[絕對無糖分]就係咁，我搬左入一幢充滿一樓一嘅唐樓: ６３　性上癮

仆街……又會咁好彩一轉唔戴口罩落樓就撞到自己同事……

「係呢，男神ＫＩＮＧ你頭先做咩係我地住嘅樓下嘅？」「你地住嘅樓下……？」

死啦，唔知佢點諗我地呢？佢會唔會以為我同小春一齊黎叫雞㗎！？

「係啊，都住左一陣㗎嗱，你呢？你黎果度係未幫襯啊？」

大鑊！唔知佢會唔會爆響口呢！？……等等，我今早就話要做返真正嘅自己，我係唔可以咁矛盾㗎！！！……但我又真係仲好驚Ｄ同事知道我住呢Ｄ地方，點算呢……



我地三個其實已經轉左地方，係一間茶記入面食緊野，而我地三個之中，得小春一個好似無發生咩事咁正正常常食緊個常餐，我同男神ＫＩＮＧ都尷尬同驚有Ｄ咩事穿煲咁。

最後，就係小春一直講緊笑嘅途中，我先出聲：「男神ＫＩＮＧ，你可唔可以……」「你地可唔可以唔好話比人知我黎呢Ｄ地方啊！！！」

咦……呢句說話雖然唔係我心目中想講嘅野，但係意思同我想講果句差唔多，而且係出自男神ＫＩＮＧ把口。

唔通……

「男神ＫＩＮＧ你真係去幫襯啊，識野ＷＯ，果邊Ｄ囡囡好得㗎，低層有兩個好介紹，三樓嘅ＹＵＫＯ樣靚身材正，四樓彩虹勁似某名知名ＡＶ女優，中層就有按摩出色嘅ＶＩＶＩ，旁邊有鄰家女孩小雨，高層都好正㗎，３８Ｇ白滑大乳牛莉莉，鍾意玩ＣＯＳＰＬＡＹ嘅姊妹花ＹＯＹＯ同ＣＯＣＯ，呢幾個真係物超所值啊，你話佢地聽識我，有……」



小春一大輪嘅介紹，我同男神ＫＩＮＧ都聽唔入耳，我只係驚訝比人視為男神嘅阿ＫＩＮＧ，以佢尊容同性格實溝女無數，用得著去叫雞麼！？

我問佢：「你……你真係去果度叫雞？」

而佢，先用一個好似比大人捉到做錯事嘅小朋友眼神望一望我，然後不停點頭。

佢呢個動作，仲震憾過聽佢用把口講「我去叫雞」呢幾隻字。

咩話！？一個咁有型嘅靚仔都要去叫雞！咁我呢Ｄ死毒撚點算好啊！？



而小春同我嘅心情就好唔一樣，佢好似發現知音人咁話：「估唔到係到道中人。」

男神ＫＩＮＧ聽到小春呢個說話後，又一個極其驚訝嘅表情望住小春，「你……你都係咩？」佢問。

而小春就好得戚咁話：「當然啦，仲好有經驗添。」

小春，呢Ｄ事都可以神氣……咁又係，呢種事如果唔係對住同道中人，係難Ｄ神氣嘅。

男神ＫＩＮＧ聽到小春咁講，就好激動咁雙手捉實小春隻手……又唔駛咁相逢恨晚掛……然後男神ＫＩＮＧ問左一個問題：「小春你講到你咁有經驗，可唔可以分享下點樣應付啊？」

小春又一臉得戚話：「都可以分享下嘅，每位囡囡都唔同，要應付真係有排講。」

「下？」男神ＫＩＮＧ疑惑左一下問：「每個囡囡……呢個病同每個囡囡都有唔同關係㗎？」

等等……病？



我同小春對視左一下，然後我問：「男神ＫＩＮＧ，咩野病？」

男神ＫＩＮＧ四處望左一下，然後裝出一副冷靜但睇得出佢好尷尬咁話：「性上癮囉，小春又話佢好有經驗嘅。」

下！？男神ＫＩＮＧ有性上癮！？