[絕對無糖分]就係咁，我搬左入一幢充滿一樓一嘅唐樓: ５６　我的志願

我的志願 李可兒

長大後，我要做一個與媽媽一樣的人，每天她都會幫我裝扮的美美的，不只是我，她也會把自己裝扮得美美的，而她，是一名美容師。雖然我沒有爸爸，媽媽也總是忙得不可開交，但她從會再我不高興的時候哄我笑，沒次我一哭，她就會幫我設計一個新髮形，就只有簡單的設計與辮子，也令我覺得驚嘆非常。我最記得的是媽媽送我的紫紅色蝴蝶結，紫紅色，真的很漂亮。所以我長大後，也要成為一個像媽媽這麼強大有用的人。

篇文睇落又真係好小學生作品，但睇得出可兒真係好愛ＣＯＣＯ呢位媽媽，不過頭先我睇到第一句果陣，真係嚇左一跳……

我要做一個與媽媽一樣的人……

姐係一樓一！？不過再睇落去先知原來講緊美容師。



「點啊，我個女係都要妳睇完之後，係篇野個分旁邊寫評語啊。」ＣＯＣＯ拎左支筆出黎比我，我接過左枝筆後，望一望分旁邊Ｄ字，原來ＣＯＣＯ、ＹＯＹＯ同ＹＵＫＯ都有寫佢地嘅評語。

而係旁邊個ＹＯＹＯ係呢個時候就問：「頭先見到你呆左呆，係未睇左頭一句嘅反應黎？」

咦！點解佢會知架！？我唔好意思咁點一點頭。

「唔駛唔好意思，我地三個睇到頭一句果陣，同你都有一樣反應。」ＹＯＹＯ講完後，拎左篇文睇左眼，然後又話：「佢果陣，好開心將篇文比我地睇，我地睇左之後都好感動，但係……」

ＹＯＹＯ慾言又止，而ＣＯＣＯ就緊接住話：「……但係我地一直呃緊佢。」



三個人由本身歡笑嘅臉，慢慢變成一種憂傷，而ＹＯＹＯ就話：「我的志願……我的志願……」佢講左呢幾個字幾次後，嗤笑左一下，「有幾多人到大過左之後，真係可以做到我的志願嘅野。」佢放低篇文，然後望住我問：「蕃薯呢，你細果個陣，作我的志願果陣係寫左Ｄ咩？」

突然比佢咁問，我真係一時反應唔到，但個腦又不停回想返細個果陣，當我要作我的志願果陣，我係寫左Ｄ咩落去？

警察？……有咩好做。

消防？真英雄，但又好似唔係寫呢個。

醫護？勇敢的前線，但我邊夠膽寫呢個。



我諗左好一陣，然後當我想講野果陣，ＹＯＹＯ姐又話：「你覺得我地三個我的志願又係咩？」

做咩ＹＯＹＯ今日咁多問題架……

但係佢呢條問題，原來係自問自答：「一樓一？有邊個我的志願係寫一樓一啊，無啊，點會寫呢Ｄ，做我地呢行嘅，有邊一個係自願，有邊一個係為興趣……係０啊。」

此時此刻，我只係靜靜咁望住佢地三個。

「我做呢行，係因為有個仆街老豆借左人好多錢，推左我出黎還，以前讀書幾好有咩用，條命生得唔好，一野就打殘你。」ＹＯＹＯ話。

然後，旁邊嘅ＣＯＣＯ跟住講：「我就係比個已婚男人呃左個人又呃晒Ｄ錢，為左養大個女先出黎做，好彩果陣遇到ＹＯＹＯ，先無過得咁辛苦，如果唔係，我一早自殺死左。」

ＹＵＫＯ倒抽一口涼氣後話：「我衰爛賭，衰賭癮大，有好多街數還唔到，比人追斬果陣，係得呢兩位姊妹救返我，得佢地兩個會係我身邊保護我，以前Ｄ朋友，一有事就唔知死撚晒去邊啦。」

三個講完後，又係一陣靜默……



「我地做一樓一，係因為生活上所迫，但我地無怪過生活，因為呢Ｄ係命。」ＹＯＹＯ講完後，笑左一聲，然後到ＣＯＣＯ笑，跟住到ＹＵＫＯ笑。

而我，望住佢地三個似笑非笑咁，個心有一種好痛嘅感覺。

「你記唔記得有次你落街果陣，我串你戴口罩果時講左一句：『我地做嘅出發點，同你出嘅出發點都唔同，你唔會明。』，你出發點，係唔想比人以為你剛剛叫完雞，而我地戴口罩嘅原因，係唔想比人知道我地係做雞，你係為左保存自己顏面，我地唔單止係咁，保護嘅仲有我地背後想保護嘅野。」ＹＯＹＯ講完後，就將篇作文比返ＣＯＣＯ。

我聽到佢咁講後，深呼吸左一口，因為真係比佢講中，我日日落樓著到成個賊咁，就係因為驚比人以為我去叫雞，只係為左自己顏面，但頭先聽完ＹＯＹＯ所講，先發覺我以前真係無諗得咁細心，如果佢地唔戴口罩，比人知道佢地做雞果陣，影響嘅唔止係佢，仲有佢地身邊嘅人。

所以，佢地為左保護自己背後嘅野，究竟付出緊幾大代價？