成日出軌㗎？我會唔會……」男神ＫＩＮＧ愈講，就慢慢變成今日晏就見到嘅佢。

我同小春見到佢咁，都叫佢冷靜Ｄ，然後我問：「你點解會有性上癮㗎？」

而男神ＫＩＮＧ又嘆一嘆氣話：「咁就要講返一件我從來都唔想提起嘅事……」