[絕對無糖分]就係咁，我搬左入一幢充滿一樓一嘅唐樓: ３８　伯伯，走了

紅磡，一個有好多殯儀館嘅地方，我同彩虹姐坐小巴到左某個街口，一身黑衣裝束慢慢向目的地行過去。

回想起果一晚，彩虹姐ＭＳＧ叫我落佢度，我一心諗住係傾買果塊玉佩嘅事，但點知我一落到佢架步門口，望住「請等候」嘅牌，正想㩒鐘之際，我聽到門口傳出一陣陣哭泣聲。

門，開左少少……

「蕃薯仔……入黎啦……」我聽到彩虹姐啜泣咁話。

我慢慢打開門，見到面上有淚痕嘅彩虹姐，但佢而家已經無再喊，佢深呼吸左啖氣，然後話：「伯伯，佢走左。」



「走左？」我不明所以咁問：「佢頭先黎過？」到呢一刻，我都仲以為彩虹姐係知道搵到玉佩後，太感動而落淚，我無諗過彩虹姐所講嘅走左，意思係……

只見彩虹姐聽到我咁問我，笑左一笑，然後眼角又開始有眼淚，「伯伯佢死左。」

「下！？」呢個係我當下嘅反應，亦係我當下只可以做到嘅反應。

由我出生到而家，我係第一次面對有認識嘅人去世嘅事，雖然識得伯伯唔耐，但突然覺得，生命，真係好脆弱。

「唔係話仲有半年命架咩？點解無啦啦會死左？」我問。



彩虹姐擦一擦眼淚，然後話：「婆婆講，伯伯係尋晚訓住走，仲話今日一早要黎搵菁菁，點知叫佢起身果陣，已經發現無心跳，無呼吸。」

我聽彩虹姐講呢Ｄ野，但腦一時三刻都反應唔切，如果有位家人訓係自己身邊突然間走左，我究竟……會點……

「但係婆婆有話，佢走果陣，塊面係充滿笑容。」彩虹姐話。

我地經過一間買花牌嘅店，彩虹姐望左望後，就叫停左我：「蕃薯仔，我地買個花牌比伯伯好唔好？」

我點左點頭。



彩虹姐揀左個花牌後，叫賣果個人揀左四個字寫上去，然後果個人問下款寫咩，彩虹姐就話：「愛你的菁菁。」

然後，佢捉緊手中拎住嘅木盒，個木盒入面裝住嘅，就係果塊玉佩，「入去啦。」

我跟住彩虹姐身後面，兩個人都無點出聲，係升降機前面等緊嘅我地，彩虹姐拎左一個白信封出黎，遞左比我，「幫我拎住先。」

我接過白色信封，然後彩虹姐又係自己個袋入面拎出一疊好厚嘅一百蚊紙。

回想起，果陣彩虹姐將呢對老夫婦比佢嘅「家用」貯起左，我諗當彩虹姐有呢個諗法果陣，都係預左有呢一日，將所有「家用」以帛金嘅方式比返伯伯。

「家用」，係每次姐姐仔同客人完事後，客人比姐姐仔錢嘅術語。

彩虹姐用呢Ｄ家用，買返塊玉佩，係頭先間花店買左個花牌，剩返嘅，就係比伯伯嘅帛金。

彩虹姐數一數佢手上面果疊一百蚊紙，然後口中碎碎念：「……死啦，雙數添。」



而我聽到後，係我跟包拎左一個五蚊銀出黎，放左係個白色信封入面，然後遞比彩虹姐話：「我入左五蚊入去，就當係我小小心意。」

彩虹姐聽到後，點一點頭，然後，升降機到，我地行入升降機，按下伯伯設樓果層，湊巧地，樓層數目同彩虹姐架步個數目一樣。