[絕對無糖分]就係咁，我搬左入一幢充滿一樓一嘅唐樓: ３７　當票

見完話有玉佩果個人後，我拎住張當票，諗左好耐……

我無即刻將件事話比彩虹姐聽，因為我仲未百份百肯定果個人係唔係真係搵到塊玉佩，於是我約左佢係旺角某間茶餐廳到見面。

係等緊嘅時候，我都一直好擔心又係一個假消息，直到，我見到一對男女係我面前出現。

「我想問係未蕃薯啊？」個女嘅問。

「我係，你地就係ＳＥＮＤ　ＭＳＧ比我話搵到玉佩嘅人？」我問。



而果一對男女坐低後，個男就係佢口袋入面拎左個玉佩出黎，「你睇下係未呢個？」

我拎住玉佩，係另一邊心形，而且上面都刻伯伯個名嘅其中一個字，「係，應該係呢個……」然後，我問佢地：「你地識唔識一個叫菁菁嘅婆婆？」

果一對男女互望左一眼後，搖一搖頭，而個女又話：「其實我睇到你出果Ｄ　ＰＯＳＴ後，覺得果對老夫婦個故事真係幾好，於是問左我一位做當舖嘅朋友幫我留意下，點知又真係有，所以就叫佢拎黎睇下會唔會搵得返個主人。」

「當舖？」我問。

而個男嘅就話：「其實，呢塊玉佩一早就當斷左，一直放係我屋企開嘅當舖入面想賣返出去，但因為佢本身係一對，而且刻左個名，所以到而家都賣唔出。」而佢又將當票拎左出黎，放左係我面前，「呢張係呢塊玉佩嘅當票。」



我望一望個當票日期，係１９６７年某一日，「我可唔可以拎返塊玉佩？」我問。

「跟住規定，其實當斷左嘅野唔可以再拎返，不過，而家呢塊玉佩都係放係我地到等賣出去，如果可以用返呢個價錢，我地可以比你。」個男人講完後，就寫左個價錢比我。

我望住個價錢，雖然唔係好貴，但我而家唔會夠錢買得起呢塊玉佩……

「可唔可以比少少時間我，我一定會買呢塊玉佩，但你地可唔可以幫我留起佢先？」我問。

而呢一對男女點一點頭。



回想返同呢一對男女嘅對話後，再望一望當票上果個價錢，我諗緊可以問邊個幫手？定係，直接同婆婆講，等佢地可以買左塊玉佩呢？

但點都好，我無婆婆直接聯絡，點都要經彩虹姐問，所以我ＳＥＮＤ左個ＭＳＧ比彩虹姐，同佢講我搵到塊玉佩。

我等左好耐都無收到佢個回覆，可能，佢忙緊掛。

我訓左係床上面，繼續諗好多事，諗起尋晚同舅父個對話，諗起我以前做咩野都好，都好ＨＥＡ　ＯＲ半途而廢，好多誓言旦旦話要做到嘅事，到最後，都無疾而終。

但今次，係我第一次有始有終做一件事。

係呢個時候，收到彩虹姐一個ＭＳＧ。

彩虹姐：你落黎，我有件事話你知

雖然聽唔到彩虹姐講呢句說話係用咩語氣，但我字裡行間卻睇得出，呢一句有一種好凝重嘅氣氛。