係你令我重新記起愛情嘅感覺: 第五章

依家又放緊年假咁啱又考完試，我就諗住約佢出嚟，約邊個？緊係約michelle啦。係喎講咗咁耐都未講班長叫咩名，無錯佢就係簡介入面嘅michelle。



話說我今日約咗矮仔去會展睇動漫展，跟住就snapchat班長，問佢下星期得唔得閒，雖然我預咗失敗，不過唔知點解就係想約佢出嚟。
我：「你下星期得唔得閒」
Michelle：「得啊，做咩？」
我：「可唔可以陪我去睇戲？」
Michelle：「吓」
我：「唔得就算啦，我都預咗」




Michelle：「都唔係唔得，但係比我啊爸啊媽知就死啦」
我：「咁不如叫你個friend幫手，叫佢幫你同你啊爸啊媽講你同佢去做project」
Michelle：「吓但係煩到人好似唔係咁好，同埋我真係好驚比我啊爸啊媽發現啊」
然後我好灰心咁話算啦，但係佢竟然無再check我message，咁我就好頹咁去咗練跑，點知練完佢覆咗我
Michelle：「你係唔係真係好想我陪你去啊？」
我：「再想又點啊，正如我哋個老師所講想吓係無問題嘅」
Michelle：「咁又唔係，如果你真係好想嘅話我可能可以陪你出去嘅」
我：「但係你嗰日未必得」
Michelle：「邊日啊？」
我：「下個星期三」（情人節😏）




Michelle：「sorry啊，我啊爸話下星期三有嘢要做我嗰日唔得」
我：「咁星期二呢？」
Michelle：「我約咗friend」
我：「星期四上晝？」
到咗呢度佢又無再覆我，第二日我好早起咗身去跑步，跑完見佢無覆我，我就知佢其實無心理我，就話：「算啦我自己去你當我無揾過你」既然你根本就唔想同我出去，咁點解你琴晚要比希望我，等我仲以為有機會。嗰吓我熄咗機，唔想再諗，越諗個心就越攰。毒L始終係毒L，又點會有女同你出街。我想喊，但係我喊唔出，自從比女神收完兵之後我就再唔識喊，約唔到女都算啦，連最基本嘅喊我都做唔到，我真係好廢。