是咁的，我係A0死毒撚: 六. 約會

  終於到左放學，我約好左阿晴係佢學校門口等。阿晴好尷尬咁行出黎，話：「你做咩企係咁當眼既位置啊，咁我D同學咪以為我有男朋友囉。」我唔好意思咁話「對唔住啊，我下次會注意架喇。」阿晴：「咁你又唔洗道歉，好啦行啦去溫書喇。」我地搭翻朝早架巴士翻黎，再去我屋企會所既自修室溫書。 
  阿晴係溫書既時候好專心，說一不二，真係唔會㩒手機，佢攞出佢既notes，notes既封面可愛得黎帶幾分認真，睇得出呢份notes係佢好認真寫出黎既心血。一打開，用唔同顏色既筆寫滿曬每一頁。仲有個目錄，清晰咁列出左頁數。一睇就知阿晴係個細心同對學習好認真既人。呢Dnotes係我呢個論盡既男仔身上係永遠唔會出現，不過我既溫習方法係用螢光筆間低重點。有阿晴既幫忙，我迅速就將課堂上唔識既野全部運用自如。阿晴仲準備左好多exercise一齊做，佢做既速度相當快，我再努力追也追不上，睇黎阿晴成績咁優秀背後一定落左好多苦功。  
  好快，到左七點鐘，阿晴話佢要翻屋企喇，我主動話送佢翻屋企，佢話無所謂。阿晴住既地方同我有D距離，要行大約十五分鐘先到，不過無所謂，我有的是時間。漆黑無人既街道上，只剩低我同阿晴，睇得出阿晴係聞左咁耐書都有D攰。我鼓起勇氣咁問：「你都識左我兩個禮拜，你覺得我係一個點既人？」佢話：「你都幾nice幾好人，不過讀書就唔夠專心囉。」我話：「你真係覺得我成日約你係無目的既？」佢壓低把聲咁話：「有阿，你肯定有目的，就係要我D exercise，係咪？」我答：「係啊比你發現左添。」睇黎佢仲未發現我既心意，一聲道別，又要再等到聽日先可以再見。