[絕對無糖分]就係咁，我搬左入一幢充滿一樓一嘅唐樓: ５４　咁點好

我帶左澧琳某間樓上ＣＡＦＥ，一坐低我地就叫左Ｄ小食同野飲，平時都係放工後陪澧琳行下，今次真係第一次同澧琳係餐廳食野。

有少少緊張添，我望住澧琳，見到佢雖然無再喊，但係對眼都因為頭先喊過而有少少紅腫。

「我……我對眼係未好紅啊？」澧琳問。

「唔、唔係啊，不過望真Ｄ又真係有少少姐。」我答，好矛盾嘅回答。

死啦，同女神食飯唔好野ＤＥＡＤ　ＡＩＲ架ＷＯ，點算呢今次……



就係我諗到爆頭唔知講咩好之際，澧琳問我：「係呢，點解你會係我屋企後樓梯出現嘅？」

ＯＨ　ＳＨＩＴ！！！我仲未諗過點答澧琳呢個問題添，好唔好直接話比澧琳聽我幫朋友搬野呢，定係要諗個爛ＧＡＧ過骨呢？點算呢？點算呢？

好啦！是但講個爛ＧＡＧ啦！

「因為我永遠會係妳最需要我果陣出現。」我好深情咁講左呢句。

然後，澧琳望住我……係好冷靜咁望住我……



一秒。

兩秒。

三秒……頂……我講完之後自己都覺得好撚柒……

四圍嘅空氣好似柒完凝固晒一樣……

「都叫你唔好近小春咁多架啦。」澧琳一副責怪嘅語氣。



「唔好意思……」我唔知點解開始ＳＡＹ　緊ＳＯＲＲＹ。

「一定係佢教你講埋Ｄ咁嘅野架啦。」澧琳又話。

「係係係……」點解我會咁樣嘅呢。

我一副內疚咁望住澧琳，澧琳突然間笑左出黎，「哈～～～～你以後唔好咁講野，我頭先忍笑忍到我。」

下！？

「笑……笑返未幾好囉。」睇黎真係轉移到佢個問題ＷＯ。

就當我以為過到骨果陣，「你都未答我，你點解會出現。」澧琳用一個好利落嘅眼神望住我，然後拎起佢手旁邊支叉，指住我話：「係未跟蹤我？」

「無無無無無無無無！我點會咁樣做，我又唔係小春。」我話：「我只係有朋友住果度，幫佢搬野果陣咁岩係後樓梯聽到喊聲，然後咁岩又行去睇下發生咩事，最後未咁岩見到原來喊果個係妳囉。」



女人問話果陣，都係老實作答好Ｄ……

「真係？」澧琳問。

「真係！」我答。

佢疑惑左一下後，放低支叉，「好，信你。」

好彩……鬆返口氣，頭先真係嚇一嚇我，不過見澧琳笑返，咁就好。

Ｄ小食黎左後，我地邊食邊傾計，傾到一半我就問：「其實……妳頭先做咩喊？」

澧琳嘆左口氣話：「我阿爸阿媽吵架囉。」「我知啊。」仆街！口快快應左佢添。



「你點知架？」澧琳問。

屌！係囉，我點知架，未就係小春開架小型航拍機果陣見到，然後仲要話比我聽囉，但我無理由咁答澧琳架！又點好呢今次……

「無啊，妳頭先講，我就知左囉……唔好理我講咩，妳繼續啦。」我話。

好彩澧琳繼續講無追問我，「其實阿爸呢一排出面唔知識到Ｄ咩野人，搞到成日去賭錢，之後仲借左好多，時不時有人上門追數，本身我媽媽話一家人點都一定要幫，但係爸爸屢勸不改，前排我地收到其他住戶投訴，好彩媽媽求情，唔係我地差Ｄ連屋都無得住……頭先媽媽諗住再勸爸爸唔好痴埋果Ｄ人，但爸爸聽到後就好嬲，所以就嘈起上黎。」

講講下，澧琳又開始眼濕濕。

而我，可以做嘅就係遞左張紙巾比佢。

「所以，身邊朋友真係好重要。」我話，然後見到澧琳好似想喊咁，點好呢……有拿！

「所以我唔會痴小春咁埋架拿。」我出賣左個朋友，講左呢個即興笑話。



而澧琳笑左，「你地唔係兄弟咩？」

「又係ＷＯ，咁點好呢？」我扮晒低Ｂ仔咁問。

「緊係教返好佢啦。」澧琳笑住答。

「你又岩ＷＯ。」我都笑住回應澧琳。

好彩，澧琳笑返，但係佢嘅事又可以點樣幫佢呢？

就係呢個時候，我電話響左下，我見到係小春嘅ＭＳＧ。

小春：你去左邊啊？



咦！係ＷＯ！都出左黎一陣，要返去ＷＯ！