係你令我重新記起愛情嘅感覺: 第一章

我叫阿鉛，係一個中二學生，亦都係典型毒L一名，但係成績都唔錯，所以我啊爸啊媽都吹我唔脹。平時有咩嗜好？打機睇動漫gup女。女朋友緊係無啦，不過女神就有。既然有女神，做吓兵仔比人玩吓都好正常姐，點知我入世未深，知道自己做咗兵都仲要對女神不斷付出真感情，心諗佢終有一日會比我追到，然後我呢隻兵仔比人玩厭咗，女神唔再理我。我超唔開心，仲有d抑鬱症，成日心情都好差，日日上堂都瞓覺，習又唔温，本來由有成績嘅毒L變成連成績都無嘅毒L。為咗女神，我咩都無晒。



我成績一差，啊媽就開始鬧我，我都唔知點同佢講好，每日我返到屋企都好攰咩都唔想做淨係想瞓覺，仲想一睡不起。於是我嘅壓力越嚟越大，每次考試都想考好d，但係就越考越差。就係咁過咗中二。



喺暑假嘅時候，有一個女仔朋友(佢當然唔係女主)，我同佢都算熟，佢知道晒我中二嘅事，然後不斷同我傾計，佢真係幫咗我好多。佢將我拉返上嚟，我終於正常返變返之前嘅自己，但係唯一唔同嘅就係我已經揾唔返鍾意一個人嘅感覺。雖然我都仲係好易對人有感覺，但係都只係限於好感，唔再係以前鍾意嘅感覺。到中三開咗學幾個月，我哋進行咗一個月一次嘅神聖儀式，就係調位啦。雖然有好多同學都會覺得好興奮同緊張，但係我就覺得只係例行公事，因為無論同邊個坐都係一樣。點知今次竟然唔同……