[絕對無糖分]就係咁，我搬左入一幢充滿一樓一嘅唐樓: ６２　男神ＫＩＮＧ

收返埋張ＳＤ卡，推走埋小春後，我就返去張床趴住……因為比個陰陽怪爆菊果下仲痛緊。今日晏就先返工，應該咁個姿勢訓多陣。

但其實，我都只係閉目養神，因為ＹＯＹＯ佢地三個尋日同我講嘅野，我到而家仲好深刻……我諗緊，其實我而家做緊呢份工，係未我最想做嘅野，定係，我只係求其搵一份工搵錢。

我咁大個人，其實真係無諗過自己要做Ｄ咩偉大野，自己工作更加無，只係想平平穩穩咁搵份工，養到自己就算，但尋日嘅資訊，我先知係呢個社會入面，有好多人都為左生活做緊好多自己唔想面對，又或者係自己本身無諗過會做嘅事。

有邊個唔想假日出街同朋友玩，而唔係著到成身裝備雞蛋對高牆。

有邊個唔想開開心心返學校吸收知識，而唔係比人用指定文字洗腦。



又有幾多個幾多，係我地已經迫不得以下要接受嘅事……

究竟，從新振作係幾時？

又究竟，我應該點樣面對以後嘅人生？

我就咁思考人生到晏就，咁就到返工嘅事間。

行到衣櫃度，拎起成日要著落街果套裝束……我係未仲要繼續咁樣做呢？我都係住係呢度，本身無做Ｄ咩錯事，點解我要偽裝？就算係做呢Ｄ野嘅人，都係因為佢地怕對家人及對自己安全有威脅先咁做。



佢地可以做有原因。

但我呢？

我將拎起手果頂帽放返入櫃，直接著起左返工果套衫。

望一望衣櫃塊鏡，笑左一下，我笑自己，以前做咩搞咁多無謂野呢，做返自己就得啦。

行出房，見到ＹＯＹＯ姐一身戰鬥服咁企係個櫃前飲緊杯水，佢望一望我，笑住問：「今日唔去打劫嗱？」



我傻笑左幾下話：「都係著到咁慣Ｄ。」

我地回心微笑左一下，兩個都知道呢兩句野背後嘅意思，當我臨走出門口果陣，佢話：「可兒話想再同你玩啊，幾時得閒啊？」

「我睇下咩時間得再話你知。」我答。

今日著返呢套ＫＦＣ工作服落樓，已經無左果種怕人地用奇怪目光望住我嘅感覺，因為，呢種感覺其實係自己帶比自己。

原來，當一個人諗通，做人真係自在好多。

「喂！死仔開工唔叫埋我？」小春係我身後面話：「咦，終於唔駛咁煩，換衫換黎換去啊？」

「死開啦，由今日開始，我要做返一個我自己認識嘅自己。」我答，然後同小春一齊落樓。

「咁就岩，遲下等哥哥帶你去開下眼界，呢排有幾個新場Ｄ囡真係好互架。」小春話。



「小春，你呢Ｄ興趣真係唔岩我啊。」我答佢。

「你住得咁近，試下無防啦。」小春話。

「你行開……啦。」我呢句講完後，比眼前個境像嚇左一跳。

點解？

因為……「喂！你未係男神ＫＩＮＧ！？」小春好大聲咁叫左出黎。

而我地三個而家身處，係我住緊果幢有好多一樓一嘅唐樓嘅樓下……