係你令我重新記起愛情嘅感覺: 第二章

上回提要：一直都對調位無咩感覺嘅我，喺今次調位之後諗法完全唔同咗



我哋班就每個月調一次位嘅，而調位嘅方法包括咗由老師安排、分男女坐、跟學號坐同埋隨機決定邊個坐邊度。而用邊種方法係由抽籤決定，今次就抽中咗跟學號坐，又咁啱坐我隔離嘅係一個女同學。其實我一直都無乜點留意佢，佢只不過係我女神嘅一個好朋友，我同佢嘅交流只係限於喺physics堂同biology堂做實驗嘅時候。佢咩樣？佢個樣普普通通唔係靚但係絕對唔係差，對眼都算大，長頭髮。身材？佢係絕對無，平胸無長腿(點知原來閱女無數嘅我係錯㗎，之後先講)。簡直係普通到無得再普通嘅女仔。



本來對溝女已經無咩興趣(無能力)嘅我知道要同佢一齊坐嘅時候，無咩感覺，心諗：普通嘢姐，周圍都係，最多咪問吓我功課點做同埋提我要交回條(唔記得講佢係班長)。於是我無諗太多，都係坐一個月姐







一坐低佢就話：「唉啊點解我會同你坐㗎，有無搞錯啊」
佢一副小朋友扭計樣咁講。佢嘅身形同動作，加埋佢把聲，真係好似成個小朋友咁，我仲覺得都幾得意啊。但係我仲未意識到呢樣先係佢最強嘅武器，就係咁我開始咗同佢坐嘅日子。