是咁的，我係A0死毒撚: 四. 認識

  經過啊John既神來之筆之後，我覺得自己已經由當初既阿輝變成而家既彭于晏。經過悠閒既週末後，又再次黎到我期待已久既星期一，我想比佢見到我整理左好耐既頭。  
 我興致勃勃咁出門口，飛奔上果架巴士，如我所願，我再次見到佢。佢坐係窗邊，陽光照射係佢面上，顯得佢塊面更白，微微啡色既頭髮，隨著冷氣機吹出黎既風飄逸，我扮到好似不經意咁坐係佢隔離，我心入面掙扎左好耐，之後大膽咁講:「咦，你讀呢間中學架？我讀係你附近既中學架。」我口啞啞咁講，佢怕怕醜醜咁話: 「哦，係咩？你朝朝都搭呢架巴士？」我話：「係啊，你叫咩名？」佢話：「阿晴，晴天個晴。」我答佢：「我叫俊仔。」阿晴即刻講笑話：「阿俊？邊度俊阿，睇過？」我地有講有笑咁搭左一程車。佢笑果陣真係好可愛，可惜咁就到左站。我地雙雙告別對方，然後回到我地既校園生活。   再次係沈悶既堂課，令人頭痛既數學，阿晴令我無法專心，我時刻都掛念住佢既笑容，我隔離位阿行見到我都忍唔住話我：「成個癡漢咁笑咩啊。」佢將我從幻想帶回現實，我笑住咁答：「無野啊。」佢話：「你個哀仔肯定拍拖啦。」，我話：「未啊，不過快架喇。」佢笑左一下，然後再次專注到課堂上。 
  成功識到佢只係第一步，黎出pool既路依然好遠。