從西鐵醒返之後……: 44
Vanessa竟然向我衝過嚟，伸出手諗住掂落我度！
我即刻後退，避開咗第一下，但Vanessa繼續追上嚟。
「乜嘢大家打和，大家都唔使死，簡直狗屁一通！」Vanessa表情變得猙獰，「最後人數打和嘅話，結果一定係全部人都會受懲罰，而唔係無事就真！」
身後已經係牆壁，我再無路可走！
就喺Vanessa即將要掂到我嘅一刻——
『接觸判定——』
兩道重疊嘅機械式聲音響起。
其中一道聲音係由Vanessa嘅手帶響起，另一道則係來自搭喺Vanessa膊頭上嘅手。
『紅方取勝，藍方被捕捉。』
原本差啲就掂到我嘅Vanessa忽然噴出一口鮮血，之後鮮血從佢嘅眼睛、鼻孔同耳孔中流出。
「點解……噗哈！」Vanessa手掩住嘴巴，而佢手帶亮出嘅藍光漸漸熄滅。
咚一聲，Vanessa就倒在地上不停抽搐，而我望住原本Vanessa身後嘅位置。
「你太大意。」剛一鎖緊眉頭，「佢睇穿咗我喺出面守住你，估到你係細數字，所以一直喺度搵緊機會殺死你，而唔係真心想同你合作。」
原來係咁……即係Vanessa嗰下無心嘅握手，其實係故意嘅陰謀。
「對唔住，我太大意。」我低下頭向阿剛道歉，「但係點解呢度一個人都無？」
「可能佢哋認為我哋已經失敗咗，計返時間其實差唔多。」
「兩位，事情並非如此！」
一把聲音從廁所傳出，房門慢慢被推開，而行出嚟嘅人原來係神父！
「神父……」如今我無暇去兼顧其他人稱呼，「點解你會一個人喺度，呢度發生咩事？」
「啱啱我哋遭受到敵人襲擊呀！」神父嘅表情帶著餘悸，「方才遊戲開始，兩位又未返嚟，於是心急如焚嘅各位就出去睇睇咩情況，誰不知就遇到幾個人同時襲擊！」
竟然……咁快就將我哋嘅藏身點搵出嚟！
「之後大家就被迫分散逃離咗呢度，只得我一個匿咗喺度。可能係得到上帝眷顧，佢哋並無進入屋內進行搜索，否則我可能就已經遇到不測。」
「睇嚟對方決意要執行指令，呢場戰鬥無可避免。」剛一眼神變得凌厲。
「等等……」我截停剛一，「或者事情重有轉機——」
我未講完，剛一就即刻講：「唔通你重諗住兩邊打和？我哋已經殺咗對面一個人，從嗰刻起就已經返唔到轉頭。」
「咩話？你哋已經殺咗對面嘅人？」神父大吃一驚。
正當我打算回答時，廣播突然響起。
『玩家人數發生變動，紅方：9人，藍方：8人，請各位繼續努力。』
「而家對方知道之後，唔會再向我哋留手。」剛一繼續講，「我唔知你係因為大愛定係對面有認識嘅人，但係犧牲難以避免，你要認清楚我哋而家唯一嘅路，就係絕對唔可以輸畀對方！」
剛一，佢或者講得無錯。
呢場遊戲牽涉到嘅唔止係夏舞同駱譯嘅性命，重有莉莉、鬼仔、詩詩、Ellie、阿曉……
大家都係拼上性命去進行搏鬥。
我深思熟慮之後，然後講：「我明白啦，我哋而家就去搵我哋嘅同伴，詩詩、阿曉……有幾個人數字比較細，佢哋處境可能好危險。」
「咁就差唔多。」剛一點一點頭。
「然後……」我望向神父，「雖然你擁有住特殊能力，但我唔打算犧牲你條命去發動呢個特殊能力。你就留喺間屋度將門鎖實，無論係邊個都唔好開門畀佢。」
「好、好……」神父不停點頭。
「直到遊戲完結為止都唔好開門，你一定要記住！」我再三強調。
「我會㗎喇，兩位，務必小心！」
同神父交代完之後，我同剛一就出發去搵其他人。
無錯，大家都係拼上性命去搏鬥。
所以我都要拼上性命去進行我嘅搏鬥。
一開始雙方放棄遊戲嘅計劃雖然失敗，但我並無放棄打和嘅念頭。只要可以將我哋嗰邊所有人搵出嚟，一樣可以雙方阻止紛爭。
我哋沿住後樓梯跑去其他樓層，啱啱由十樓落去五樓時唔察覺到其他人，所以我哋決定由五樓向下搜索落去。
經過三樓時，一陣腳步聲從防煙門後傳來。
「有無人……有無其他人……」一把微弱嘅女性呼叫聲傳出。
我望向剛一，剛一好快就明我心諗緊乜。
「我睇一睇。」剛一輕輕推開門，然後探頭出去望，「係我哋嗰邊嘅人！」
