[絕對無糖分]就係咁，我搬左入一幢充滿一樓一嘅唐樓: ４７　呢度係……

時間真係過得好快，好快就去到星期日早上，我同小春上左果架去緊ＹＯＹＯ姐個地址……講真，我呢一刻真係唔想企係佢旁邊。

姐係佢話幫我，我真係好感激佢，但佢唔駛著到成個特種部隊咁掛……

「媽媽，叔叔係未去打杖啊？」頂，坐係對面個細路仔咁問添，好老尷啊。

「唔好亂咁講野，點會有杖打呢。」個阿媽話。

「咁點解叔叔著到咁嘅？」個小朋友用一個好天真嘅眼神望住小春，然後小春慢慢湊近個頭去個小朋友面前，然後話：「我係哥哥，唔係叔叔啊小朋友。」



阿春哥……你會唔會錯左重點呢……

然後個小朋友望一望我，「哥哥，你爸爸同你一樣大？」

ＷＨＡＴ！？我同小春點睇都唔係父子啦！！！

我仲見到個小朋友阿媽係度忍笑啊！！！

頂……同小春出街真失禮……



最後我係眾人尷尬目光下去到ＹＯＹＯ屋苑附近，一去到後……「蕃薯，你有無睇錯地址？」

「我都係諗緊你而家諗緊嘅野……」我答。

「你會唔會再睇一睇個地址有無錯？」小春又問。

我拎左ＹＯＹＯ姐個地址出黎，再對一對……無錯ＷＯ，真係呢度ＷＯ。

「兩位先生，唔係呢度住客唔可以入黎架ＷＯ。」呢個警衛講野駛唔駛咁直接啊。



小春聽到後，就話：「我地係黎搵朋友嘅。」

個位警衛從上到下咁打量左小春一下，「呢位軍人先生，咁你係搵邊位朋友呢？」

小春一手拎左我個地址，然後話：「呢個地址果位朋友啊。」

但點知個警衛無望過地址，用手撥開左後話：「軍人先生，如果個個都咁隊張有地址嘅紙仔係我塊面度，然後話搵朋友的話，我未好唔得閒。」佢仲露出個好唔友善嘅微笑。

咁其實佢又講得幾有道理架ＷＯ，但小春好似比佢激親咁，然後話：「晨早流流你係未玩野啊！？」

「點敢同你玩野啊，軍人先生。」個警衛話。

就係小春想出手嘅時候，我見到有兩個女人跑緊過黎……遠睇好似係ＹＯＹＯ同ＣＯＣＯ，「等等啊！係我朋友黎架！」

本來見到佢地兩個跑緊過黎都無咩留意，但當佢地企左係我面前，我真係有少少嚇一跳，平時見到ＹＯＹＯ同ＣＯＣＯ都係化左好濃妝，但係，今日佢地個妝好淡，竟然比我有一種好脫俗嘅感覺。



個警衛見到ＹＯＹＯ同ＣＯＣＯ出現後，就即刻四萬咁口話：「喔～～～原來係程小姐同郭小姐Ｄ朋友黎，唔好意思啊，因為妳地呢位朋友衣著比較特別，所以我循例都要問清楚佢先可以比佢入去。」

ＹＯＹＯ同ＣＯＣＯ呢個時候望一望小春，見到佢地個樣都好似比小春嚇左一跳，然後就好尷尬咁同警衛講：「唔好意思啊，呢位朋友個腦有少少事姐。」

經過一輪誤會後，ＹＯＹＯ同ＣＯＣＯ就帶我同小春入個屋苑。