從西鐵醒返之後……: 32
低鳴聲不斷向我朝近，但鐵罐就喺我眼前。
「嗷——嗷——嗷——嗷——」
嗄嘞嗄嗄嗄嗄——
呢度環境漆黑，而且我已經耽誤咗好多時間，如果呢刻唔踩落呢個鐵罐，就未必可以搵多一個鐵罐出嚟。
但係直覺話畀我知，呢道聲音……有危險。
我雙腳不自覺顫震起嚟，內心掙扎緊應唔應該衝過去將鐵罐踩扁……
死就死啦！
我握緊雙拳衝過去，然後一嘢踩落綠色鐵罐上。
啪嘞—！
鐵罐已被我踩扁，但低鳴聲變得更加接近——
「嗷——嗷——嗷……」
嗄嗄嘞嗄嗄嗄嗄嘞嗄嗄嗄嗄嗄嗄——
「嗷……吼吼吼吼吼吼吼！」
蓬—！
幾道身型高大，雙手修長嘅黑影從樹後撲出！
我無睇清對方嘅外貌，因為喺對方未撲出嚟嘅一刻，我下意識已察覺到有危險，而即刻轉身向後跑！
「吼吼—！吼吼—！吼吼吼—！」
噠噠噠噠噠噠噠噠——
震耳嘅腳步聲從身後傳嚟，猛風不斷掠過皮膚！
我頭也不回不停向前跑，而黑影急快咁追喺我身後！
「吼吼—！吼吼—！」
噠噠噠噠噠——
「吼吼……嗷——」
吼叫聲同腳步聲漸漸變小，當我跑到路邊某個涼亭時，身後再無傳出聲音。
我回頭一望，山路上空無一人，對方無再追上嚟。
「呼——呼——」我大啖大啖咁喘氣。
啱啱嗰幾道黑影……究竟係啲咩嚟？
諗返起啱啱嘅情形，而家嘅我仍然心有餘悸。
果然，咩播放音樂，踩扁鐵罐，重咁好心將過關條件講畀我哋知，通通只係煙幕。
噠噠噠噠噠噠——
突然，有隻手拍落我膊頭上！
我嚇到即刻縮開，然後轉身拎起電筒照向眼前「黑影」。
「喂，阿逸！」
喺我眼前係個著住間條衫嘅女仔，佢舉高雙手擋住刺眼嘅電筒光。
我放低電筒，然後緩緩咁講：「原來係你……Ellie？」
我瞪大雙眼望住眼前呢個人……無錯、無錯！
眼前呢個人確確實實係Ellie！
「你啱啱發生咩事嚟……點解好似好慌張咁？」Ellie不解咁問。
「我……」
雖然啱啱經歷完驚駭嘅事情後，呢刻又遇上意料之外嘅人，但我依然盡力平復我嘅情緒。
「無，啱啱遇上啲危險，不過已經無事。」我冷靜咁問Ellie，「係啦，你踩咗鐵罐未？」
「我……踩咗喇。」Ellie回答完後問，「你呢……你踩咗未？」
「我都踩咗。」我答。
一片寂靜，音樂仍然保持停止狀態。
「既然踩扁咗鐵罐，咁我哋應該平安無事掛。」我觀望周圍，確認安全後就坐喺涼亭嘅石凳。
鐵罐數量得四十個，過咗呢個回合就會被踩扁晒。如果無估錯，應該係會每個回合根據玩家數目而刷新鐵罐嘅數量同位置，所以而家我哋無嘢可以做，只能等待下個回合開始。
音樂靜止到而家已經大約五分鐘，睇嚟要喺漆黑一片嘅山頭搵出一隻男人手左右大嘅鐵罐並唔容易。
而且呢座山有幾高，路徑有幾複雜並唔清楚，如果好似大帽山或者大東山咁高，要翻越成座山都起碼要幾個鐘時間。
肚子忽然感到飢餓感，於是我從斜孭袋中拎出食物，裡面食物全部都係能量棒、朱古力同糖呢類高熱量嘅食品。
我將其中一條朱古力遞畀Ellie，向佢講：「畀你食條。」
「喔……唔該你。」Ellie接過朱古力。
Ellie無死呢個事實令我十分吃驚，我原本以為……佢已經俾小丑殺死咗。
而家佢坐喺我眼前的確令人興奮，但當我望住佢嘅時侯，內心泛起隱隱嘅罪惡感。
「話說你哥哥呢，佢有無事？」我問。
「佢……」Ellie停頓咗下，「佢無事，多謝關心。」
「好彩你同你哥哥都無事。」我嘆一口氣，「希望你同你哥哥都喺呢座上，咁你就可以搵返你哥哥。」
「阿逸，我想問你一樣嘢……」Ellie問。
「咩事？」
「你上個遊戲嘅時侯，有無俾啲戴住面具，衣著奇特嘅人追殺……」Ellie支支吾吾道，「就好似……拎住電鋸嘅小丑咁？」
Ellie……點解突然問啲咁嘅問題？
我如實點頭回答：「有，唔單止係小丑，重有著住空姐服嘅女人，同埋著住新郎服嘅男人。」
「喔……」Ellie微微點頭。
「做咩……無啦啦咁問？」我問。
