從西鐵醒返之後……: 29
「你……係講真？」我再次確認新郎嘅意願。
「係，我知難為咗你，但你可唔可以……」
「你為咗生存接受咗特別挑戰，但點解呢刻你想放棄性命？」
「我……無法承受到有咁多人死喺我手上，每次殺人嘅情景依然喺我腦海中不斷徘徊，我想忘記呢一切，唔想再繼續玩個遊戲。」新郎企起身，慢慢咁講，「同埋，呢個係我唯一贖罪嘅方法。」
「贖罪啊……原來係咁。」
我慢慢步向新郎，然後伸出我嘅雙手，準備捏落新郎嘅頸部。
聽講捏實人條頸會有兩種死法，分別係氧氣無法流入肺部窒息而死，同埋血液無法流入大腦缺氧而死，前者死法痛苦，後者死法輕鬆。
我最後嘅溫柔，大概係用呢個較輕鬆嘅手法殺死佢。
但當我雙手放到佢頸上時，我發現……
我做唔到。
我將雙手緩緩放下，新郎愣望住我。
「對唔住，我落唔到手。」我講，「但係，我唔認為死係贖罪嘅唯一方式。既然想彌補自己嘅罪行，就應該繼續生存落去，以痛苦嘅回憶懲罰自己。然後，同我贏出呢場篩選，再去向挪亞報仇！」
「生存……」新郎驚愕咁講。
「無錯，唔好淨係用死逃避問題，贖罪重有其他方式，你嘅性命唔可以到此為止。」我堅決咁向佢講，「用你條命去贖罪，當所有事情完結之後，你就可以有面咁就見你未婚妻。」
「性命……用條命嚟贖罪，即使毫無尊嚴都苟且偷生落去嗎？」
「嗯。」我向佢伸出手，「你願唔願意？」
新郎流下兩行淚水，苦苦一笑。
「如果係我未婚妻講，我點都話願意。」新郎握住我嘅手，「不過，我就接受你嘅好意。」
「你叫咩名？」
「我叫Frankie。」
「Frankie，我哋落去先，我嘅同伴喺下面等緊我。」
「好。」
我轉身準備離開呢度，但當我行到樓梯口時，我察覺到一件事——
「Frankie！」我轉身望去，Frankie並無跟上嚟！
「阿逸，多謝你對我呢個殺人兇手最後嘅溫柔，但係果然……我無法承受自己嘅罪孽！」
Frankie爬上籃球場嘅外欄，然後從天台一躍而下！
嘭—！
不遠方傳來一聲巨響。
喺Frankie爬上外欄嘅一刻，我其實有時間去阻止佢。
不過我並無咁做。
理解對方嘅痛苦後，作出最後呢個選擇——呢個係尊重對方意願嘅最後答案。
我忽然諗起母親同我講過嘅一番話。
「被拯救者大概可以分為四類——身處於痛苦中而渴望被拯救嘅人、拒絕他人嘅救助但內心渴望得到拯救嘅人、內心渴望得到救助但無論如何都無法拯救嘅人，以及最後一種——既唔想被拯救，亦無法出手拯救，只可以望住對方自生自滅嘅人。」
Frankie，大概係屬於第三種人。
至少佢最後嘅幻想，一定係再遇見自己未婚妻嘅情景。
遊戲已經完結，我即刻跑返落去室內游泳池夏舞。
雖然沿途見到唔少嘅屍體，但仍然生存緊嘅人總算係捱過咗呢場遊戲。
「已經完結喇。」我將夏舞扶起，準備帶佢去醫療室。
經過愛兒身旁時，我停低落嚟，將佢嘅身體瞓返好，然後用手輕輕將佢雙眼合上。
「呢個女仔……」夏舞望住愛兒。
「佢為咗搵我，所以先嚟咗呢度。」望住愛兒，有種心痛嘅感覺，「遊戲一開始時，係佢救咗我一命。」
「咁嘅話……」夏舞憐憫咁望住愛兒，「你一定要好好珍惜佢嘅心意。」
「嗯。」
唔單止愛兒，重有古朗……同埋Frankie，佢哋三個人最後嘅心意，我係永遠唔會忘記。