我同剛一即刻出去走廊睇，眼前有兩個手繫紅色手帶嘅女仔跑緊……
係詩詩同埋泰拳女！
「詩詩！」我上前叫道。
「……大哥哥？」詩詩氣喘如牛停低落嚟，以驚詫嘅目光望向我。
走廊上只係得佢哋兩個，佢哋並唔係被人追緊。
泰拳女跟隨腳步停下，然後露出質疑嘅目光問：「你哋啱啱唔係去咗交涉咩？你哋人影又唔見，我哋一出到去就俾對面襲擊！」
「對方無派人嚟交涉。」我照實講出。
「……咩話？」泰拳女訝異咁叫咗聲。
「對方咁樣做嘅意思，即係從一開始就諗住要將我哋趕盡殺絕？」詩詩慌亂咁問。
「亦可能係因為佢哋無考慮到雙方打和呢件事。」我將另一個猜測講出，「不過點都好，而家集合返其他人最重要，你哋知唔知其他人去咗邊？」
問完呢個問題，詩詩就好心急咁講：「鬼仔佢自己一個去咗——」
「哈哈哈哈哈！你兩個𡃁妹終於肯停低落嚟喇？」
「大鑊……！」泰拳女臉如。
喺走廊另一端，有個十分高大嘅身影行緊過嚟——
係堅哥，1609嘅人，愛兒嘅同伴之一！
雖然對佢嘅樣無咩印象，但佢可以話係我見過最大隻嘅人。
而且聽講第二場遊戲嘅末段，我落咗去地下大堂阻止李sir時，佢到最後都係反對「全部房間唔達成指令」，重諗住靠蠻力突破，好彩多得修洛文阻止咗佢。
「我哋要快啲走……！」泰拳女準備轉身逃走。
「你哋兩個同我受死……」堅哥講講下，忽然停頓落嚟，「……係你？」
堅哥甚至停低步伐，愣然嘅目光凝視住其中一個人——
呢個人就係我。
堅哥望住我，忽然雙眼泛起淚光，露出傷心嘅表情。
「係你……係你害死愛兒！」堅哥指住我大吼一聲。
「……我？」再次被提及嘅愛兒，同埋突如其來嘅指控，令我一時反應不及。
「就係喺學校玩鬼捉人嘅時侯，當時我終於喺飯堂度遇到愛兒，我叫佢同我一齊匿埋，但佢話要去搵你而自己一個人跑咗去游泳池。」堅哥舉起手，抹一抹臉上淚痕，「之後無耐，我去到游泳池時，就發現咗愛兒嘅屍體！」
竟然……發生過啲咁嘅事？
「愛兒係我由細睇到大嘅世侄女，你竟然害死咗佢，我絕對唔會原諒你！」堅哥悲憤大吼。
「我唔理你原唔原諒，總之我而家就要走路。」泰拳女無視堅哥，向我哋啱啱出嚟嗰條後樓梯跑去。
但當泰拳女跑到過去時，一抹身影從後樓梯間出現——
今次出現嘅人，係第二場遊戲曾作為古朗嘅同伴向我哋提出合作，兼且鬼仔嘅唯二生還同學——雷爺。
「九減四等於五……」雷爺掃視我哋一眼，好似已經唔記得咗我，「今次我哋可以拋離返佢哋。」
但令我驚訝嘅唔係堅哥同雷爺嘅出現……
而係緊隨雷爺之後，從後樓梯間出現嘅另一個人——
「駱……駱譯！」我以為自己睇錯，但企喺雷爺後面嘅的確係駱譯。
「你……點解會喺度？」堅哥見到駱譯，收起咗悲傷嘅表情，一臉狐疑盯住駱譯。
「係佢自己話驚要跟過嚟。」雷爺好求祈咁講，「快啲搞掂佢哋先啦。」
堅哥同雷爺咁有信心，莫非佢哋當中一個係9，另一個係8……？
泰拳女係1號，詩詩係3號，我係4號，數字都非常小。
咁嘅話，我哋嘅情況的確不妙。
堅哥徑直向衝過嚟，而且佢嘅視線係聚焦喺我身上。
「喂！你做乜嘢！」身後忽然傳出雷爺嘅叫聲。
原來駱譯從後面將雷爺捉住咗！
「你哋快啲走呀！」駱譯猛然箍實雷爺，然後向我哋大叫。
「你……！」雷爺咬牙不停掙扎亂甩，但身型瘦削嘅駱譯臉都紅晒咁死命箍實雷爺。
駱譯，佢竟然為咗救我哋而咁樣做……！
我哋唔可以辜負駱譯嘅心意！
「我哋快啲走！」我向佢哋示意，向駱譯方向嘅後樓梯跑去。
但與此同時，堅哥已經追到上嚟，佢甚至無視泰拳女同詩詩，直接向我衝過嚟！
「你哋行先。」
剛一竟然停低落嚟，轉身向住來勢洶洶嘅堅哥。
「係你迫我，唔好怪我。」剛一一掌拍落堅哥胸口。
『接觸判定——』
「噗哈—！」
一抹鮮血直接濺落剛一身上。
堅哥咚一聲跪落地上，神情十分痛苦咁嘗試掙扎。
滴答滴答——
鮮血一滴一滴從剛一身上滴下……