從西鐵醒返之後……: 31【4/F 荒山求生】
＊
啱啱燈光突然熄滅，我哋為免失散，決定互相拖住大家嘅手。
但幾秒之後，出現喺我前嘅係一片荒山野嶺，而且天空漆黑一片，眼前視野十分昏暗。
身邊所有人都唔見晒，只係得返我一個。
「夏舞！駱譯！莉莉！」
我大聲叫喚，但係並無人回應。
睇嚟結果我哋都係失散。
腳下係一片鬆散嘅泥地，周圍只有一堆雜草，同埋幾棵就嚟枯萎嘅樹木。
不過我肯定呢度唔係普通嘅荒嶺，而係山上，因為喺不遠嘅前方係懸崖。
我行到懸崖邊上，包圍住山嘅只有一片白霧，完全見唔到有其他景色。
事到如今，亦無咩再好驚訝。
『咳咳咳！歡迎大家嚟到第四層遊戲，唔知大家有無掛住我呢？哈哈！』
挪亞嘅聲音四方八面咁傳出，但我觀望四周，見唔到有任何可以用作廣播嘅器材。
喺前三個遊戲，挪亞都會透過唔同器材進行廣播，但今次挪亞連呢點都放棄，睇嚟佢已經完全放棄咗「合理性」呢樣嘢。
『經過啱啱嗰場遊戲，可以嚟到呢度嘅人都已經係精英中嘅精英，正符合我篩選要求。不過啊……目前為止進度仍然非常慢，重有八十一名生還者，所以啊……我決定將所有玩家隨機咁平均分為兩組，分別傳送到兩個場地同時進行遊戲，增加遊戲刺激性。』
竟然分成兩組喺唔同地方進行遊戲……咁我哋咪有可能會被拆散到唔同地方？
駱譯、莉莉、修洛文……重有夏舞！
『我而家呢段廣播係兩邊玩家都會同時聽到，不過之後落嚟兩邊就會分開進行遊戲㗎啦！而家我為大家介紹遊戲規則，第四層遊戲係——荒山求生。呢個遊戲同第一層遊戲一樣係採用回合制，你哋而家被傳送到去山上，每一個回合都會播放一段音樂，當音樂完結之後你哋必須要將藏喺山上嘅鐵罐搵出，然後踩扁佢。』
聽落好似玩緊「爭凳仔」咁，但係踩鐵罐又令我諗起「踢罐子」呢個遊戲。
『鐵罐嘅數量係有限，嗰個回合山上所有鐵罐已經被踩扁晒但仍未踩扁鐵罐嘅話，就會受到懲罰。順帶一提，如果喺音樂未完結前就偷步踩扁鐵罐，又或者踩扁多個一個鐵罐，都會受到懲罰，就好似你玩「爭凳仔」一樣！』
呢場遊戲，同之前嘅遊戲嘅性質完全唔同……
係一定會有人要受懲罰嘅遊戲！
即使係前三場遊戲，理論上係有可能喺無人死嘅情況下過關，但呢場遊戲唔同——
就如同「爭凳仔」一樣，既然鐵罐數量有限，咁一定有人踩到有人踩唔到，踩唔到嘅人一定會受到懲罰！
『今次我做好人，提下大家喇！遊戲係無限時，為咗維持各位玩家嘅狀態，我哋會喺唔同地方投下補給箱，補充玩家嘅需求同埋提供所需用品。至於遊戲嘅過關條件，十分簡單——』
挪亞以輕佻嘅語氣講出如同噩夢般嘅說話：
『當身處場地嘅玩家人數削減剩九個人時，遊戲就會完結。嘻嘻嘻！』
身處場地只可以剩低九個人，兩個場地……即係要喺八十一個人之中，只有十八個人可以生還！
咁嘅話，其餘嗰六十幾個人就一定要死！
挪亞佢，根本就唔諗住畀所有人一條生路！
『重同大家講多個好消息，成功通過遊戲嘅人，將會獲得最終層遊戲嘅參加資格。無錯，只要通過最終層遊戲嘅人，就可以成功從呢場篩選中解放，係真真正正嘅解放！』
下個遊戲會係最後嘅遊戲，但呢刻我並無任何興奮情緒……
因為，只有十八個人可以到達最後一關。
『我好期待係見到邊十八個人成功去到最後一關喔！嘻嘻嘻！事不疑遲，大家明白遊戲規則嘅話，遊戲就即將開始！』
挪亞嘅聲音消失於廣播中，取替而嚟嘅係另一把機械式嘅聲音。
『玩家數目為四十二人，鐵罐數目四十個，音樂即將播出。』
廣播完結後，一首純音樂隨即傳出，音樂旋律雖然單調但係有種詭異感覺，就好似恐怖片嘅開場曲一樣，不知不覺間令人變得緊張起嚟。
眼前視野大約只有十米咗右，連遠少少嘅道路都完全睇唔清。
好彩，我身上重有一樣嘢。
我將電話拎出，然後打算開閃光燈。
但係……無論我點樣撳掣，屏幕都係無著！
唔通電話無晒電？但係無理由，我記得喺西鐵嘅時侯電話至少有三分二電量，之後我一直無用過電話，按道理應該唔會咁快無晒電先啱……
