[絕對無糖分]就係咁，我搬左入一幢充滿一樓一嘅唐樓: ３０　做「愛」

原來就係咁，彩虹姐就開始同呢一對老夫婦之間有一個約定，只要當伯伯掛住佢初戀情人，又或者伯伯黎搵彩虹姐，佢都會請佢入房……

「咁伯伯入房後，會同妳……」我想問，但又問唔出口。

但係彩虹姐就笑左笑話：「你想問我同伯是有無搞野？咁如果我真係有咁大吸引力令到佢起到頭的話，都算係一件好事，但只可惜我好似無咁大吸引力。」

……下，咁姐係無做任何野？

「每次伯伯黎到，我地都只會坐係床邊，伯伯就不停咁望住我，叫菁菁呢個名，睇黎伯伯真係好掛住佢，但係，除左呢個名之外，又時伯伯又會問我，尋日同我一齊去食野果個地方Ｄ野好唔好食？尋日同我遊湖果陣風景靚唔靚？約左後幾日睇戲叫我記住唔好遲到……我諗，呢Ｄ都係伯伯同菁菁以前Ｄ回憶黎。」彩虹姐好似若有所思咁，「伯伯呢Ｄ舉動，令我覺得如果可以比佢愛的話，係一件幸福嘅事，果位菁菁以前一定好幸福。」



「咁樣，伯伯佢有無試過搵菁菁？」我問。

而彩虹姐話：「唔只伯伯搵，其實婆婆，佢地Ｄ仔女都有請人搵過，但一直都無消息，婆婆都話佢地都放棄左可以係伯伯死前，令佢可以同菁菁見一面嘅念頭，但點知，我嘅出現。」

然後，佢拉開左個櫃嘅其中一個櫃桶，入面有一張好舊嘅相，相入面，係一對好年青嘅情侶，但係因為太舊，樣唔太清楚，但依稀睇得出，男嘅係伯伯，女嘅同彩虹姐真係有Ｄ似。

「張相？」我問，而彩虹姐就答：「係婆婆比我。」

如果……如果呢個係上天比伯伯臨離開世界上嘅最後一份禮物，我想講，都要有婆婆嘅胸襟先成到事。



離開彩虹姐間房後，我慢慢行返上樓，腦入面一直諗兩個問題，究竟係伯伯長情？定係婆婆為左最愛能放棄一切？

究竟……咩野係愛？

有時，我地鍾意左一個人，就想對方同我地拍拖，追唔到，可能會因愛成恨……但呢Ｄ，又真係愛咩？

如果咁都算係愛，婆婆呢一種愛，可以話係極致。

雖然當初佢令到伯伯半迫半就娶左佢，陪伴左佢大半生，伯伯臨終前，婆婆都希望伯伯可以搵返佢嘅初戀情人。



捨，為情之極致，睇電影果陣就聽過，但無諗過會發生係我身邊呢個現實生活上。

如果，Ｄ人平時「入閘」係為左造愛嘅話，咁我呢次第一次「入閘」，係教識我咩野叫做「愛」。