從西鐵醒返之後……: 43
無錯……係可以令所有人唔使死嘅方法。
我講完呢句話之後，大家都將視線放落我身上。
「係咩方法？」行山男皺起眉頭問。
「規則係講遊戲完結後，人數較少一方會全員受懲罰，但如果係雙方人數一樣呢？」
「係喎，上面無講過兩邊人數一樣都會受到懲罰！」鬼仔恍然大悟，興奮咁叫出嚟。
「無錯，既然無其中一方嘅人數較另一方少，咁自然就唔會受到懲罰。」我講，「雙方一開始各自有九個人，如果大家選擇唔參與呢場遊戲，就唔會有任何人死，咁兩邊都可以生存。」
「無講唔代表唔會，你點樣百分之百確定呢件事？」泰拳女問。
「無錯，同埋即使真係咁樣，但你又點說服到另一邊嘅人可以放棄呢場遊戲？」行山男質問。
「證據在於篩選，既然挪亞係有目的去進行呢場篩選，一定唔係單純想困喺度進行死亡遊戲，而係確實想將一啲人篩選出嚟。」我將我嘅猜測道出，「至於點樣說服……雖然唔百分之百肯定，但我諗對方一定會派某個人過嚟交涉。」
無錯，直覺話畀我知同我交涉嘅人一定係佢。
「如果係佢嘅話，我有信心說服佢。」我有信心咁講，「萬一最後真係唔係佢，我都會盡全力說服對方。既然雙方可以唔使互相殘殺就通過遊戲，我相信佢哋一定唔會反對！」
其實我心中無全面把握，但我必須要信心十足咁向大家講。
因為，咁樣先可以拯救到大家。
唔會再有人因為呢場遊戲，呢個篩選而死去。
「我……同意阿逸嘅講法。」莉莉竟然第一個開口支持。
「無錯，如果咁樣可以大家都唔使死嘅話，我一定會支持呢個做法！」鬼仔提起精神，大大聲咁講。
「避免爭拗，係上帝想見到嘅畫面。」神父微笑住講。
「如果……真係有咁嘅方法，咁我都唔反對嘅。」泰拳女低聲咁講，「至少唔使冒住風險去做1號仔。」
「呢個或者係個對大家有利嘅做法，但亦存在住交涉失敗嘅風險。」行山男講出佢嘅疑慮，「萬一真係失敗，咁我哋就唔需要同對方留手，盡可能將對方殲滅。」
「我哋點知係成功定失敗？」詩詩問。
「我會喺十分鐘之內返嚟，如果十分鐘之後都唔見我嘅話，就當我失敗咗。」我講。
「等等，我都陪你去。」行山男突然提出建議，「你個數字唔夠大，當係買個保險。」
「好，無問題。」
大家都對呢個決定無異議，而屏幕上嘅倒數計時已經唔夠十分鐘，所以我哋要捉緊時間前去交涉場地。
我同行山男離開呢度，前去指令上所講嘅目的地——1001室。
臨走前，我特意望一望大門，原來呢度係511室。
呢棟大廈係「Y」字形嘅公屋大廈設計，升降機喺中心點位置，而沿住中心點分岔出去嘅三條走廊都有後樓梯。
走廊燈光有啲昏暗，除咗我哋本身嗰個單位之外，其他單位嘅鐵閘同大門都鎖死咗。
「多謝你跟埋你。」我向行山男道謝，「我應該點稱呼你？」
「剛一。」
「我叫阿逸。」
我哋沿住樓梯上到去十樓，行到1001室，係其中一條走廊盡頭嘅單位。
鐵閘並無鎖實，我將鐵閘拉開後，然後推開大門。
「呢度……」剛一愣望住屋內。
一打開門，就見到有一堆血陣同血字嘅牆壁，屋內只有十分昏暗嘅燈光，十分詭異。
「又係挪亞嘅惡作劇……」我皺起眉頭。
剛一瞧一瞧屋內情況，然後講：「規則講明每組只可以派一個人入去，你入去先，我會喺出面睇住。」
「出面交畀你。」
我入咗去之後，細心咁望望屋內。呢度咩傢私都無，只有四道牆以及一堆寫到好似打風咁，而且睇唔明嘅血字。
唯獨係其中一面牆上寫住一個清晰嘅英文字——
『Genesis』
創世紀。
第一眼我認唔出呢個英文字，但唔知點解印象中又好似見個呢隻字。
挪亞、Revealation、End and Rebirth……而家又多一個線索，而且除咗第三個之外，呢啲線索好似都同《聖經》有關。
我企喺呢間屋入面靜靜等待，而剛一就喺出面等。
如果成功嘅話……大家係咪就會得救？
如果成功嘅話，大家就唔使互相殘殺，直到遊戲完結。
等等……
