[絕對無糖分]就係咁，我搬左入一幢充滿一樓一嘅唐樓: ３９　還玉

靈堂門口前，白色嘅燈籠高掛，發光嘅當然唔係燭火，而係在內配合現代嘅燈泡。

門前已經有人係度準備收帛金，我同彩虹姐行過去，將帛金交比枱前面果個人，「有心嗱。」然後，佢打開放係枱上面本簿，「寫低你地個名。」

彩虹姐聽到後，示意叫我幫佢寫，我先寫左自己個名後，轉頭問：「彩虹姐，妳個名係？」而佢湊近係我耳邊話：「幫我寫菁菁。」

我頓左頓，然後寫左菁菁兩個字。

「有客到。」禮議司莊嚴咁道出：「請上前行禮。」



我同彩虹姐行到伯伯靈前。

「一鞠躬、再鞠躬、三鞠躬、家屬謝禮。」我慢慢咁抬起頭，見到伯伯嘅家人，男女老少，我諗係伯伯Ｄ仔女及佢Ｄ孫。

而係一旁嘅婆婆，可能因為隻腳唔太跪得，所以坐左係旁邊，向我同彩虹姐鞠躬。

鞠完躬後，一個披麻戴孝嘅中年男人行到我地面前，「請問，妳係未彩虹？」彩虹姐聽到後，點一點頭，而個中年男人又話：「我媽媽講左妳Ｄ事我知，佢有Ｄ野想同妳講，妳跟我黎。」

彩虹姐又點一點頭，而我，亦都跟住佢後面，行到婆婆面前。



「婆婆……」彩虹姐剛開口說話，眼淚就應聲而下。

「妳黎，真係有心。」婆婆亦都係一樣，眼濕濕咁望住彩虹姐，然後又望一望我，「你都好有心。」

我，向婆婆點一點頭，然後，我地坐左係婆婆旁邊，我無出聲係佢地兩個隔離折緊元寶，而佢地傾緊計。

「呢半年，真係多謝有妳嘅出現。」婆婆話。

「傻啦，可以幫到手我覺得好榮幸，只不過無諗過會咁突然。」彩虹話。



「係好突然，但諗深一層，佢可以咁安祥訓住去，都係一件好事。」婆婆話，然後望住伯伯嘅遺照話：「佢都陪左我大半世，如果菁菁一早唔係度的話，希望佢去到果度，可以搵到菁菁。」

「可以，一定可以。」然後，彩虹姐將個盒拎比婆婆，「呢對玉佩到最後都可以變返成一對，我諗伯伯係果邊一定可以搵返菁菁。」

婆婆接過盒後打開，佢望住盒入面塊玉佩。

「呢個……呢個係……」

左半邊心形嘅玉佩上面，刻有伯伯名入面其中一個字，「明」。

「蕃薯上網搵到。」彩虹答。

婆婆臉上露出欣喜嘅表情，斗大嘅眼淚不停滴係木盒上面，「真係搵到……真係搵到……」婆婆不停望下玉佩，又望下伯伯嘅遺照。

係呢個時候，彩虹姐所買嘅花牌送左上黎，係一個心形花牌，果位中年男人示意叫在場工作人員放好個花牌後，就行左過黎：「你地真係有心，黎送阿爸最後一程，仲買左個花牌……阿媽，呢樣係？」



婆婆將個木盒遞左比個中年男人，個男人見到後，呆左呆，「……呢個、呢個係我地一直搵緊果塊玉佩？」

婆婆，欣喜地點了點頭。