[絕對無糖分]就係咁，我搬左入一幢充滿一樓一嘅唐樓: ４９　可兒

去到ＹＯＹＯ個單位前面，我好緊張咁四圍望，咩事？緊係搵澧琳個單位係邊啦，我見到原來係對面單位咋！

我同小春互望左一下……

小春：放心，一陣交比我。
我：你係未真係得架……
小春：信我，我做野幾時有令你膽心過呢！
我：次次都唔放心囉……

「你地係度眼神交流緊Ｄ咩啊？」ＹＯＹＯ用一個懷疑嘅眼神望住我地兩個。



「無、無啊。」我話。

「你地兩個一陣入到去未咁怪啊，ＣＯＣＯ個女仲細唔好嚇親佢，由其是係你啊小春，你今日著到咁怪。」ＹＯＹＯ話。

「知道！」小春，剛剛先叫你唔好咁怪，你就唔好比禮同大叫啦。

然後，ＹＯＹＯ揚一揚手叫我地兩個湊埋Ｄ，佢就輕聲咁講：「而且唔好同ＣＯＣＯ個女講我地出黎做啊，ＣＯＣＯ個女唔知架，佢以為媽媽係做美容，我就係ＣＯＣＯ老闆，ＹＵＫＯ係幫我做投資嘅顧問，一陣你地自己識做啦。」

聽完之後，我地點一點頭。



又係嘅，做一樓一呢份職業又真係唔好比自己仔女知道會好Ｄ。

ＣＯＣＯ拎左門匙出黎開門，「入黎啦，唔好企係度嗱。」

行入去，望一望四圍……嘩，仲大過我自己屋企，再望一望呢度Ｄ擺設都係好居家感覺，一系列木色家具、白色沙發、開放式廚房入面有好齊全嘅煮食用具，旁邊個飯枱都好乾淨。

「你地終於到嗱？」ＹＵＫＯ係其中一間房行左出黎。

「係啊，佢地終於到，我個女呢？」ＣＯＣＯ問。



ＹＵＫＯ話：「佢話要自己換衫ＷＯ，我未出黎睇下一陣有咩要搬囉。」

「咁妳指揮佢地做野得架嗱，我入去睇下個女先。」ＣＯＣＯ講完後就行左入間房，我企係呢度望向果間房嘅門口，見到入面Ｄ燈光似曾相識咁。

而ＹＵＫＯ呢個時候行到我同小春旁邊，好細聲咁講：「係ＣＯＣＯ個女面前，唔撚好咁古怪啊。」

我點左點頭，然後講笑咁話：「咁妳都唔好講咁多粗口啊。」

「想死啊你。」ＹＵＫＯ笑住打左我一下。

而過左一陣，ＣＯＣＯ就拖住佢個女出黎，「快Ｄ叫哥哥啦。」佢個女望一望我地，然後匿左係ＣＯＣＯ身後好細聲咁講：「……哥哥。」

ＣＯＣＯ個女睇落應該係小學一兩年級左右，同ＣＯＣＯ好似樣，而且好得意。



「唔駛驚ＷＯ，兩位哥哥好好人架……雖然其中一個有Ｄ怪，呢個係小春，而呢個係蕃薯。」ＣＯＣＯ介紹我地兩個比佢個女識，而佢個女一聽到我個名後就笑住話：「叫蕃薯好搞笑啊。」

……其實佢唔係第一個人咁講我個名，好多人第一次聽到我個名都咁講。

見到ＣＯＣＯ介紹，我都同ＣＯＣＯ個女打聲招呼：「係啊，哥哥個名係有少少搞笑，咁妳叫咩名啊？」

見到佢又好怕羞咁匿左係ＣＯＣＯ後面，然後面紅紅咁話：「我叫……可兒。」