[絕對無糖分]就係咁，我搬左入一幢充滿一樓一嘅唐樓: ３６　終於

又過左一個星期，我都係陸逐收到好多搵到玉佩嘅消息，但全部都係假嘅，你問我點分果Ｄ　ＭＳＧ都係假，係因為呢兩塊玉佩係一對，呢一對玉佩係可以相合成一個心形，伯伯一直留住嘅係左邊，而佢初戀情人菁菁留住嘅一定係右邊，而且玉佩上面就有雙方嘅字。

每次我收到話搵到玉佩嘅ＭＳＧ，都會叫對方ＳＥＮＤ一張玉佩嘅相比我，而每次一睇相就知，一定係假……

雖然我一直收到好多假消息，但經過澧琳嘅打氣後，我已經無咁氣餒。

而婆婆同伯伯呢個故事亦都係姐姐仔之間傳開去，好多姐姐仔聽到呢個故事後，都好落力咁幫佢地搵初戀情人菁菁。

今晚，舅父屋企無咩人，只係得我同佢兩個。



「估唔到班姐姐仔咁落力。」我對住坐係我旁邊，睇緊電視嘅舅父講。

而舅父笑左笑後答：「你唔好睇佢地平時關埋房門開工，好似大家唔理大家，其實，佢地好明白每個姊妹，不竟，佢地都係做緊同一件事，雖然唔知做呢一行嘅原因，但都係同路人，呢一種同路人嘅同理心，我地旁人係唔會明架拿。」

我聽到後，微笑左一下話：「我記得有一晚，ＣＯＣＯ衝入我房幫ＹＯＹＯ向我講對唔住，仲話其實ＹＯＹＯ份人好好相處，識耐Ｄ就知，但我而家睇，其實唔只佢地兩個，其他姐姐仔其實都好易相處。」

「係架。」舅父語重心長咁話：「其實只係唔睇佢地份職業，佢地……可能比更多人都明白事理，因為，佢睇見識到嘅，睇到嘅野比平常人多，更多黑暗嘅一面，佢地更加清楚。」

舅父呢一句後，我靜靜咁諗左好多，如果光明一直伴隨著黑暗，咁我，就一定係一直被保護住係光明果一邊。



「我開始明白，點解阿媽要趕我出黎。」我答舅父。

「係咁就好，雖然我都無估到阿妹佢咁狠心，但妳講得出頭先Ｄ說話，我諗佢今次狠心都係直得。」舅父講完後關左電視：「都唔知而家Ｄ節目點解咁悶，我訓先。」

「嗯。」我回應左舅父一句：「我諗，我仲會係度住多一排。」

舅父聽到後微笑左一下，「住夠先走囉，舅父又唔會趕你走。」

就係呢個時候，電話一響，係一組無加入電話ＬＩＳＴ嘅電話號碼，我諗應該又係話搵到玉佩嘅ＭＳＧ。



呢一個號碼一連ＳＥＮＤ左幾個ＭＳＧ過黎，其中包含左幾個相片ＭＳＧ。

我打開後一睇……

相入面嘅玉佩同果對老夫婦所講嘅係一樣。

終於……終於都搵到嗱。