啱啱挪亞講遊戲規則時，係講每回合都會發放一個指令，換言之鬥獸棋只係第一個回合……
之後可能會有第二、第三，甚至更多回合……
直到死剩最後一個人。
『二十分鐘交涉時間完結，遊戲正式開始，請在兩小時內盡可能殲滅對方人數！嘻嘻嘻嘻嘻嘻嘻！』
咩話……？
交涉時間完咗，但係……對方竟然無人嚟！
「剛一！」我叫喚剛一，然後行出單位。
「阿逸……小心。」門外嘅剛一卻將我截住，「睇嚟對面從一開始就無諗住派人嚟交涉。」
喺走廊嘅另一端，有個灰色頭髮嘅少女企咗喺度。
雖然因爲燈光昏暗關係而望唔清對方臉孔，但我好肯定佢唔係我哋嗰邊嘅人。
佢，係對面組嘅人。
灰髮女以疑惑嘅目光同我哋對望，然後突然向我哋跑過嚟！
佢手上冒起淡淡嘅藍光，與此同時我亦發現手上嘅手帶亮著紅光。
無錯，遊戲已經開始咗！
「你入返屋先，我嚟同佢玩——」
「剛一，等等。」我打斷剛一嘅話，然後向灰髮女講，「你等等先，我哋對你哋無敵意，而且有嘢想同你哋講。」
灰髮女聽到後停低腳步，皺起眉頭望住我。
「我有個方法可以令我哋雙方唔使對戰，而且所有人唔使死嘅方法。」
灰髮女緩緩開口問：「……係咩方法？」
「只要我哋雙方咩都唔好做，等到遊戲結束就得。」我向灰髮女講，「規則只係話會懲罰人數較少嘅一方，但如果兩邊人數一樣，無其中一方比另一方少，就自然唔會有人要受到懲罰。」
「……你講真？」灰髮女依然保持疑惑。
「無錯，我哋嚟交涉就係為咗向你哋表達呢點，希望大家可以合作，唔好墮入挪亞互相殘殺嘅圈套！」我繼續解釋，「我嘅同伴已經放棄呢場遊戲，只要你哋肯嘅話，呢場互相殘殺嘅遊戲就可以即刻中止！」
「就係咁，何況你哋都無十足把握贏到我哋，不如大家就咁放棄。」剛一補多句。
灰髮女深思熟慮咗陣，然後答：「如果可以，我都唔想打一場十足把握嘅仗，我可以接受你哋嘅建議。」
聽到灰髮女答應，心裡頓時鬆一口氣。
「老實講，我都厭倦咗呢場篩選……如果係可以咩都唔使做，就完結呢場遊戲嘅話，我會揀呢個選擇。」灰髮女似乎放低咗敵意。
「但得你一個同意無用，遊戲依然係開始咗。」剛一講。
「我可以帶你哋一齊去說服佢哋，我哋啱啱先出發，應該唔會走得太遠。」灰髮女講，「點樣，呢個係我做到最大能力所限嘅事。」
「無問題，多謝你肯理解我哋。」我講。
「無咩相干，我都唔想再見到有人犧牲。」灰髮女行過嚟，向我伸出手，「我叫Vanessa，點稱呼你。」
「我叫阿——」
當我諗住握落Vanessa隻手時，我醒起遊戲已經開始咗！
我即刻將手縮返埋去！
Vanessa見到之後，一臉唔好意思咁向我講：「啊、啊！Sorry！我差少少就唔記得咗！」
「喂，我講定先，我嘅號碼絕非細數字。」剛一嘅語氣變得嚴厲起嚟，「雖然你話肯同我哋合作，但我未完全信任你，如果你敢輕舉妄動，我就會唔客氣。」
「我、我啱啱真係唔小心！」Vanessa連忙解釋。
「剛一，既然Vanessa話肯合作，咁我哋就唔好喺無謂嘢度爭拋。我哋除咗要說服對方其他人，重要返去同我哋嘅同伴報告。」
「你哋嘅同伴？」Vanessa問。
「係，佢哋喺度等緊我哋。」我講。
我、剛一同Vanessa三個離開走廊，行到後樓梯處。
「咁我哋而家應該說服我嘅同伴，定跟你返去同你哋嘅同伴報告先？」Vanessa問。
「我同佢哋講過成功嘅話會喺十分鐘之內搵佢哋，所以要盡快搵佢哋先。」我答。
「喔。」Vanessa點頭道。
我哋沿住後樓梯行返落5樓，不過由於剛一並唔信任Vanessa，所以要求Vanessa行最頭，剛一就行中間，保護住數字比較細嘅我。
當我哋到達我哋本身個單位，即係511室時，卻發現鐵閘大門打開，裡面卻空無一人。
「佢哋……去咗邊？」我進入單位，訝異望住屋內環境，「唔通佢哋以為——」
「小心！」剛一突然大叫。
我回頭一望，然後——