從西鐵醒返之後……: 28
幾下槍聲驟然響起，愛兒身上多咗幾個血洞。
「啊啊……」愛兒愣望住自己嘅胸口，然後吐出一口鮮血。
喺愛兒身後，拎住機關槍，著住染著鮮血嘅白色禮服面具人企咗喺度。
「愛兒！」我向住愛兒大叫。
「阿逸……」愛兒向我伸出染滿鮮血嘅手。
砰—！
無情嘅子彈貫穿愛兒嘅身軀，愛兒嘅手緩緩垂下，然後向前倒在地上。
新郎將愛兒殺死之後，視線移到游泳池內嘅其他人身上！
砰砰砰砰砰砰砰砰砰！
「啊啊啊啊！」
「救命呀！」
「出口喺邊度！快啲走呀！」
子彈不斷喺游泳池內掃蕩，慘叫聲四處冒起！
我同夏舞身處於游泳池前，與新郎只有一個游泳池嘅相隔，但係身邊並無大型嘅障礙物可以掩護，如同赤裸裸將條命擺喺度任由宰殺一樣。
面具人無嚟過室內游泳池，唔係因為無留意呢個地方，而係呢個地方本來就係籠中牢，只有男女更衣室兩個出口，面具人一入嚟根本無路可逃！
佢嘅目的，係要等更多嘅魚游入呢個甕後，先一網打盡。
喺右邊池邊嘅位置，有部比較大型嘅吹風機！
我拉起佢隻手，然後講：「跑過去嗰邊！」
呢一刻嘅情景，就好似第一場遊戲時，我拖住佢嘅手同佢一齊跑返到黃線後嘅情景！
只要仍有一線希望，我都唔會放棄！
差唔多跑多池邊位置時，新郎嘅視線移到我哋身上，準備將機關槍瞄向我哋！
「小心！」夏舞向我撲去，我哋一同跌落泳池中！
眼前變得一片蔚藍，耳朵依然隱約聽到槍聲，我閉上氣抱住夏舞嘅身軀，向前方池邊貼住游去，尋找掩護嘅位置！
子彈打在水面產生陣陣漣漪，雖然暫時可以避過一劫，但遲早新郎都會行近池邊，開槍射殺我哋！
咕嚕咕嚕—！
氣泡從夏舞口中噴出，夏舞露出痛苦掙扎嘅表情！
點算……點算！
我靠近夏舞個嘴，諗住口中空氣傳畀佢。
但呢個時侯，槍聲忽然停止落嚟。
喀嚓喀嚓——
係機關槍無子彈嘅聲音！
赤手空拳嘅我係敵唔過拎住機關槍嘅新郎，而呢刻係唯一機會去打敗新郎，但係夏舞面臨邊緣掙扎，就快要窒息一樣！
呢個或者係一場賭博，但亦係我哋二人唯一生存機會！
夏舞……我遲少少嚟救你！
我鬆開抱住夏舞嘅手，馬上爬上池邊上岸，只見新郎將舊彈匣除下，準備裝上新嘅彈匣。
我哋之間大約有五米嘅距離，就咁跑過去未必可以趕得切！
但係方法依然存在，千均一發之際我將其中一隻波鞋除出嚟，然後向新郎掟過去！
波鞋不偏不倚打中新郎嘅手，機關槍同彈匣從佢手中脫下！
正當佢打算執起機關槍時，我即刻跑過去，用另一隻腳狠狠咁向佢面具踢落去！
新郎俾我一下踢飛到地上，呢個時侯身後傳嚟一把聲音。
「你哋……你哋全部都同我去死！」肚腩男出現喺我身後，打算將機關槍執起嚟。
但係佢執起機關槍時，忽然青筋四現，露出十分痛苦嘅表情。
「啊啊啊！」呢個表情，就好似李sir想去殺挪亞時一樣，係體內納米機械制止咗佢！
唔通當我哋執起面具人嘅武器時，就會觸發呢個機關？
「放低把機關槍呀！」我向住肚腩男大叫，但肚腩男死命握住機關槍，然後瞄準我！
大鑊—！
喀嚓喀嚓——
機關槍傳出空匣嘅聲音，我差啲唔記得機關槍已經無晒彈。
肚腩男見狀，依然死都唔肯放手，重打算將地上嘅彈匣執起！
「噗哈—！」
肚腩男臉色發紫，噴出一口鮮血，七孔流血咁跪落地上。
……係懲罰！
