[絕對無糖分]就係咁，我搬左入一幢充滿一樓一嘅唐樓: ６４　見步行步

性上癮，呢個詞語對我黎講真係好新鮮，以前聽就聽得多，但係真係無深入了解過咩係性上癮。我同小春聽到男神ＫＩＮＧ講佢有性上癮後，一開始係Ｏ咀，然後靜靜咁望住男神ＫＩＮＧ，見到佢塊面開始好緊張，然後四圍望咁，我仲見到佢隻手開始震……

「你無事嘛？」我問。

然後男神ＫＩＮＧ用一個好突然嘅眼神望住我，「無事……無事……我無事㗎我，我係手震咋，我唔係想搞野，唔係……唔係……唔係……」佢不停講，仲開始抱住自己個頭。

「唔係ＷＯ，你真係好似有Ｄ野ＷＯ。」小春追問。

「係啊！！！我唔係鹹濕啊！我唔係變態啊！我唔係啊……我唔想㗎……」本來好激動嘅佢，又無啦啦開始抱頭，好似自責咁。



我同小春見到佢咁，又對望左一下，又一輪眼神殺。

小春：喂，佢好似上身咁ＷＯ。
我：係囉，駛唔駛幫佢叫白車啊。
小春：我諗佢而家唔係要叫白車，似要叫雞多Ｄ。
我：……
小春：就夠鐘返工，快Ｄ完場啦。

正當我想講野之際，男神ＫＩＮＧ原來一直望住我同小春眼神殺……



「你地頭先交流緊Ｄ咩！係未覺得我好怪！係未覺得我係個變態！」佢好激動咁同我地講。

而我就話：「……唔係啊，我地只係講緊，就夠鐘返工，驚比賤輝鬧姐。」

男神ＫＩＮＧ聽到我咁話後就冷靜左落黎，「返工……返工……又係嘅，我見到你地更表就快要返去，咁我唔阻你地先……」我地慢慢起身走人，但係佢又突然叫停左我地兩個：「你地記住唔好同其他人講啊！」佢捉實我地隻手，捉得好實好實。

「……知道。」我同小春點一點頭後，佢先放開手，然後好急咁跑出茶記。

我同小春又對望左下……



「可唔可以同我講，我頭先睇緊Ｄ咩？」我問，因為我真係未見過男神ＫＩＮＧ有咁嘅行為。

「係囉，平時男神ＫＩＮＧ有型有款咁，點會好似頭先咁跳，咁頹㗎。」小春話，然後佢望一望頭先我地食嘅野，「頂，佢未比錢ＷＯ。」

「……唔緊要啦，我比啦。」其實而家比唔比錢唔係重點，而係男神ＫＩＮＧ佢叫我地唔好話比其他人聽佢有性上癮，但我唔記得叫佢唔好講比其他人聽，我地住果度有好多一樓一！？

但而家可以點，我地都只可以先返工，見步行步。