係你令我重新記起愛情嘅感覺: 第十章
一年後嘅今日，我聽住歌，自己一個行到去充滿回憶嘅地鐵站，抬頭一望，一段又一段片段淨現喺我眼前……
「比我做你男朋友得唔得？」
上年今日，喺呢句說話之後，我就開始咗我一生人最開心最幸福嘅四個月，我真係無諗過我竟然可以同到佢一齊，無諗過我會記返起鍾意一個人嘅感覺，但係我更加無諗過嘅係，我哋嘅緣分只係咁。
一齊之後，我哋每日都形影不離，上堂又眉來眼去，連老師都睇唔過眼但係又吹我哋唔脹。我好記得有一次佢唔睇車衝出馬路，嚇到我即刻捉實佢差d將佢成個人攬住，之後搣住佢塊面好嬲咁同佢講：「你咁樣成日咁唔小心，第時我唔喺你身邊咁點算啊？」
佢笑住咁講：「一定唔會嘅～」
望住佢個樣，我又點嬲得落啊，但係聽到佢咁講，我真係好開心。
仲有一次，喺暑假嗰陣。之前都有提過，佢屋企好嚴，所以好難約到佢，亦因為咁，放暑假嘅兩個月對我嚟講完全係煎熬。暑假我就會去吓旅行咁，呢一年我去德國，佢就去咗日本，中間有8個鐘時差，我起身佢就瞓覺，佢起身就我瞓緊覺，連message都有d難，我終於明白longd有幾辛苦。有一日，我起身見到佢message話佢發噩夢，普通發噩夢又點會同我講啊，肯定係關我事，我就唔現三七廿一即刻問佢咩事，原來佢發夢見到我同第二個女仔一齊，仲話一路都只係玩緊佢。正傻妹嚟，不過女人都係要氹㗎啦，我用盡渾身解數，集思廣益先氹返掂佢。跟住咁啱我影咗幅風景相比佢，話呢度好靚，第時一齊搬嚟住，佢竟然話好，我嗰刻開心到傻咗，企喺人哋個旅遊景點度傻笑，搞到老母嚟問我咩事。然後嗰晚，臨瞓同我講good night啦，然後佢竟然同我講love you，係第一次佢同我咁講，真係好甜好甜，甜到糖尿病咁滯。仲有仲有我哋返到香港暑假之後嘅第一次見面，我見到佢就即刻衝過去攬實佢，佢扮嬲咁話：「我唔理啊，你抽晒我水，以後都要同我一齊啊」
d人話小別勝新婚真係無錯，嗰吓真係好感動，搞到我差d開心到喊。
仲有更多更多嘅回憶，不斷喺我腦入面浮現出嚟，一幕接一幕咁，但係仲有一段，最刻骨銘心，亦係最痛嗰一段出現咗……
嗰一日，如常我哋一齊放學，只不過沿途佢不斷send message，完全唔望我咁，但係我又唔想鬧佢，所以我無出聲，半個鐘車程就喺幾句說話中結束咗，我點都估唔到呢次係我最後一次送佢返屋企。我當刻緊係好唔開心啦，點知我返到屋企，見到嘅嘢令我開始驚。
話說我返到去碌ig，見到佢post咗張snapchat best friend list嘅相，caption仲係話有人上佢best friend list上得好快，換言之，佢ig嗰個人就係佢今日不斷揾嗰個人，究竟有咩人可以重要到佢要為咗佢特登開post，甚至比同我一齊嘅時間更重要？我越諗越驚，就問佢嗰個邊個嚟，初初問佢佢就話係個唔同級嘅女仔嚟，我本來都信嘅，但係佢之後又覺得我唔信，話我實係知道d嘢，叫我講，咁我咪問佢嗰個其實係唔係xxx(一隻同級嘅狗公)，點知佢話係。去到呢度，相信如果大家係我，都會好嬲，無錯，我係好嬲，但係更加多嘅係驚，我好驚無咗佢，於是我就同佢講咗好耐，叫佢同隻狗公講清楚。無錯，就係一時嘅衝動，我哋就咁開始差落去。去到之後，我話同佢放學佢都唔肯，連同嘢都唔同我講，開始已讀同不讀我message。
過咗一星期左右，我自己一個放學，但係咁啱喺車撞到佢，我就同佢講咗陣：「首先，我要講嘅係sorry，對唔住我無諗你感受我唔信任你，sorry。我知我錯，但係我哋依家點？仲可唔可以繼續落去？你唔鍾意我d咩不如你講出嚟，我一定會改，我哋返返去以前咁好唔好？」我講到想喊
佢話：「我都唔知啊，無論我離唔離開你，都會影響到你所以我都唔知啊。我唔識講你有咩問題我唔想講，我驚會hurt到你，我知你好愛我，但係我真係唔知，你唔好逼我啦。其實我覺得我哋做好多嘢都好似變到係應分係機械式咁做嚟應酬咁。」佢好辛苦咁講
果然，每樣嘢都有限期，我同佢嘅關係都唔例外。
我即刻好急咁講：「例如呢？我哋有咩係機械式？你唔想做d咩我唔做我改啦，唔好離開我得唔得？你話你唔知離唔離開，咁你個心呢？你仲鍾唔鍾意我？鍾意就繼續唔好諗，我應承你我會比辛福你，我唔會再比你流一滴眼淚。」
佢話：「我真係唔知啊，你唔好逼我好唔好？我頂唔順你個無辜樣，你個樣成日好無辜咁望住我，搞到我唔知點好。我要走啦，屋企人知我會幾點返到」
咁我唯有好無奈又好痛咁講拜拜
就係咁，我哋越行越遠，離當初嘅我哋越嚟越遠。
多麽痛的領悟，你曾是我的全部
無錯，佢的確係我嘅全部，但係我又領悟到的咩？嗰日之後我哋基本上已經無再講過嘢，我過住d以淚洗臉嘅生活，每一日我都係無咗靈魂咁，朝頭早返學就瞓，放學返到屋企就喊，喊完又瞓，喊夠就打機打到夜一夜，每日都兩三點先瞓，又唔沖涼唔刷牙唔着衫就咁瞓喺張床度喊同瞓，個心真係好痛好痛，好似比刀割咁，只不過我可以做嘅只係等時間過去。
一年前表白，一齊咗四個月，計返分開到依家已經8個月，但係我都仲未忘記到你。d人話一段關係有幾耐，放低就需要一半嘅時間，但係我用咗段關係兩倍嘅時間都係咁樣，我仲係好愛你，亦好對你唔住，係我錯，係我自己無安全感，係我太自私，如果當初我唔係咁衝動，我忍一忍，我相信你，我哋今日會唔會係慶祝緊一週年紀念？
雖然係好痛，不過都要多謝你，係你比咗咁美好嘅四個月我，係你令我嘅人生有色彩，係你，令我揾到我存在嘅價值，揾到我自己。無你，都唔會有今日嘅我，無你，我根本唔會經歷到咁多嘢。
係你令我重新記起愛情嘅感覺，多謝你，michelle