係你令我重新記起愛情嘅感覺: 第三章

點解我會話呢樣係佢，最大嘅武器呢？因為佢成日都對住我咁樣，我本身就對d會嗲人嘅女仔零抵抗力。話說有一日要測驗，測驗前佢係咁話好驚好緊張，然後仲要成個頭挨咗落我膊頭度喺度扭計咁話：「啊~我好驚啊，點算啊」
嗰吓我真係呆咗，心諗今次大獲啦，你咁樣挨落嚟叫我情何以堪呢？咁我可以點啊？唔通推開佢咩，人哋女仔嚟㗎點可以咁對人㗎？當然呢d嘢有一次就有第二第三次。有一次佢又係咁，我仲撳住佢個頭話：「唔好郁啊」
因為嗰種感覺真係太正，係我好耐都未試過嘅感覺，而佢就無出聲繼續挨住我。我由細到大都好想試吓比女仔挨住係點，依家我終於試到，仲同我諗嘅一樣，都係咁舒服，好想佢永遠挨住我，但係唔知點解我都係無以前鍾意人嗰陣感覺咁強烈。



嗰日落堂之後，我個friend矮仔奸笑住咁走埋嚟話：「喂點啊，你同佢幾好傾啊。」
條友我由小學就識到佢依家，叫得矮仔，就緊係矮啦。佢係有米仔嚟，屋企又大又多嘢玩，我哋係因為同班同埋一齊打機先熟，佢成日都喺度笑我同班長有嘢，不過我哋都無理佢。我成日都覺得佢好似以前嘅我，佢明知自己唔會有機會都繼續追佢女神，不過唯一唔同嘅係，佢女神無收到佢做兵。
「乜嘢啊，我唔係鍾意佢啊。」我有d心虛咁講。
跟住佢就不停重複話我同班長有嘢，條友成日都做埋d小學雞嘢，真係無佢辦法。不過究竟佢有無講錯，班長對我有無感覺，我對佢又有無感覺我真係唔知，我對住佢無以前嗰陣鍾意人嘅感覺，取而代之嘅係覺得佢好得意，淨係想見到佢同佢講嘢。我知你哋會話：「咁咪即係鍾意囉！」我會同你講，以前我鍾意一個人，會有完全唔同嘅感覺，我總係覺得，我對佢嘅並唔係愛。