「你會娶我嗎？」: 第二次「約會」

由友愛邨行去碼頭的路程需要15分鐘左右，沿路她都沒有講一句話，心事重重，愁眉不展。
 
「喂，你ok 唔ok 呀？」
 
「唔」
 
終於我地響碼頭由「邁亞美」行到去「美樂花園」來回了4次，她依然一句野都無講。
 
「你洗唔洗抖下」我見唔係好對路，再行真係唔知行到幾時。
 




「其實我都唔知點解同佢拍拖。」她終於開口講野了，靜左成個鐘，我仲以為佢說話的功能退化了。
 
「咩話？」老實講，佢似在自言自語。
 
「我同佢朝朝早搭同一架巴士由天水圍落屯門，其實只係識左幾日，就交換左電話號碼，日日傾，有日接我放學，就拖左我隻手。」
 
「喂，你無事丫ma？」
 
「點解男人個個都係見一個追一個？」
 




好一句「個個男人」，一個十鳩幾歲的中三女生，仿佛已經飽歷滄海桑田，如果當時有支純薄萬比佢吞雲吐霧，效果一流。
 
「你發現佢追第二個？」
 
「係，因為佢icq send 錯左message 比我。」終於證實左佢唔係自言自語。
 
icq，一個與之前不同的交友媒介，最大前提是要上網，但56k的速度同埋要打電話駁線，令我個人興趣不大。我還記得我有兩個login id，一個是93432389，另一個是172717023。前者只是去朋友家湊熱鬧順便申請，另一個就是比人「炸」之後再申請的。至於因咩比人「炸」我相信都是點錯相的禍。
 
男人出軌的原因層出不窮，出事的原因也千奇百趣，但經一事蔡一智，我相信呢個男仔，一定唔會再咁柒，老實講，當時聽到周念慈講個原因出來，真是好想大力恥笑，但為左現場個氣氛，我強忍。
 




「你有冇拍過拖？你會唔會咁對我家姐？」看來佢已經認定我對佢家姐有意思。
 
「冇拍過拖，不是追你家姐。」
 
「你無拍拖？都係，你咁薯，真係無女仔會鍾意。」似乎她正常番了，因為刻薄的說話又番來了。
 
「無拖拍唔係我問題。」我試圖力挽狂瀾，可以徒勞無功。
 
「算啦，講你都唔明，你都唔知咩係拍拖。」正宗打完齋唔要和尚。
 
「咁你講完未？」
 
「完了，講哂出來，個人舒服好多，其實佢都唔係咁靚仔，仲好低能。」
 
事實又一次證明靚仔已經贏左起跑線，同個女仔搭同一架巴士幾日就可以有對方電話，又拖埋人地隻手，你說不爽嗎？可惜這些機會不是我的。




「多謝你。」
 
「吓？」我沒有想過佢會同我講多謝，再次懷疑她被邪靈上身。
 
「多謝你聽我訴苦，仲陪我由友愛行過來。」
 
「哦，都無咩問題，第一次聽你講多謝，有D唔慣。」
 
「其實，我都是一個有禮貌，守校規的好學生，只係佢地妒忌我靚，成日罰我。」歪理又出現。
 
靚同守校規以至有禮貌有咩關係？正當我個腦仲思考緊三者關係之際。
 
「喂，去食野，我肚餓。」
 
「咁你想食mud？又係麥當奴？」




 
「都好播，今次可以食雪糕，不過你請。話哂我都失戀，無理由要我請你。」
 
我都唔再同佢爭辯，因為我知道一定唔夠佢講。其實見佢無事，故態復萌，我已經放心。
 
這次算是我們第二次「約會」。