[絕對無糖分]就係咁，我搬左入一幢充滿一樓一嘅唐樓: ５５　返去ＹＯＹＯ度

同澧琳返屋企嘅路上，「妳而家返去，會唔會又見到阿爸同阿媽吵架？」我問佢，而佢就望一望電話個時間後話：「呢個鐘數，阿爸應該返左工，得返我同阿媽兩個，所以好安全。」

如果返屋企要因為另一個人唔係度先覺得安全，呢個家仲係未一個家？

經過屋苑入口，今朝個保安仲未放工，佢用一個異樣目光望住我話：「呢位先生……又係妳朋友？」

點解佢要加個「又」字？

澧琳向個保安點一點頭後，我就跟住佢行入屋苑。



「真係估唔到你朋友就係住我果幢，如果唔係，就唔駛比你見到我喊。」澧琳有Ｄ唔好意思咁講。

「咁我要多謝我呢位朋友，因為可以係妳最需要人幫手嘅時候出現。」我答，然後澧琳望住我微笑左一下。

又係果一句。

「蕃薯，你真係好。」

唔知佢講呢一句果陣，係帶住咩心情講呢？



我特登話我朋友係高佢好幾層，咁樣我就唔駛驚佢知道，原來我所謂嘅朋友係住佢隔離。

「咁妳到左屋企ＭＳＧ話我知。」我話。

「知道。」澧琳點一點頭，而我，就望住澧琳，直到升降機門關閉。

我係樓下等左一陣，先再入另一部去同一樓層嘅升降機，出去果下我都驚比澧琳見到，所以好快就跑到ＹＯＹＯ屋企門口按下門鐘。

門開，見到嘅，係一臉怨氣嘅ＹＯＹＯ……



今次仆街了……

「又話黎幫我地搬野，但搬搬下去左溝女都有嘅。」ＹＯＹＯ姐話，頂！實係小春條友爆響口！

「唔關小春事，係我估嘅。」ＹＯＹＯ姐又話，佢點解估到我諗緊Ｄ咩架！？

然後，佢拎左一張紙條出黎，係寫有澧琳地址嘅紙條。

「原來你識得隔離果家人？」ＣＯＣＯ行左過黎問。

我吱唔左一下後答：「係，果個女仔係我同小春嘅同事。」

ＹＯＹＯ同ＣＯＣＯ用左個不軌眼神對望左下，然後異口同聲咁話：「實係果次果個女仔。」

然後，ＹＵＫＯ係間房到行左出黎：「仆你個街，搬搬下野走撚左去，想死啊你。」



我用左個好詫異嘅眼神望住ＹＵＫＯ，嘩！佢突然咁爛口，比可兒聽到點算啊。可能佢見到我個詫異樣，然後話：「你放心啦，可兒一早訓左啦，佢等你等Ｌ到訓左架。」

「等我？」我問。

「係啊，頭先你臨走前，佢話要比你睇佢果篇好高分嘅作文嘛。」ＹＯＹＯ話完後，ＣＯＣＯ就拎左篇文比我。

我網住篇作文，個作文題目係，我的志願。