[絕對無糖分]就係咁，我搬左入一幢充滿一樓一嘅唐樓: ４５　世界真細小

究竟我好唔好去澧琳度呢？

但無啦啦衝上去，又好似煩到佢？

再加上如果佢屋企真係有野煩，我無啦啦上去，佢應該會仲煩架ＷＯ？

但係……我又真係好擔心佢……

我訓左係床上面，望住小春比我個地址諗左成晚。



就係呢個時候。

「喂，做咩成晚望住張紙發呆啊。」門口企左個人同我講，我嚇左一跳望左過去，「ＹＯＹＯ姐，咁夜妳仲係度嘅，未返去咩？」

原來係ＹＯＹＯ，呢個鐘數佢應該返左去陪個女架ＷＯ，點解仲會係度出現嘅。

「本身前幾日應承左個女買左個公仔比佢，今日買左仲ＦＡＣＥＴＩＭＥ比佢睇，但點知返到去先發現無拎返屋企，佢喊晒口咁話要公仔，所以唯有返黎拎啦。」ＹＯＹＯ姐答。

「咁個公仔放左係邊？」我問。



「放左係你舅父度啊，無理由放隻公仔係自己架步度嘛，同Ｄ麻甩佬搞野果陣比佢地問生晒咁，放係龍威哥度又驚佢食煙，整到個公仔好多煙味，所以放左係你舅父度先囉……係呢，你舅父仲未訓嘛？」佢講解完一輪後問。

「呢個鐘數應該未訓。」我答佢。

「咁快快手拎完閃先，你繼續ＯＮ９９咁望住張紙啦。」佢係都要串係我先得嘅……

ＹＯＹＯ姐走左後，我又諗返果個問題，諗左好多次都係覺得唔去最好，可能你地會話我，無啦啦衝上去人地度就更係唔好啦，駛鬼意咁耐咩。

……我都知，但係當有一件事本身想做，但又唔係太對路果陣，始終都會不停思前想後嘛。



「你條ＯＮ９仔仲望住張紙啊。」頂……ＹＯＹＯ姐拎完返黎。

「……唔望架拿，妳拎完個公仔嗱？」我問。

「拎完啦，閃嗱……」正當佢想走之際，「係ＷＯ！唔記得比低個地址你添，星期日早Ｄ到啊，預你要幫我成日架。」

下……成日……

「如果有朋友得閒都可以叫多個過黎架，因為都幾多野搬下。」ＹＯＹＯ姐係我張枱度拎起左支筆，寫左個地址比我，「你咁大個人，到時我唔會叫你起身架，你自己識黎架啦。」

……佢講到我真係奉旨咁幫佢ＷＯ，「得架嗱ＹＯＹＯ姐，到時見啦。」

佢走左之後，我望一望佢寫果個地址……咦！？點解個地址咁熟口熟面嘅？我張澧琳個地址同ＹＯＹＯ姐個地址對一對，發現原來兩個地址都差唔多，同一個地方，同一個樓層，只係唔同單位。