係你令我重新記起愛情嘅感覺: 第九章

如果我係michelle嘅男朋友，咁你話幾好，最少我可以名正言順咁用男朋友嘅身份去保護佢，叫矮仔唔好再煩佢。但係我又唔係michelle嘅邊個，有咩資格去保護佢。睇住佢咁唔開心我又咩都做唔到，嗰種無力嘅感覺真係好差，就好似眼白白睇住人哋要斬斷你隻手但係你咩都做唔到咁樣。可惜，我都仲係唔確定自己嘅感覺，就算確定咗我真係鍾意michelle，我又會有勇氣表白咩？



我哋學校呢就要打呔嘅，咁啱今日喺學校我條甩咗，咁啱我又廢唔識打呔，可能你哋會話：「中三都唔識打呔！？」係啊，我廢啊，但係我唔學係有原因嘅。我攞住條呔一臉茫然咁，michelle見我咁迷惘，就問：「駛唔駛幫你打啊？」
我一聽到就緊係即刻話好，跟住michelle用個嬲嬲地嘅笑樣望住我，呢個樣真係引死人，點解我哋班有個咁正嘅女仔我都唔覺㗎！



Michelle攞住條呔一路打一路打，我就一路望，睇住佢個認真樣，但係又有少少論盡真係好得意。之後佢打打下打錯咗又或者打得唔滿意嗰陣個嬲樣都好可愛，就好似你見到細路女發脾氣嗰陣咁。打咗一陣佢終於打好。




Michelle（笑得好甜咁講）:「Yeah 打好啦！」
我：「唔該晒」
Michelle：「你啊，好心你啦，學吓打呔啦，咁大個人都唔識打呔」
我：「唔緊要啦，有你幫我打咪得囉」
Michelle：「咁我都唔可能一世幫你打㗎嘛」
我：「點會呢，我成世都同你一齊叫你幫我打㗎啦」
講完之後，佢塊面紅晒耷低咗個頭，我都即刻意識到自己好似講咗d奇怪嘢。嗰刻，我望一望佢，咁啱佢又斜眼望緊我。佢塊面真係勁紅，佢不斷逃避我嘅眼神，但係咁令我更加想同佢對望。突然呢一刻，我以前嗰種感覺返晒嚟，我好肯定我係鍾意咗michelle，好想同佢一齊保護佢，同佢一齊好開心，比任何嘢都開心，擁有佢就好似擁有咗全世界咁。諗吓諗吓，都係時候啦，我下定決心要同佢表白。







我要講嘅嘢卡住咗喺喉嚨，爭少少就講出嚟。我繼續望住佢，終於我忍唔住，將心入面嘅說話講晒出嚟：

「Michelle，我鍾意你，同你相處我好開心。係你一路陪住我，係你令我揾返真正嘅自己，係你，係你令我重新記起愛情嘅感覺。可能我試過對你唔好，但係相信我，同我一齊，我會永遠咁保護你愛你，唔會再令你覺得唔開心。比我做你男朋友得唔得？」