之後，正當背住夏舞準備去醫療室嘅時侯，就遇到駱譯同莉莉等人。
回到現在，醫療室內剩低我、夏舞、駱譯、莉莉、修洛文同倪少賢六人。
「兩個幾鐘之後，又要開始新一輪遊戲。」駱譯不安咁講。
「無錯，但係我已經好攰。」莉莉坐喺凳上，雙手掩臉咁講。
「我出一出去吸下新鮮空氣先。」
我行出醫療室，企喺空地上，望住頭頂上嘅天空。
天空雖然一片蔚藍，但係並無帶給我哋「希望」。
「Hey！佟逸霖。」倪少賢行到我隔籬。
「倪少賢。」我瞇起眼望住佢，「估唔到你會幫手打敗面貝人。」
聽駱譯所講，最後一個面具人係由佢哋打敗，總共有四個面具人，如果無估錯嘅話——
應該係「喜」、「怒」、「哀」、「樂」。
「怒」係單車手，「哀」係Frankie，呢兩個顯而易見，唯一難分嘅係「喜」同「樂」，差別在於空姐嘅面具係微笑，而小丑則係咧嘴笑。
所以「喜」係空姐，而「樂」係小丑。
「並無話咩幫唔幫，既然遊戲過關條件係咁，咁我都無得唔咁樣做。」倪少賢聳一聳肩，「我唔係嗰班抱住責任感稀釋論嘅人，必要時我都會出手。」
倪少賢嘆一口氣後，繼繽講：「唯一誤判嘅係，所謂嘅『捕捉』原來係指除面具……不過以我哋殺死單車手嘅情形睇，應該而係斷絕面具同活人之間嘅連接先啱。除咗除面具之外，直接殺死對方都可以斷絕連接。」
果然，倪少賢係個天才，永遠諗到我諗唔到嘅嘢。
「你奮不顧身咁救個女仔，睇嚟你已經揀好伴侶嘅人選。」倪少賢笑住講。
「我唔明白你講緊咩，伴侶究竟係咩意思？」我對倪少賢愈嚟愈多疑慮，「呢個遊戲，究竟你知幾多？」
「……你真係完全唔記得？」倪少賢反而疑惑咁問返我轉頭。
「你究竟講緊啲咩？」
「哈哈！」倪少賢忽然笑咗聲，「知道嘅人係你先啱，係你將呢件事講畀我知……啊！你記唔記得你父親係個點樣嘅人？」
「我唔知…」我無諗過倪少賢忽然問呢樣，「佢已經離開咗頭家好多年。」
「咁母親呢，仍然健在嗎？」
「當然健在！」我愈來愈唔耐煩，「呢啲嘢關咩事，你想講啲咩？」
「喔……竟然會係咁，究竟係意外定故意……」倪少賢無回答我問題，反而若有所思咁講，「不過為咗公平，呢個程度係理所當然，但我無諗過技術咁先進，連呢點都做到，真係令我大開眼界。」
我一手捉住倪少賢嘅衣領，大聲吼道：「你究竟知道啲咩？」
「阿逸，發生咩事？」聽到我大叫嘅莉莉從醫療室跑出嚟，望到呢個情景。
「佟逸霖，並唔係我唔講畀你知，而係你本來應該會知。」倪少賢鬆開我隻手，「如果你可以去到嗰一日，你就會記起所有事，到時你好好問下令尊。」
令尊……我父親？
「不過可唔可以到嗰一日，好睇你嘅變化。」倪少賢轉身，「如果你重係抱持住想拯救所有人嘅心，最終只會自取滅亡。」
「我……會盡我所能拯救其他人，一齊捱過呢場篩選，然後搵出真相。」
「嗯，祝你做到，不過下次我哋再見時，可能就會係敵人。」
倪少賢留下最後一句，身影漸漸變遠，消失喺我哋眼前。
「倪少賢……」
「阿逸，你哋兩個無嘢啊嘛？」莉莉呆問。
「無嘢。」我搖一搖頭，「我哋返去唞下，準備下個遊戲來臨喇。」
我返到醫療室，靜靜咁坐喺夏舞身旁，夏舞喺床上安然咁瞓著咗。
如果……時間永遠停止喺呢刻，或者都唔錯。
「逸哥，呢度有啲水。」駱譯遞咗個紙杯畀我。
