[絕對無糖分]就係咁，我搬左入一幢充滿一樓一嘅唐樓: ２７　菁菁

我準備好細心傾聽彩虹姐講呢個故事。

「我記得果一個早晨前果一晚，我飲到好醉，一路嘔，一路行，講真諗起都覺得污糟，我左成條路。」彩虹姐笑左笑。

「到我返到黎時，我諗住可以快Ｄ沖涼訓，所以返呢個架步度，貪佢唔駛行咁多層，我入左黎後，就去左沖涼，個人醒一醒後就出黎坐係床邊仔息一陣先訓，但就係呢個時候，我見到架步出面有一個老伯，講真，其實果下我好驚，因為果陣都已經好夜，照計唔會有客人咁夜出黎搵姐姐仔，而且仲要咁老，果一刻，我有諗過自己係未撞鬼……」

咁又係，如果咁夜有個人企係自己門口，我都會咁諗。

「但係果陣我又諗，會唔會有係Ｄ傻佬上黎玩翻牌。」彩虹姐又話。



「下？玩翻牌？」我問。

「係啊，呢Ｄ有一樓一嘅大廈，時不時都有Ｄ傻仔上黎玩翻牌架，搞到Ｄ姐姐仔唔知自己反左牌，仲以為自己果日黑仔無客。」佢答。

原來有Ｄ咁嘅事發生架……

「……我都係講返正題，我果陣望一望個鐘，見到都已經５點幾，就到朝早就算有鬼都應該走晒掛，而個伯伯又剩係企係我度門前面，又唔㩒鐘，我都唔知開唔開門好，雖然話佢係伯伯好老姐，但我點知佢會唔會發癲襲擊我架，所以我死都無開門，而過多左陣，我聽到門外不停傳出電話聲，係果位伯伯嘅電話響。」

「有人打比佢？」我問。



彩虹姐答：「我一開始都以為係，但原來，部電話有個專為老人家整嘅定位響鬧ＡＰＰＳ，響左一陣，有個婆婆就上左黎，就係伯伯個老婆，當佢行到伯伯旁邊果陣，就關左個ＡＰＰＳ，然後望一望我道門問伯伯：『你做咩走黎呢Ｄ地方啊？』伯伯呢一刻伸出手指指向我道門，不停話：『菁菁、菁菁、菁菁……』。」

「菁菁？」我問。

而彩虹姐會心微笑左一下，「無錯，係菁菁。」

「而個婆婆就話：『傻啦，咩野菁菁呢，上面寫住彩虹啊，走啦，成晚唔見左人，Ｄ仔女膽心你啊。』伯伯就咁比婆婆拉走，但臨走果陣，伯伯口中都係不停叫住菁菁呢個名。」