是咁的，我係A0死毒撚: 五. 晴天

 自從識左阿晴之後，我每日每夜都掛住佢，或許呢個就係戀愛既感覺，但而家我同佢既關係只係朋友。  同阿晴傾過幾次計後，我知道佢都係中四，佢係sports team，成日代表學校參加田徑比賽，而且選科同我好接近，都係phy chem 不過我最後係揀左bafs而佢揀左geog，我地交換左電話，不過我成日唔夠膽搵佢，佢成績好好，同我呢個中游份子差得遠。佢住我附近，又唔洗補習，所以我打算約佢一齊溫書，呢招係阿峰既拿手絕技，佢過左我幾招，相信到時一定大派用場。   
  每日早上，搭同一班巴士，坐同一個位置，同阿晴傾計已經係我既日常。一日，我膽粗粗咁問：「你成績咁好，可唔可以carry下我呢個學渣？不如一齊溫書？」佢都係笑住答我：「好啦，但係你要應承我，我地只可以溫書，唔係傾計同玩。」我話：「好啦，真係淨係溫書啦。」佢伸出佢既手指尾，要我同佢勾手指尾，一勾，佢邪惡咁話：「你話架，無得返轉頭架喇。」就係咁，我同佢第一次有身體接觸。佢好似好得閒，我地就約左逢星期一，三，五一齊溫書。    返到學校啊熙同阿峰都話我好大膽，竟然可以咁快識到女仔仲咁friend，對讀左男校10年，仲要一個女仔friend都無既我黎講，算係唔錯。我就話呢D都要歸功於阿John，全靠佢，我先可以咁快脫到毒，有咁大信心去識女仔，相信如果用我未剪髮前既阿輝look去識阿晴，我一定會比佢拒絕。