「唔該。」我接過水杯，然後一口氣飲晒去。
「修洛文先生……」駱譯膽怯咁望向修洛文，「你塊臉同頸都受咗傷，使唔使黏下膠布？」
「皮外傷，不成大礙。」修洛文講。
望見修洛文，腦海中忽然浮現一道疑問。
我向修洛文問：「點解特別挑戰時，你無表態贊成家明嘅決定？」
第二場遊戲嘅第一個特別挑戰出現後，我主張要接受挑戰去換取獎勵，以醫治夏舞當時嘅情況。
當時家明、傑少同莉莉係反對接受，唯獨我係持反對態度，至於駱譯並無表過態……
同樣地，修洛文亦係從頭到尾無表過態。
「逸哥，我當時都係無反對你嘅決定！」駱譯即刻講。
「我知道。」我拍一拍駱譯膊頭，「不過相比起你，我比較唔熟悉修洛文，所以唔明白點解佢會咁決定。」
修洛文雙眼瞪住我，然後緩緩開口：「重要嘅係過程而唔係結果。」
「你講嘅係咩意思？」
「無論結果係點，都要對得住自己。我明白想要守護某個人嘅心情，所以我無法對擁有相同諗法嘅人作出否定。」
「你唔驚因為咁而死咩？」
「哼……」修洛文笑咗一聲，「我有不得不生存嘅理由，但係如果否定自我嘅話，即使係活著亦再無意義。」
「突然間覺得你型咗好多，雖然係個大叔。」莉莉突然加把口，破壞咗成個氣氛。
修洛文翻弄衣袋，突然露出詫異嘅表情：「煙……點解會唔見？」
「喂！呢度室內地方，唔好食煙！」莉莉即刻大鬧，「啱啱先讚完你型，而家走嚟食煙？」
唔知係咪一齊經歷過生死，就算彼此之間唔瞭解，大家嘅關係好似變好咗一樣。
不過，並唔係所有人都會咁，就好似家明、傑少……同埋Suki。
古朗臨終時提醒我要小心Suki，就好似我哋喺化學室失散後，佢哋之間發生咗啲事情……
而家嘅氣氛比起上個遊戲喺大廳時較為輕鬆，至少……我覺得呢度存在「信任」呢樣嘢。
「逸哥，我哋應唔應該去將其他生還者聚集一齊好？」駱譯問。
「聚集埋一齊都無用，現階段又做唔到啲咩，下個遊戲開始時又會好似今次咁將我哋拆散，不如慳返啲力留喺度休息重好過。」
「你點知道又會拆散我哋？」莉莉問。
「我點知道……」
係喎……我點解會咁樣講？
突然，室內所有燈光全數熄滅。
「發、發、發生咗咩事？」駱譯嘅聲音從黑暗中傳出。
「冷靜落嚟先……應該係下個遊戲準備開始。」我講。
「又係玩埋呢啲把戲，每次都係咁樣，條友真係癲！」莉莉不忿大鬧。
此時，手掌傳來纖柔嘅觸感。
「點解會黑晒……發生咩事？」雖然睇唔到，但我知道出聲嘅係身旁嘅夏舞。
「無……啊！」因為夏舞嘅舉動，我諗到一樣嘢，「我哋全部人拖起手，咁咪唔會驚失散囉！」
「係喎！」駱譯驚嘆咁講。
我將手伸出，拖住另一個人嘅手，之後其他人又互相拖境手。
互相確認之後，我、夏舞、駱譯、莉莉同修洛文五人喺黑暗之中互相拖住大家嘅手，以防失散。
「好似有啲陰風陣陣咁嘅……」莉莉講。
我都感覺到冷風吹來嘅感覺。
突然，雙手觸感忽然消失，燈光回復原狀。
喺我眼前嘅，竟然係……
＊
第三層遊戲生還者總結：
佟逸霖
龔夏舞
駱梓譯
莉莉
修洛文
倪少賢
鬼仔
阿武
其餘未知。
第三層戰況總結：
【喜】空姐 捕捉者：佟逸霖（擊殺）
【怒】單車手 捕捉者：修洛文（擊殺）
【哀】Frankie（新郎） 捕捉者：佟逸霖
【樂】小丑 捕捉者：倪少賢（擊殺）