[絕對無糖分]就係咁，我搬左入一幢充滿一樓一嘅唐樓: ５２　幸福氛圍

「再過少少、再過少少……」

澧琳屋企真係有事發生，我可以做Ｄ咩幫佢呢？

「前少少添、前Ｄ啊！」

澧琳屋企究竟發生咩事呢，唔怪得佢呢排睇落真係唔開心咁啦……

「喂！蕃薯！比Ｄ力好唔好啊！」



我應該點做先可以幫到澧琳呢？

「澧琳！妳做咩係度啊！」

「澧琳！？係邊啊！？」我回返個神，見到我面前怒目望住我嘅小春……

「醒嗱你，搬完野先溫女好唔好啊！」小春話，然後我唔好意思地同佢ＳＡＹ左個ＳＯＲＲＹ。

而家嘅我，滿腦都係澧琳，仲有咩心情搬野，而係旁邊望住我地嘅ＹＯＹＯ同ＹＵＫＯ都用奇怪嘅目光望住我，而ＹＯＹＯ就問：「邊個澧琳啊？」



而ＹＵＫＯ好似聞到有八掛嘅味度咁，加把咀過黎話：「係囉，邊個澧琳姐？」

「……唔好咁八掛啦，搬野搬野。」我直接唔理佢地兩個話。

然而，ＹＯＹＯ同ＹＵＫＯ行到小春旁邊，撫摸住小春個心口，係佢耳邊吐氣般咁講：「小春～～～你都幫襯過我地幾次，想唔想試Ｄ新野姐～～～」

下！？幫襯過幾次！？

「係囉～～～想試新野就講比我地聽，不另收費架～～～」ＹＵＫＯ撩客把聲真係同佢平時好唔同……



「喂，妳地係可兒面前唔好咁好唔好啊。」我話，而我望一望四圍……ＣＯＣＯ同可兒呢？

「ＣＯＣＯ同可兒入左房架嗱，唔駛驚，小春哥～～～」就係ＹＯＹＯ同ＹＵＫＯ嘅夾攻下，小春做左二五仔……

「原來我地蕃薯哥都有女神嘅，唔怪得對我地無興趣啦。」ＹＵＫＯ笑住話。

「係囉，鍾意到搬住琴都要諗起女神，做咩啊，女神都彈琴架。」ＹＯＹＯ講笑咁講。

頂……小春呢條友有異性就無人性，不過都好彩佢無講澧琳就住隔離，如果唔係就大件事。

琴搬好後，「可兒！快Ｄ出黎睇下部琴啦！搬好嗱！」

聽到一連串嘅腳步聲後，見到可兒好開心咁望住部琴，「好耶！！！」

其實，開心好簡單，但係創造開心嘅大人背後負出左嘅努力，有幾多人會知。只不過，當大人見到小朋友面上歡笑嘅笑容，一切嘅努力，都係值得。



我望住ＹＯＹＯ、ＹＵＫＯ同ＣＯＣＯ，佢地臉上面嘅喜悅唔會比可兒少，能夠比到別人幸福，係比得到幸福嘅人更幸福。

「蕃薯哥哥！」可兒好開心咁跑過黎抱住我話：「多謝！」

我笑左笑，然後指一指旁邊個小春：「小春哥哥都有份幫手架。」

可兒笑得好開心咁對住小春講：「多謝小春哥哥。」

「唔駛客氣！」小春又比左個禮，但係，今次可兒笑得好開心，然後可兒無啦啦望住我講：「蕃薯哥哥！我上次考試作文拎左好高分啊！一陣拎比你睇！」

我疑惑地望一望ＣＯＣＯ，而ＣＯＣＯ就話：「個傻妹第一次拎到咁高分，一見到自己熟嘅人就要拎比人睇，睇黎我個女好鍾意你咁ＷＯ。」

我傻笑左下，然後放低可兒，可兒就好怕羞咁跑返去ＣＯＣＯ度。



我同小春係旁邊睇住四個女性嘅温馨氛圍，小春就話：「我真係第一次唔係一樓一見到佢地咁，真係好唔同。」

「係。」我答。

「等我以後要幫襯多Ｄ，比多Ｄ家用佢地先得。」小春話……我聽完佢呢個回答後真係無語，係未一定要咁幫呢……

我唔阻礙佢地慢慢温馨，幫佢地執好Ｄ紙皮然後扔出去出面，行到後樓梯，我聽到有人係度喊……我放低紙皮，推開門，見到一個熟識身影抱膝啜泣……

「澧琳？」我企係澧琳身後問。

而佢，就好詫異咁回頭望住我：「蕃薯！？點解你……」