係你令我重新記起愛情嘅感覺: 第七章

今日返學真係勁攰，返到去諗住snapchat michelle同佢吹吓水，事關我哋唔知由幾時開始已經有日日都要snapchat嘅習慣，但係我喺對話之間好似覺得有d唔同咗。佢答覆唔再係句子，只不過係emoji同埋ok，我好似感覺到佢hea覆我，我哋嘅對話已經唔再係以前嗰種感覺，究竟係以前嘅我諗多咗定係其實佢唔想再理我？



第二日返到學校，明明平時佢一定會主動開聲問我嘢同我傾計，今日佢唔再係咁，反而我唔岀聲佢又唔岀聲，大家都耷低個頭但係又唔知做乜咁，氣氛好尷尬。明明我個心不斷叫我同佢講嘢，但係我又開唔到口，覺得如果佢都唔岀聲即係佢都唔想同我講嘢啦，我又唔係邊個，佢唔理我都好正常啊。經過內心嘅一番交戰之後，估唔到佢會岀聲先，
佢話：「唉好頭痛啊。」
我：「有無事？」
Michelle：「無事，今日返去抖吓應該會好d。」
另一邊廂，我望住矮仔，佢做緊嘅嘢令我第一次覺得佢咁值得我敬佩。我望埋去第一眼就見到矮仔同件豬扒講緊嘢，仲有講有笑咁，我從矮仔嘅眼神睇得岀佢絕對唔係當對方係朋友嘅態度，反而似係想溝人咁樣。佢哋笑得越嚟越大聲，我都笑得越嚟越勁。矮仔佢竟然⋯佢竟然，佢竟然溝豬扒啊！我即刻叫michelle睇。
我話：「你睇吓矮仔佢溝緊女啊。佢溝豬扒啊哈哈哈⋯」




Michelle笑住咁講：「咦，你唔好咁衰啦。或者人哋溝唔到女神受咗太大打擊呢。」



我望住michelle，佢又望住我，呢一刻嘅佢真係好靚，佢嘅笑容同佢個樣好夾，佢笑嗰陣對眼會瞇起，好似月亮咁彎彎地。望住呢一刻嘅佢，我都不自覺咁笑咗岀嚟，雖然我都唔知自己笑咩。佢依家個樣就好似有魔力咁，吸住咗我嘅目光。如果時間可以永遠停留喺呢一刻，又或者用一張相將佢依家個樣保留落嚟咁你話會有幾好。突然我有一股衝動想摸吓佢個樣攬住佢，正當我隻手啱啱提起嗰下，落堂嘅鐘響咗，原本好靜嘅課室一下子變到好吵，而michelle嘅friend都嚟咗揾佢。佢個friend嘅一句「喂去買嘢食啦！」搞到無晒mood，原本咁浪漫嘅氣氛，就咁比個八婆搞到咁，八婆你好嘢！究竟頭先我對住michelle嘅係咩感覺嚟㗎，點解咁奇怪嘅？究竟呢種感覺係唔係就係我一路都忘記咗嘅愛嘅感覺啊？