從西鐵醒返之後……: 30【3/F Extra Ellie與阿曉】

＊

『鬼方勝利，遊戲結束。各位玩家將會在三小時後進行傳送，此段時間為第四層遊戲前的休息時間，請各位好好享受。』

當呢個廣播播出時，一抹身影喺某層上走廊行走。

「呢個遊戲完咗……？」戴住頭箍嘅少年氣喘如牛咁講。

雖然佢前兩場遊戲都一直表現出冷靜嘅表情，從未俾人見到佢慌張嘅模樣。





但面對呢場大逃殺，佢都開始感到慌亂起嚟。

開始嘅玄機，大概係在於第二個遊戲最後所發生嘅事。

喺最終指令開始後，為咗阻止其他人達成最終指令，佢同阿逸跑咗落去1409。

打開房間之後，鐵鏽般嘅血味傳來，眼前有個女人癱軟咁瞓喺梳化上，手腕有道深可見肉，鮮血如注嘅傷口！

佢行上前摸向對方嘅頸動脈，發現對方生命跡象十分薄弱。





但係女人忽然發出微弱嘅呻吟聲……或者重有得救！

「你睇住個女人，我去追！」阿逸留低咗一句後就追出去。

當時佢猶豫緊一樣嘢——佢應唔應該唔理呢個女人，一齊追落去地下大堂，阻止對手達成最終指令。

但呢個時侯，眼前女人忽然開口講：

「殺死我……我已經無救，但係我唔想受住痛苦嘅折磨，慢慢死去……」女人以懇求嘅視線望住佢，「我睇得出，你係個好人，所以麻煩你……俾我無痛苦咁死去……」





佢聽到女人嘅請求後，無法作出任何回應。

佢，猶豫緊應唔應該下手。

對方係個瀕死嘅人，受住痛苦嘅折磨，渴望乾脆嘅了結。

但即使有冠冕堂皇，殺死一個人……並唔係咁容易。

「阿、阿曉！」身後傳嚟駱譯嘅聲音，「呢度……發生咩事？」

駱譯同夏舞見到呢個情景，都展現出十分驚慌嘅表情。

「阿逸佢去追緊人，目的地係地下大堂，你哋追上去幫阿逸手先。」阿曉皺起眉望住個女人，「我……有啲嘢要做。」

「好、好！」





駱譯同夏舞離開之後，房間就剩低阿曉同眼前呢個女人。

「麻煩晒你啦……」女人氣若如絲咁講。

阿曉合上眼睛，然後用力捏落女人條頸度，只見女人張開嘴巴，發出微弱嘅呻吟聲。

過咗無耐，女人終於斷氣，露出安然嘅笑容。

只不過，作為殺人兇手嘅阿曉並唔安然，佢對殺害眼前呢個女人感到強烈嘅罪疚感。

阿曉喺走廊上走動，每當佢諗起呢件事，就會變得心煩意亂。

「嗚……嗚……」





一把哭泣聲隱約咁由附近傳出。

「嗚……嗚……」

「……係邊個？」阿曉皺起眉頭，呢把聲音……好似有種似曾相識嘅感覺。

「阿哥……阿哥……我好驚呀……我就嚟頂唔順喇……」

沿住聲音行去，終於搵到聲音嘅源頭，係女廁。

阿曉進入女廁，見到裡面空無一人，就將廁格一個一個打開。

終於，喺最後嗰個廁格，阿曉搵到哭泣聲嘅發出者。

「你係……Ellie？」阿曉喚出對方名字。





Ellie臉上流著數不清嘅淚行，當佢見到阿曉時，先係露出驚愕嘅表情，之後眼淚再次缺堤而下。

「嗚……嗚……」Ellie上前擁抱阿曉。

阿曉霎時間不知所措，換著係以前冷靜嘅佢，佢或者會冷冷咁對待Ellie。

但因為殺人嘅罪疚感喺佢心中植芽，令佢唔敢再次傷害另一個人。

阿曉將手放喺Ellie背上，然後講：「無事喇。」

「嗚……哥哥佢，為咗救我，俾個戴面具嘅小丑殺死咗啊……嗚……」Ellie伏喺阿曉胸口上痛哭。

原來發生啲咁嘅事，難怪佢會一個匿埋喺廁所喊，阿曉心諗。





「你已經無事，遊戲已經完結，唔會有人嚟殺你。」阿曉唔識安慰人，只月用生硬嘅語氣講。

「但係……哥哥佢唔再喺我身邊，我一個人好驚……」

「我……」

阿曉腦海中有一句話，但呢句話並唔適合佢嘅性格。

然而，佢都係將呢句話講出。

「我會保護你。」

為咗嘗試做好事去彌補心中罪疚感，阿曉做出呢個選擇。

Ellie聽到之後亦停止哭泣，淚汪汪望向阿曉問：「係咪真㗎？」

阿曉猶豫咗一下，最後答：「……嗯。」

「嗚……你會唔會好似哥哥咁掟低我……我好驚……」

「唔會唔會。」

「真嘅？」

阿曉望住Ellie充滿淚水嘅誠懇眼神，佢無法拒絕呢個女仔嘅訴求。

佢用力合上眼睛，然後講：「我墨曉龍發誓，會好好保護你。」

Ellie聽到之後，終於停止哭泣，破涕為笑。

「多謝你……阿曉。」Ellie放開阿曉後，抬起頭向阿曉講：「我……有個請求……」

「……係咩？」阿曉皺起眉頭。

「我想你幫我——」

喺Ellie同William匿喺課室嘅時侯，Ellie見到課室外有幾道身影掠過。

唔夠十秒，小丑就衝咗入嚟課室，將課室嘅人一殺而盡。

Ellie嘅阿哥William犧牲咗自己嘅性命，換取機會俾佢阿妹逃走。

Ellie認得其中一道掠過嘅身影——

呢刻，Ellie露出仇恨嘅目光。

就係嗰個人……就係嗰個人害死我阿哥！



我絕對唔會放過佢！

＊

第三層遊戲生還者補充：
Ellie
墨曉龍