機關槍從肚腩男手上脫下，新郎見到後即刻衝過去，但我搶先一步，將佢一下撲落地上。
新郎死心不息，仍然不斷掙扎！
眼前呢個面具同空姐以及小丑相當不同，嘴角係向下彎，比起歡喜笑著嘅空姐同小丑，新郎就好似展現一副傷心嘅表情咁。
但係諗起呢個人殺死愛兒，重要展現一副咁嘅表情，我就忍唔住舉起拳頭，一拳打落佢塊臉上！
啪！啪！啪！啪！啪！啪！
哐啷—！
面具應聲碎裂，而映入眼前嘅——
係同普通人無分別嘅男性臉容。
對方亦露出十分驚訝嘅表情，然後將我一手推開，頭也不回咁向住出口跑去。
面具底下嘅……確確實實係人類！
望到呢刻情景太過驚愕，令我一時鬆懈，俾對方逃去。
不過我並無追上去，因為有一件更加重要嘅事情！
夏舞！
我二話不說跳落水中，將沉落池底嘅夏舞抱住浮返水面，但呢刻夏舞已經失去意識！
「喂！喂！夏舞！」我輕輕拍落夏舞塊臉，但佢依然無反應。
我將佢救起，放到池邊，但佢已經無咗呼吸，而且心跳十分微弱……！
「唔好死……唔好死！」
我將夏舞嘅嘴巴微微張開，然後向佢做人工呼吸，之後我又按壓佢嘅胸口，嘗試令佢將肺裡面嘅人咳出嚟。
「如果下次有咁嘅情況，就唔好冒住生命危險咁做……」我諗返起之前夏舞講過嘅說話，「你白痴㗎咩，龔夏舞！唯獨係你，一定唔可以見死不救！」
我不停向夏舞反覆進行人工呼吸同按壓，然後——
「咳咳咳！」
夏舞咳出一大口水，然後慢慢張開眼睛。
「呢度係……阿逸？」
我慢慢將夏舞扶起身，不斷掃拍佢背脊，幫佢將氣管內嘅水咳出嚟。
「無事喇，面具人已經走咗，而且佢嘅武器就喺呢度。」
「係呀……咁就好。」夏舞向我微微一笑，然後忽然臉紅起嚟，靦腆咁撳住嘴巴。
我醒起啱啱對夏舞做嘅事情，同樣頓時變得臉紅耳赤。
「啱啱……我逼不得已先咁做。」我慌忙咁解釋。
「嗯，我明白……不過，呢個係……我嘅第一次。」夏舞講出驚人嘅說話。
聽到呢個事實嘅我，一時間都唔知道應該點畀反應佢好……睇嚟要用號稱記憶消除器嘅鐵槌打落佢個頭度先得。
「哈哈！」我不禁笑咗一聲。
「……笑咩？」見到我呢個反應嘅夏舞臉變得更紅。
「無……」我搖一搖頭，然後望向游泳池環境。
游泳池內屍體遍野，除咗我同夏舞外無人生還。
新郎雖然逃走咗，但佢掟低咗武器，已經無威脅性。
下一步只要將佢殺死就得……
但係面具底下嘅佢無疑係人類……究竟佢係咩人？
我低頭望向自己雙手思考，如果佢真係普通人嘅話，我可唔可以……
咦……？
點解、點解我對手沾滿鮮血？
我望向夏舞，我借畀佢著嘅酒紅色外套同樣有一片片血跡……
「夏舞！你中咗槍！」
夏舞左臂有個深紅嘅血洞，而且不斷流出鮮血！
係幾時……唔通係佢將撲我落水嘅時侯！
「放心喇，只係射中手臂，無咩大礙嘅……」夏舞嘗試平靜咁講，但眼神已經出賣咗佢。
「你個傻妹，咩叫射中手臂無咩嘢呀……」我頓時變得焦急，「點算……點算？」
「終於……可以救返你一次。」夏舞微微一笑。
「喂！頂住呀，我一定會救你！」
喺上個遊戲，我親手將自己嘅老師殺死；喺學校逃逸時，我犧牲咗Ellie去換取自己平安；喺化學室嘅時侯，我無法拯救古朗嘅性命……重有啱啱，我親眼望住愛兒死喺我面前。
我發誓，唔會再有人因為我嘅無能而死去！
我將夏舞抱去其中一條屍體隔籬，然後講：「你扮住屍體瞓喺度先，我將所有面具人殺死之後就返嚟搵你！」