唯一嘅解釋，就係挪亞做嘅好事。
我放棄咗閃光燈呢個選項，摸住黑向前行。
老實講我而家毫無方向，先唔講喺呢個環境底下要搵一個鐵罐係有幾咁困難嘅事，而且玩家嘅拆散同埋遊戲嘅過關條件，令我心神無法專注。
夏舞、駱譯、莉莉、修洛文，你哋一定要喺呢座山上面啊……！
行咗無耐，我喺路邊嘅一張長椅上發現一個斜孭袋，我拉開斜孭袋嘅拉鏈，裡面除咗有小部分乾糧外，重有一個電筒！
睇嚟呢個就係補給包，我將電筒開著，霎時前方變得明亮起嚟！
雖然照射範圍唔大，但總好過摸黑行路。
我斜孭袋孭起後，就繼續前進。
一路上嘅路徑都非常清晰，唔需要左穿右插草叢同樹林之間。
音樂仍然未停止，我繼續向前尋找鐵罐。
終於，喺離我大約十米遠路旁嘅草叢，我發現咗個隱約似係鐵罐形狀嘅物體！
正當我打算行過去時，一抹身影飛快地從草叢躍出，向我嘅頭部飛踢過嚟！
我霎時向後避開，然後照向眼前人。
「……係你？」我驚訝咁講。
「喂，你唔係咁快就唔記得我個名啊嘛？」眼前呢個著住校服嘅短髮女仔講，「我重記得你叫咩名㗎，阿逸先生。」
「Suki。」我道出對方名字。
Suki企喺鐵罐前，拎住電筒，同樣孭住斜孭袋。
「呢個鐵罐係我發現先。」我皺起眉頭，不悅咁講。
「但係我行咗過嚟先，所以呢個鐵罐係我嘅！」Suki舉起手擋住，「你咪使指擬同我爭！」
雖然對方係女性，但從佢啱啱踢得比之前重要高嘅嗰一腳，或者佢本身識得跆拳頭之類嘅武術都唔定。
更何況我唔想同佢糾纏，不過……有一件事我想問佢。
「你同古朗離開咗化學室之後發生咩事，點解……佢會斷咗一隻手臂？」我向Suki問。
Suki聽到之後露出詫異嘅表情，然後平淡咁搖一搖頭講：「原來你之後見過佢，我都唔知佢斷咗隻手臂。」
「究竟發生過咩事？」我忿然追問。
「你做咩咁想知道？定係……佢已經死咗？」
「你……！」我握緊拳頭。
Suki反咗下白眼，嘆一口氣講：「我同佢本身走甩咗，搵咗個位匿埋，但佢堅持話要返化學室搵你哋，咁我咪陪佢返去囉！殊不知途中就遇到小丑，我哋跑咗好耐都撇唔甩個死人小丑，於是我就將佢推跌，然後自己一個人撇甩佢哋先。」
「古朗就係因為咁樣，先會俾你害死。」我諗起古朗最後嘅情景，就不由然感到憤怒。
「我都係無計先咁做，一個人死總好過兩個人死。」Suki試圖為自己辯解，「就算係其他人都會咁做喇，如果係你，你唔通唔會咁做？」
「我唔會。」我否定Suki嘅話，「我會搵出一齊逃脫嘅生路。」
「哈哈哈！」Suki低頭笑咗聲，「徹頭徹尾嘅偽善者。」
「……咩話？」
Suki抬起頭，然後挪揄道：「有好多人都會好似你咁冠冕堂皇，但試問有幾多人真係咁偉大先得㗎？」
「我——」
當我想反駁Suki嘅話時，背景音樂突然停止落嚟！
「睇嚟傾偈時間結束。」Suki將腳下嘅鐵罐踩扁，「你再唔快啲搵到鐵罐，下個死嘅人就係你。」
無錯，而家唔係同Suki紛擾嘅時侯，我要盡快搵到鐵罐出嚟先！
我從Suki身邊掠過，然後一邊向前跑，一邊用電筒照住草叢，睇下會唔會有鐵罐喺隱蔽地方！
轟隆—！
爆炸聲突然從上方傳出，震得我耳鳴起嚟！
我望向聲音方向，爆炸來來自上方不遠嘅某處山徑，而且更冒起熊熊火光！
點解……會發生爆炸？
上方頓時變得光亮，火焰霹靂啪嘞燃燒雜草，但我無法睇清究竟發生咩事。
只不過，而家唔係理會呢啲事情嘅時侯。
我無視上方山徑情況，繼續向前奔跑。
終於，喺雜草叢同幾棵樹之間搵到一個綠色嘅鐵罐。
正當我諗住行過去將鐵罐踩扁嘅時侯，一道怪異嘅聲音傳出——
「嗷——嗷——」
係一道低沉嘅鳴聲從樹後發出。
「嗷——嗷——嗷——」
聲音漸漸朝我接近。
「嗷——嗷——嗷——嗷——嗷——嗷——嗷——」
嗄嘞嗄嗄嘞嗄嗄嗄嗄——
低鳴聲伴隨不規則嘅咬合聲傳來，而且呢道聲音——
並唔係人類會發出嘅聲音……