[絕對無糖分]就係咁，我搬左入一幢充滿一樓一嘅唐樓: ２３　我地走啦，老公

係呢幾日，我都開始盡量融入佢地嘅生活，當然我都會保持我自己原則啦，而且我而家無撚用左……

相處落，又覺得佢地同平常人一樣，唔同只係佢地職業問題姐，如果無人特登講佢地做咩，可能，佢地比正常人仲正常，仲開始有講有笑。

提子哥佢雖然咸濕，講野又粗聲粗氣，但其實見識又真係好廣博，問佢好多野佢都答到。龍威哥雖然係黑社會，但其實佢又唔惡，係個樣有少少殺氣姐，平時對人處事都好客氣同成熟。集種就……都係未有交流，但係就成日搵我拎叉電同奶媽，仲知我係網上打手後，成日叫我幫佢係Ｄ成人討論區出ＰＯＳＴ，當然有比返錢我啦。

其他姐姐仔雖然講唔上算熟，但係行開行埋撞到都會打個招呼同吹下水。

我無諗過自己可以咁樣同人交談，如果唔係阿媽趕左我出街，我諗我日日返完工都係就咁陪下澧琳行下街、返屋企睇ＡＶ同出下ＰＯＳＴ。



而家我反而覺得充實左。

甚至，我開始會ＳＤ　ＭＳＧ　比好耐都無點傾過計嘅細佬蕃茄問一問屋企嘅近況。

如是者又過左幾日，今日我係返凌晨更，返到朝早先放工返家，我去到一個公園嘅公廁入面換好衫後就返出黎。

朝頭早嘅公園通常都係得Ｄ婆婆伯伯係度晨運或者捉棋，而當中有個婆婆，我總係覺得係邊度見過……

啊！我記得拿！有次我見過佢扶住一個伯伯行入我住緊果幢大廈度！



但點解而家得返佢一個人嘅？個位伯伯呢？

呵欠……眼訓添，可能做左成晚關係，都係唔諗咁多，返屋企大覺訓完先再諗。

行返去幢大廈，太過眼訓所以行得好慢，仲有幾步叉錯腳差Ｄ仆街，好彩我身手敏捷先無事，而當我行到彩虹果一層時，我見到彩虹間房開左門。

「彩虹姐，今日又咁早開工啊。」我話，但我未見佢人先聽佢聲，「係啊，今日又有早客嘛。」

然後，我見佢扶住一位伯伯出黎，仲一邊講：「小心Ｄ啊你，一陣婆婆就黎架拿。」



嘩！估唔到彩虹姐有Ｄ咁老嘅客！

……等等，呢一位伯伯都好熟口面，好似邊度見過……但眼訓到一時諗唔起。

直到，係我身後面傳黎一把好年邁嘅女聲，「完事嗱？」我轉頭一望，呢個未就係頭先坐公園，以及果次扶住伯伯入呢幢大廈果位婆婆！？

咁！？咁姐係！？

「係啊，我地返屋企嗱。」老伯話。

姐係彩虹姐而家扶住果個伯伯！就係當日婆婆扶住果位伯伯！？

冷靜Ｄ先，可能婆婆係伯伯個看護，所以先扶住伯伯姐，扶住伯伯嘅人又未必一定係伯伯老婆嘅……有Ｄ咁老嘅看護架咩？傻嘅，可能係我見識少呢。

係囉，而家扶住伯伯嘅彩虹姐都唔係伯伯老婆啦。



一定係咁，一定係咁。

「我地走啦，老公。」婆婆話，然後行到伯伯身邊扶住佢，而彩虹姐都係呢一刻鬆開扶住伯伯嘅手，果位婆婆仲比左錢彩虹姐，「唔該晒妳啊，今次Ｄ錢。」

而彩虹姐微笑左一下，「唔駛唔該。」

ＷＴＦ！！！！！！！！！

下！？呢個婆婆叫伯伯做老公！？咁姐係婆婆係伯伯嘅老婆！？

咁點解伯伯又會係彩虹姐間房出黎嘅！？

仲要……仲要婆婆比錢彩虹姐！？



我望住呢一對老夫婦落樓後，問彩虹姐：「彩……彩虹姐，果位伯伯係？」

「佢係我早客囉。」彩虹姐答得好漫不經心。

下！！！！！！！！！！

其實我見到彩虹姐有個咁老嘅客已經嚇一跳，不過因為我太眼訓所以無咁大反應。但當我知道果位婆婆扶住伯伯黎搵彩虹姐！本身眼訓嘅我都被嚇醒左！

竟然有老婆扶住自己老公黎叫雞啊！！！