目前為止唔肯定重有無新郎以外嘅面具人，帶住傷患嘅夏舞前往醫療室，反而會更加危險。
與其係咁，留喺呢度扮作屍體或者會更安全。
雖然要我掟低夏舞喺度係非常於心不忍……但係我只有呢條道路可以走。
哪怕將會係修羅場。
我幫自己同夏舞抹乾身上嘅水後，就轉身離開游泳池，準備去搵新郎。
「阿逸，一定要平安無事返嚟……」臨走前，夏舞向我講咗句。
「傻妹，我一定會返嚟。」我留下一句後，然後離開室內游泳池。
唔知係咪天助我也，新郎沾濕咗嘅皮鞋喺走廊上留下黑色嘅鞋印，我沿住一路上嘅鞋印前進。
終於，去到天台最頂層嘅天台籃球場後，我見到室著白色禮服嘅新郎背影。
呢刻新郎再無任何武器，而我一步一步向新郎走近。
新郎聽到我嘅腳步聲，轉過身望過嚟。
映入我眼中嘅，只係一個普通嘅中年男人臉容。
「你係咩人？」我問。
「我……」呢次係我第一次聽到面具人講嘢，「同你哋一樣，都係呢場篩選嘅玩家之一，而且原本應該死喺上個遊戲次中。」
「……咩話？」聽到事實嘅我感到十分驚訝。
「當時我嘅房間死剩我一個人，但最終命令係要寫房內其中一個人嘅名落紙度，被寫嘅人妁會受到懲罰，而得返一個人嘅我根本係無可能做到。」新郎繼續講落去，「正當我絕望嘅時侯，電視上嘅最終指令突然消失，變咗做特別挑戰三。」
竟然有特別挑戰三？莫非——
「無錯，特別挑戰三就係戴上佢哋畀嘅面具，換取豁免懲罰嘅權利。為咗生存，我接受咗挑戰，然後一塊面具就從天花跌落，而我最後擁有意識嘅時刻就係戴上面具一刻。」新郎攤開滿手鮮血嘅雙手，「之後，我就不受控制咁拎住武器殺人，就算見到自己做緊啲咩，唔知點解就係控制唔到身體。」
咁講法，已經死去嘅空姐以及小丑，同佢一樣都係呢個遊戲嘅玩家。
而且，佢哋都已經死喺我手上。
我，親手殺死咗兩個渴望生存嘅人！
「直到你將我嘅面具打碎之後，我先回復返意識。」新郎以絕望嘅眼神望住我，「哈哈！真係諷刺！為咗可以俾自己苟活，我竟然……親手殺死咗咁多人！」
聽到真相嘅我，心猶如靜止一樣。
「我唔想㗎，我真係唔想殺死佢哋㗎！」新郎跪喺地上喊起來，「我只係想再見我未婚妻一面……」
望住新郎自責嘅模樣，以及得知真相之後，我……
無辦法對呢個人痛下殺手。
佢哋殺死咗好多人，而且愛兒嘅性命就喺俾呢個人奪去，至今愛兒向我伸出血手嘅情景依然喺我腦海揮之不去！
但係佢哋都係身不由己，無法控制一切。
正當我陷入猶豫嘅時侯，一道廣播聲傳出：
『鬼方勝利，遊戲結束。各位玩家將會在三小時後進行傳送，此段時間為第四層遊戲前的休息時間，請各位好好享受。』
咩話……？
「遊戲……已經完結？」新郎驚愕咁問。
新郎仍然存活，並無受到任何懲罰，但遊戲已經完結……
唔通，係面具！
鬼捉人中所指嘅「人」，並唔係指戴住面具嘅呢班人，而係面具本身！
只要戴上面具嘅人死咗，人同面具之間嘅聯繫中斷，就等於成功「捕捉」到嘅意思。
但係，正確嘅「捕捉」方法其實係將面具從嗰幾個人身上除落嚟。
……開咩玩笑！
我不知不覺握緊拳頭，甚至連指甲陷入肉中亦不自覺。
「你，叫做咩名？」跪喺地上嘅新郎忽然抬起頭問我。
我猶豫一下，然後答：「我……阿逸。」
「阿逸，我想拜託你一件事……」
「你可唔可以殺死我？」