「無嘢。」Ellie微微一笑，「因為上個遊戲大家都分散咗，所以我想知其他人有無遇到同我一樣嘅情況。」
『回合結束，判定時間到，合格人數：三十三，不合格人數：九。鐵罐位置將會刷新，數目三十個，音樂即將播出。』
判定嘅廣播傳出，詭異嘅音樂再次響起，但係……
明明有四十個鐵罐，點解會得三十三個人合格？
唔通係因為啱啱我見到嗰場爆炸？定係……同我見到嘅黑影有關？
無論係邊個原因，至少知道……呢個遊戲並唔係表面上咁簡單！
如果係咁，駱譯同夏舞嘅處境會更加危險，特別係夏舞，佢根本唔係可以應對呢種遊戲嘅人！
「阿逸，音樂響起咗。」Ellie雙眼圓圓盯住我，佢嘅叫聲將我拉返嚟現實。
「喔、喔。」我跟同Ellie離開涼亭，再次沿山徑前進。
我哋行咗十分鐘，仍然未見到鐵罐，而腳下山路愈嚟愈陡峭同鬆散，我哋每行一步都變得更為吃力。
「Ellie，話說你啱啱有無見到爆炸？」我問。
「我都見到！忽然間嘭一聲，跟住就著火！」Ellie答。
「上個回合開始時鐵罐數量係有四十個，理應有四十個合格者，但結果判定得三十三個。」我將心中疑慮道出，「所以我諗……會唔會關嗰場爆炸事。」
「你係想講……」Ellie停下腳步，慌忙咁問：「附近可能會有地雷，踩中咗嘅話會爆炸？」
「唔排除係其中一個可能性，不過機會好微，但呢個遊戲存在陷阱係必定。」經歷三場遊戲之後，我已經慢慢熟悉挪亞嘅本性。
無論係幾簡單嘅遊戲，佢都可以設置唔同嘅陷阱。
「咁嘅話……」
「我哋要小心行事。」我講，「其實我擔心夏舞同駱譯佢哋，我驚佢哋應付唔到呢場遊戲。」
「佢哋……？」
「係。佢哋，重有莉莉同修洛文，大家都未死。」
「喔……係咁呀。」Ellie若有所思咁講。
我哋一直向前行，途中喺路邊執到另一個斜孭袋，裡面同樣有個電筒同少量食物，不過就無水。
我將補給包畀咗Ellie後，就繼續前進，不過雙腳開始疲累落嚟，而Ellie嘅嘴唇更有乾裂嘅跡象。
我從斜孭袋中拎出唯一一支水，然後遞向Ellie。
「飲啲水先，無水撐唔到落去。」
Ellie愣望住我，然後用極為微弱嘅聲線講咗句：
「點解……點解要咁好……」
「你講咩話？」我皺起眉頭問。
「無、無咩。」Ellie接過支水，然後大口大口咁飲。
音樂依然繼續播放，而且唔知點解聽下聽下，竟然有種眼睏嘅感覺。
緩慢嘅旋律，就好似要將人催眠一樣。
大約過咗十分鐘，終於喺路中心度發現咗個綠色鐵罐。
「呢度有鐵罐喇！」我回頭向Ellie講。
「真係……」Ellie興奮望向前方，但又好似欲言又止咁。
「呢個鐵罐就歸你，我繼續向前行。」我同Ellie講。
Ellie聽完之後呆咗呆，跟住低下頭，好似唔想俾我見到佢嘅表情。
「點解……點解……」
「咩點解？」
「點解你要對我咁好……如果你係個徹底嘅壞人，我反而會安心啲！」Ellie抬起頭，臉上流下兩行淚痕。
「做咩……發生咩事？」我完全唔明白Ellie點解會咁。
「我……」Ellie欲言又止，然後深呼吸咗一口氣，「我哥哥喺上個遊戲為咗保護我死咗，我一時間接受唔到。」
「你……唔係話你哥哥無事咩？」聽到呢個消息，我感到十分驚訝。
「佢死咗，係俾戴面具嘅小丑殺死。」Ellie一邊抹眼淚一邊講。
「啊……原來係咁，對唔住。」我向Ellie慰道。
「無嘢……既然呢個鐵罐留畀我，咁你就快啲行喇。」Ellie講。
「嗯，你一個人要小心。」
因為音樂仍然播放中，即使搵到鐵罐亦唔可以踩落去，所以唯有同Ellie分開，Ellie留守呢個鐵罐附近，而我就繼續搵其他鐵罐。
我一個人繼續前行，但呢個時侯我諗起啲嘢……
——有無俾拎住電鋸嘅小丑追殺？
——我哥哥喺上個遊戲為咗保護我死咗……
唔通……
我打算回頭搵返Ellie，但此時有隻手將我推落山……
喺我跌落去嘅一刻，我見到有個纖瘦嘅身影企喺崖邊——
雖然電筒照唔到對方嘅臉容，但我已經估到對方係邊個……
「哥哥，我幫你報咗仇……」