[絕對無糖分]就係咁，我搬左入一幢充滿一樓一嘅唐樓: ２２　兔女郎ＣＯＣＯ

佢搵我做咩呢？

「我入黎得唔得啊？」ＣＯＣＯ企係門口問。

「……可以。」頂，做咩無啦啦咁緊張都有。

ＣＯＣＯ坐左係床邊，然後一臉唔好意思咁話：「對唔住，今日ＹＯＹＯ係你返工嘅地方咁同你嘈。」

喔～～～原來係因為今日件事。



「唔緊要啦，都發生左。」我話。

「無煩到你嘛？」ＣＯＣＯ問。

「比人鬧左鑊囉。」好一副好無奈嘅樣。

「真係好對唔住啊，ＹＯＹＯ份人係咁，好衝動，但其實係出於對自己保護心太重，你唔好介意。」ＣＯＣＯ講完後，一副欲言又止咁款，最後佢都係問左出口：「……係呢，上次我地踢你果度，而家……好返Ｄ未？」

「下？原來妳都有份？」我一直以為係得ＹＯＹＯ拆我祠堂，唔好問我點解咁覺得，我下意識咁覺得自己都唔知。



原來ＣＯＣＯ都有份拆我祠堂。

「唉……一言難盡……」我一副無晒心機，好想開口話比佢地而家點，但又唔知點開口……

「好嚴重？」佢問。

諗左陣，都係唔好話比佢知，一黎呢Ｄ又唔係種見得光嘅事，二黎同佢又唔係無熟，做咩要話比佢知。

「……算啦，唔好再問。」我答左後，ＣＯＣＯ一臉愧疚咁望住我，央求咁問：「你講我知啦，可能我幫到你呢。」



「唔駛啦，我自己有方法。」我求其ＨＥＡ　９佢。

「唔好啦，你唔比我幫，我好過意唔去架。」佢慢慢接近我。

「真係唔駛啊。」我又ＨＥＡ　９佢話。

「你咁講姐係唔原諒我同ＹＯＹＯ姐。」佢突然衝上我面前，我嚇一嚇下意識咁向後，手掙唔小心整到電腦Ｄ制，本身係桌面嘅電腦又彈返部ＡＶ出黎，仲要播緊。

我不知所惜咁望住部ＡＶ，ＣＯＣＯ就呆左望住部ＡＶ，突然間房靜晒……最怕世界突然安靜……

「……原來，我阻住你睇ＡＶ？」ＣＯＣＯ問。

我……呢個時候只可以點一點頭。

「……咁……咁我都係出返去。」ＣＯＣＯ講完之後，就好快轉身行到房門果邊，臨走出房果陣又話：「我諗你而家可以睇ＡＶ，應該代表果度無咩事掛？」



痴線！唔係囉！好大件事囉！

我心咁諗姐，無講出口，因為我知道如果講左出口，以ＣＯＣＯ頭先咁嘅反應，我諗佢又會死ＣＨＵＲ　要幫我。

「……係啊，所以妳唔好阻住我睇ＡＶ啦。」我答。

ＣＯＣＯ突然好似放下心頭大石咁，然後話：「咁就好拿，係啊，其實ＹＯＹＯ份人都好好人架，果次只係誤會，你同佢熟左好就知佢份人係點架拿。」佢講完呢句後就走左，當然有順手幫我關門。

其實，我都無諗過同佢地做朋友，就連以前同屋企人住果陣，我同鄰居都係零交流，應該唔會同佢地熟落。

但經呢一次後，我又覺得同佢地熟落，可能唔係一件壞事。

因為，好少有人會關心我，主動同我講對唔住。