[絕對無糖分]就係咁，我搬左入一幢充滿一樓一嘅唐樓: ５１　隔離吵架

「蕃薯哥哥你望咩野啊？」可兒問，然後果三位女士都望左過黎，我嚇一嚇成個人企得直一直，然後話：「無啊，想睇下妳屋企可唔可以望到……望到……望到個球場姐，原來真係可以望到架。」我求其作左個借口出黎。

「望到架？係邊個球場啊？」可兒好開心咁跑左過黎問我，然後我就指一指我見到個球場比佢睇。

「呢個球場，媽媽同姨姨佢地成日帶我落去玩架！」可兒好開心咁話。

「妳個衰妹又話我地係姨姨……」ＹＵＫＯ同ＹＯＹＯ慢慢接近可兒身後，想唧佢咁，而可兒呢個時候就跑到我身後面話：「蕃薯哥哥救我啊！」當然，佢係笑住咁話。

但我而家比較在意嘅，係小春唔知搞咩呢？



就係呢個時候，鄰居傳出一陣又一陣打鬧聲……

仆街……唔通係小春搞出黎！？

而可兒一聽到，就好用力咁攬住我隻腳，ＹＯＹＯ就話：「隔離又開始吵……」

聽到呢度，我先係放下心頭大石，因為唔係小春搞出黎，但係再諗返ＹＯＹＯ所講嘅野，點解會加個「又」字？

「隔離？成日吵架？」我問。



而可兒亦都係呢個時候跑返去ＣＯＣＯ度，ＹＯＹＯ同ＹＵＫＯ就嘆左嘆口氣話：「最近嘅事囉……」

「最近？」我問。

然後ＹＵＫＯ就接住講：「聽聞係個男屋主比個老千呃左錢，搞到好嚴重，又比人淋紅油又貼街貼，已經比呢度Ｄ住客投訴過架拿，所以下面Ｄ保安而家都嚴左好多。」

「係啊，有次嚇到可兒晚晚都要ＦＡＣＥＴＩＭＥ陪佢傾計先唔喊。」ＹＯＹＯ話。

下！？我心入面好冷靜咁諗一諗……如果方位無錯，隔離係澧琳屋企黎架ＷＯ！？咁姐係澧琳屋企真係出左事！？



而小春係呢個時候係廁所出左黎，佢行到我旁邊，好細聲咁講：「偷聽器裝左，我同先仲見到Ｄ野。」

我聽到後個腦實晒，成個身麻晒，我問小春：「係咩野？」

佢就係我耳邊講：「我見到一個男人同一個女人係度吵，而另外有一個女仔係度，我認得出係澧琳，佢見到果一男一女係度吵後，就喊住跑左入房。」

「然後呢！？」我問。

而小春答：「然後我淆底，放低左個偷聽器後就謠控返架野返黎。」

……頂……想知澧琳跑返入房後點添。