係你令我重新記起愛情嘅感覺: 第八章

嗰日之後，我同michelle又變返好似之前咁close，佢無再hea覆我，我開心咗好多。



話說學校就教緊幾何嘢，咁我呢樣就特別廢，我都唔知點解，成日都要問michelle。平時都係我教佢多，依家調轉，我發現michelle真係好細心。有一次我份功課唔識，佢一路唔瞓睇吓我有無嘢唔識可以問佢，最後佢真係陪到我做完先瞓，嗰陣都成12點幾(佢平時慣咗10點幾瞓)。又有一次我唔識，佢第二日臨返學之前專登畫咗幅圖send比我嚟解比我聽，返到去仲要問我識唔識，你話呢d女仔邊度揾。



正當我沉醉緊喺佢嘅關懷嘅時候，自以為得到咗佢，就發現有一個好大嘅問題嚟啦。今日又上緊數學堂，michelle就係咁拍矮仔係咁問佢數，矮仔答完佢又話：「你知唔知呢，啊邊個佢咩咩咩啊……」
Michelle聽完笑得好開心，我從來未見過有除咗我之外可以令佢發出呢個笑容嘅人，佢係真心嘅笑容。之後矮仔不斷另過嚟撩michelle講嘢，每次michelle聽完都係咁笑，我越嚟越睇唔過眼。點解我會覺得咁嬲嘅？究竟呢種係唔係呷醋啊？







嗰日返到屋企，成個人悶悶不樂，michelle又一如既往咁揾我傾計
Michelle：「乜我頭先幅相好奇怪咩？矮仔cap咗圖」
Michelle：「跟住佢仲係咁講sorry叫我唔好嬲佢」
我：「佢對你有嘢啊嘛，你唔係睇唔出啊？」
Michelle：「一定係咁啦」
我：「你信我啦，總之你小心d佢，佢又搶我鍾意個女仔，又想溝你」
係啊，我鍾意嗰個女仔就係michelle，我竟然認咗




Michelle：「okok我會小心」



Michelle咁講我都放心咗，但係我點都估唔到，我最friend嘅兄弟，會同我爭女。佢明明睇得出我對michelle有d嘢，佢仲要溝人。佢成日都要同我爭，連打機用咩角佢又要同我爭。不過我又唔可以怪人佢，話晒我由始至終都無承認過我鍾意michelle。點解人總係唔見棺材唔流眼淚㗎，係要有人同你爭先識珍惜。諗返上嚟，我都要多謝矮仔，多得佢，我先立定決心追michelle。